ރެކޯޑް އަދަދެއްގެ ބައިވެރިންނާ އެކު، ހޮޓެލް އޭޝިޔާ ފެއާ ހޯމަ ދުވަހު ފަށަނީ

ރެކޯޑް އަދަދެއްގެ ބައިވެރިންނާ އެކު، ހޮޓެލް އޭޝިޔާ ފެއާ ހޯމަ ދުވަހު ފަށަން ތައްޔާރުވެއްޖެ އެވެ.

މާބުލް ހޮޓަލުގައި މިއަދު ބޭއްވި ނޫސްވެރިންގެ ބައްދަލުވުމެއްގައި، ހޮޓެލް އޭޝިޔާ ބާއްވާ މޯލްޑިވްސް އެގްޒިބިޝަން އެންޑް ކޮންފަރެންސް ސާވިސަސް (މެކްސް)ގެ ޖެނެރަލް މެނޭޖަރު ހުސްނީ ރައޫފް ވިދާޅުވީ އެ ފެއާ އޮންނަނީ ހޯމަ ދުވަހާ އެކު ތިން ދުވަހަށް ކަމަށެވެ.

މި އަހަރުގެ ފެއާގައި 175 އަށް ވުރެ ގިނަ ފަރާތްތަކުން ސްޓޯލް ނަގާފައިވާ ކަމަށް ހުސްނީ ވިދާޅުވި އެވެ. އަދި އެ ފެއާގައި އޮންނަ ކަލިނަރީ ޗެލެންޖުގައި 63 ރިސޯޓަކުން ބައިވެރިވާ ކަމަށް ވެސް ވިދާޅުވި އެވެ.

ހުސްނީ ވިދާޅުވީ އެ ޗެލެންޖުގައި 600 ޝެފުން ބައިވެރިވާ ކަމަށެވެ. އޭގެ ތެރޭގައި ބޭރު ގައުމުތަކުގެ ޝެފުން ވެސް ހިމެނެ އެވެ. ކަލިނަރީ ޗެލެންޖުގެ ޖަޖުން ޕެނަލްގައި ދުނިޔޭގެ އެންމެ މަޝްހޫރު ޝެފުން ހިމެނޭ ކަމަށް ވެސް ވިދާޅުވި އެވެ.

މެކްސްގެ ޑައިރެކްޓާ އަހުމަދު ޖާއިޒް ވިދާޅުވީ މިއީ ރާއްޖޭގައި ބާއްވާ މިފަދަ އެންމެ ބޮޑު ފެއާ ކަމަށެވެ. އަދި ފެއާގެ ތެރެއިން ހޮސްޕިޓަލިޓީ އިންޑަސްޓްރީގެ އިތުރުން އެ ދާއިރާ އާ ގުޅުން ހުރި އެހެން އިންޑަސްޓްރީތަކުގެ ވިޔަފާރިތައް ކުރިއަރާނެ ކަމަށް ވެސް ވިދާޅުވި އެވެ.

މިއީ މި ފެއާ ބާއްވާތާ 13 ވަނަ އަހަރެވެ.

ފެއާގެ މެއިން ސްޕޮންސަރު ކަމަށްވާ ބެސްޓް ބައި މޯލްޑިވްސް (ބީބީއެމް)ގެ އެސިސްޓެންޓް މާކެޓިން މެނޭޖަރު އަލީ އަފްރާހް ހަސަން ވިދާޅުވީ، މިއީ ޝެފުންނަށް ރާއްޖޭގައި ލިބޭ އެންމެ ބޮޑު ފުރުސަތު ކަމަށެވެ. އަދި ފެއާގެ ކަލިނަރީ ޗެޖެންޖުން އާ ވަނަތަކެއް ހޮވަން ނިންމާފައިވާ ކަމަށާއި، އެ ވަނަތަކަށް ދާ ފަރާތްތަކަށް ބޭރުގެ މުބާރާތްތަކުގައި ބައިވެރިވުމުގެ ފުރުސަތު ލިިބޭނެ ކަމަށް ވެސް ވިދާޅުވި އެވެ.

ހޮންކޮންގްގައި ބޭއްވި ހޮފެކްސްގެ ރިހި މެޑަލް ހޯދި ދިވެހި ޝެފެއް ކަމަށްވާ އިސްމާއީލް ނަސީރު ވިދާޅުވީ ރާއްޖޭގައި ޝެފުން ކުރިއަށްދާން ހުރީ ވަރަށް ހަނި ދާއިރާތަކެއް ކަމަށެވެ. ނަމަވެސް އެ ދާއިރާތަކުން ކުރިއަށް ދިއުމަށް މި ފެއާގެ ސަބަބުން ވަރަށް ބޮޑަށް ހިތްވަރު ލިބިގެންދާ ކަމަށް އޭނާ ވިދާޅުވި އެވެ.

"އަޅުގަނޑުމެން ހޮންކޮންގަށް ދިޔައީ ވެސް މި ބޭފުޅުންގެ ހަރަދުގައި. ހުރިހާ ހަރަދެއްގެ އިތުރުން ޕޮކެޓް މަނީ ވެސް ދިން. އެހެން ތަންތަނުން މި ހަދާގޮތަކީ، ފުރުސަތު ހޯދަދީފަ މި ބުނަނީ ދާންޖެހޭނީ އަމިއްލަ ހަރަދުގައޭ،" ނަސީރު ވިދާޅުވި އެވެ.