އަމީނަށް ކުރާ ދައުވާގެ ޚުލާސާ ބަޔާން ހުށަހެޅުން ފަސްކޮށްފި

އެމްޑީޕީގެ ވެރިކަމުގައި މިހާރުގެ ރައީސް އަބްދުﷲ ޔާމީން ބަންދުކުރި މައްސަލާގައި އޭރުގެ ޑިފެންސް މިނިސްޓަރު އަމީން ފައިސަލަށް ކުރާ ދައުވާގެ ޚުލާސާ ބަޔާން ހުށަހެޅުން ފަސްކޮށްފި އެވެ.

އެމްޑީޕީގެ ވެރިކަމުގައި ޖުލައި، 2009 ގައި ރައީސް ޔާމީން ސިފައިންގެ ބެލުމުގެ ދަށުން ކ. އާރަށުގައި ގާނޫނާ ޚިލާފަށް ބަންދުކުރި މައްސަލާގައި އަމީނަށް ކުރާ ޓެރަރިޒަމްގެ ދައުވާގެ ޚުލާސާ ބަޔާން ހުށަހަޅައި، އަޑުއެހުންތައް ނިންމާލަން މިއަދު ތާވަލްކޮށްފައި އޮތަސް އެކަން ފަސްކުރީ އަމީންގެ ވަކީލް އެދިވަޑައިގަތުމަކަށެވެ.

މިއަދު ބޭއްވި މަޖިލީހުގައި އަމީންގެ ވަކީލް މުހައްމަދު ފައްވާޒް ވިދާޅުވީ އޭނާ އެ މައްސަލައާ ހަވާލުވީ މިއަދު ކަމަށާއި އެހެންވެ ޚުލާސާ ބަޔާން ތައްޔާރު ކުރަން ވަގުތު ބޭނުންވާ ކަމަށެވެ. ދައުލަތުން އައީ ޚުލާސާ ބަޔާނަށް ތައްޔާރުވެގެން ކަމަށް ވިޔަސް ދެ ފަރާތުން އެއް ދުވަހެއްގައި ޚުލާސާ ބަޔާން ހުށަހަޅަން ބޭނުންވާ ކަމަށް ދައުލަތުން ބުނުމުން ގާޒީ ވަނީ ޚުލާސާ ބަޔާން ހުށަހެޅުން އެހެން ދުވަހަކަށް ފަސްކޮށްފަ އެވެ.

އެ މައްސަލަ ބައްލަވާ ގާޒީ އިބްރާހިމް އަލީ ވިދާޅުވީ ޚުލާސާ ބަޔާން ތައްޔާރުކުރަން އަމީންގެ ވަކީލަށް އެކަށީގެންވާ މުއްދަތެއް ދެއްވާނެ ކަމަށެވެ. އަދި ދެން އޮންނަ އަޑުއެހުން ބާއްވާނެ ދުވަހެއް ފަހުން އަންގަވާނެ ކަމަށް ގާޒީ ވިދާޅުވި އެވެ.

ޚުލާސާ ބަޔާން ހުށަހަޅާ އަޑުއެހުމަކީ ކޮންމެ މައްސަލައެއްގައި ވެސް އެންމެ ފަހު އަޑުއެހުމެވެ. އެ އަޑުއެހުމަށް ފަހު އިތުރު ކަމެއް ސާފުކުރަން ނުޖެހޭ ނަމަ ދެން އޮންނާނީ ހުކުމް ކުރުމެވެ.

އަމީންގެ މައްޗަށް އެ ދައުވާ ސާބިތުވެއްޖެ ނަމަ އޭރު އަމަލުކުރި ޓެރަރިޒަމްގެ ގާނޫނުުގެ ދަށުން 10 އަހަރާއި 15 އަހަރާ ދެމެދުގެ ޖަލު ހުކުމެއް ނުވަތަ އަރުވާލުމުގެ ހުކުމެއް އަންނާނެ އެވެ.

އެ މައްސަލާގައި އޭރުގެ ރައީސް މުހައްމަދު ނަޝީދަށް ވެސް ދައުލަތުން ވަނީ ޓެރަރިޒަމްގެ ދައުވާ އުފުލައިފަ އެވެ. އެކަމަކު އެމަނިކުފާނު އިނގިރޭސިވިލާތުގެ ހިމާޔަތުގައި ރާއްޖެއިން ބޭރުގައި ހުންނެވުމުން އެމަނިކުފާނުގެ ޝަރީއަތް ކުރިއަކަށް ނުގެންދެވެ އެވެ.