ލަންކާއާ އެކު އޮތް ގުޅުން އާ ސަފީރުން ބަދަހިކުރާނެ: ސިރިސޭނާ

ސްރީ ލަންކާ އަށް ކަނޑައެޅި އާ ސަފީރުންގެ ތެރެއިން މިއަދު ފަތްކޮޅު އެރުވި ސަފީރުންނާ މެދު ފުރިހަމަ އިތުބާރު އެބަ އޮތް ކަމަށް ލަންކާގެ ރައީސް މައިތްރިޕާލާ ސިރިސޭނާ ވިދާޅުވެއްޖެ އެވެ.

ހަތަރު ގައުމެއްގެ ސަފީރުންގެ ފަތްކޮޅު އެޅުވުމުގެ ރަސްމިއްޔާތަށް ފަހު ސިރިސޭނާ ކުރެއްވި ޓުވީޓެއްގައި ވިދާޅުވީ އެ ސަފީރުން ނިސްބަތްވެވަޑައިގަންނަވާ ގައުމުތަކާ މެދު އޮތް ގުޅުން ކުރިއަށް އޮތް ތަނުގައި ބަދަހިކުރައްވާނެ ކަމަށް ޔަގީން ކުރައްވާ ކަމަށެވެ.

މިއަދު ފަަތްކޮޅު އެރުވި ބޭފުޅުންގެ ތެރޭގައި ރާއްޖޭގެ އާ ސަފީރު މުހައްމަދު ހުސެއިން ޝަރީފް (މުންދު) ހިމެނިވަޑައިގަންނަވަ އެވެ.

މުންދުގެ އިތުރުން ކެނެޑާ އާއި ރަޝިއާ އާއި ޕާކިސްތާން އަދި މިސްރުގެ ސަފީރުން ވެސް ސަފީރުކަމުގެ ފަތްކޮޅު ސިރިސޭނާއަށް އެރުވި އެވެ.

ލަންކާގައި ހުންނަވާ ދިވެހި ސަފީރަކަށް މުންދު ހަމަޖެއްސީ މިދިޔަ މަހު ހަ ވަނަ ދުވަހު އެވެ.