ޔޫތު މިނިސްޓަރުގެ ސެކްރެޓަރީ ވަކިކޮށްފި

ޔޫތު މިނިސްޓަރު އިރުތިޝާމް އާދަމްގެ ސެކްރެޓަރީގެ މަގާމުގައި ހުންނެވި މުހައްމަދު މިމްރާހު އާއި ކޯޑިނޭޓަރު ހުސައިން އަމީން އިއްޔެ އެ މަގާމުން ވަކިކޮށްފި އެވެ.

މިމްރާހު ހަމަޖައްސާފައި ހުރީ މިނިސްޓަރު ބިއުރޯގެ ކޯޑިނޭޓަރަކަށެވެ. ޔޫތުގެ ދެ ކޯޑިނޭޓަރުން މަގާމުން މި ވަކިކުރީ، އެނގިފައިވާ ގޮތުގައި، ރައީސުލް ޖުމްހޫރިއްޔާ އަށް ގާނޫނުން ލިބިދޭ ބާރުގެ ދަށުންނެވެ. ވަކިކުރި ސީދާ ސަބަބެއް ދެ މީހުންނަށް ވެސް އަންގާފައި ނުވާ ކަން އެނގިފައިވެ އެވެ.

މި ދެ ބޭފުޅުންނަކީ ވެސް ޔޫތު މިނިސްޓަރުގެ މަގާމުގައި ކުރީގެ ވަޒީރު މުހައްމަދު މަލީހް ޖަމާލު ހުންނެވި އިރު ވަޒީފާ ހަމަޖެއްސި ދެ ބޭފުޅުންނެވެ.

ސިޔާސީ މަސްރަހަށް އަންނަ ބަދަލުތަކާ ގުޅިގެން، އެންމެ އަވަހަށް ވަޒީފާ ގެއްލޭ މީހުންގެ ތެރޭގައި ހިމެނެނީ ކޯޑިނޭޓަރުންނެވެ.

މި ސަރުކާރުގެ އެކި މިނިސްޓްރީތަކުގައި އުފައްދާފައިވާ ސިޔާސީ މަގާމުތަކުގެ ތެރޭގައި ކޯޑިނޭޓަރުންގެ އަދަދު ގިނަވެގެން އިދިކޮޅު ފަރާތްތަކުން ދަނީ ފާޑު ކިޔަމުންނެވެ. އެކަމަކު މި ސަރުކާރުން ބުނާ ގޮތުގައި، ސިޔާސީ މަގާމްތައް އެންމެ މަދީ މި ސަރުކާރުގަ އެވެ.