ސެމްސަންގް ނޯޓް 8 އަށް ދިރާގުން ޕްރީ އޯޑަރު ނަގަން ފަށައިފި

ސެމްސަންގުން އަލަށް ތައާރަފްކުރި ނޯޓް 8 އަށް ދިރާގުން ޕްރީ އޯޑަރު ނަގަން ފަށައިފި އެވެ.

ދިރާގު ހެޑް އޮފީހުގައި މިއަދު ބޭއްވި ހާއްސަ ރަސްމިއްޔާތެއްގައި، ނޯޓް 8ގެ ޕްރީ އޯޑަރު ހުޅުވާލީ އެ ކުންފުނީގެ ޗީފް މާކެޓިން އޮފިސާ (ސީއެމްއޯ) އިޒަބެލް ހަޖްރީ އެވެ. ޕްރީ އޯޑަރު ހުޅުވުމަށް ފަހު ހަޖްރީ ވިދާޅުވީ ދިރާގުން ކަސްޓަމަރުންނަށް ވީހާ ވެސް ހެޔޮ އަގުތަކެއްގައި، އެންމެ ފަހުގެ ފޯނުތައް ވިއްކާނެ ކަމަށެވެ.

"އަޅުގަނޑުމެން އަބަދުވެސް ބަލަނީ ވީހާ ވެސް ހެޔޮ އަގެއްގައި އެންމެ ފަހުގެ ސްމާޓް ފޯނުތަކާއި، ހިދުމަތްތައް ކަސްޓަމަރުންނަށް ދޭން. މި ފޯނު ވެސް ވަރަށް އެކަށީގެންވާ އަގެއްގައި ލިބޭނެ. އެހެން ފޯނުތަކާ އެއްގޮތަށް އިސްޓޯލްމަންޓަށް ވެސް ނެގޭނެ،" އިޒަބެލް ވިދާޅުވި އެވެ.

އޭނާ ވިދާޅުވީ، ނޯޓް 8 އަށް ދިރާގު ވެބްސައިޓް މެދުވެރިކޮށް އޯޑަރު ކުރެވޭނެ ކަމަށެވެ. އަދި އިންސްޓޯލްމަންޓްގެ އަގު އުޅޭނީ 1،069ރ. ކަމަށް ވެސް ވިދާޅުވި އެވެ.

ސެމްސަންގުން މިދިޔަ ސެޕްޓެންބަރު މަހުގެ 15 ވަނަ ދުވަހު ތައާރަފްކުރި ނޯޓް 8 އާ ގުޅޭގޮތުން އެ ކުންފުނީގެ ލަންކާ ބްރާންޗްގެ ހެޑް އޮފް މޯބައިލް ބިޒްނަސް ނައިޖެލް އެޑަމްސް ވެސް ވަނީ މިއަދު ނޫސްވެރިންނަށް މައުލޫމާތު ދެއްވައިފަ އެވެ. ނައިޖަލް ވިދާޅުވީ، ނޯޓް 8 ގަންނަ ފަރާތްތަކަށް ވަޔަލެސް ޗާޖަރެއް ހިލޭ ލިބޭނެ ކަމަށެވެ.

"މި ފޯނަކީ ވޯލްޑް ވައިޑް ހިޓަކަށް މިހާރު ވެސް ވެފައި އޮތް ފޯނެއް. މިހާތަނަށް 2.5 މިލިޔަނަށް ވުރެ ގިނަ ޕްރީ އޯޑަރު ލިބިފައި ވަނީ،" ނައިޖެލް ވިދާޅުވި އެވެ.

ނޯޓް 8 އަކީ އިންފިނިޓީ ޑިސްޕްލޭއަކާ އެކު، ޑުއަލް ކެމެރާ ހިމަނާފައިވާ ފޯނެކެވެ. އެ ފޯނުގެ އަގު ބޭރު ގައުމުތަކުގައި އުޅެނީ 900 ޑޮލަރަށް ވުރެ މަތީގަ އެވެ.