ރައީސަށް ޚާއްސަ މެސެޖެއް ދެއްވަން ގާސިމް އެދިވަޑައިގަތް: އަޒްލީން

މިހާރު އައިޖީއެމްއެޗުގައި އެޑްމިޓް ކޮށްފައިވާ، ޖުމްހޫރީ ޕާޓީގެ ލީޑަރު ގާސިމް އިބްރާހީމްގެ ފަރާތުން ރައީސް އަބްދުﷲ ޔާމީނަށް "ޚާއްސަ އެދިވަޑައިގަތުމެއް" ދަންނަވަން ވިދާޅުވި ކަމަށް ރައީސްގެ ޚާއްސަ މަންދޫބެއްގެ ގޮތުން ގާސިމްގެ އަރިހަށް ވަޑައިގެންނެވި ހޯމް މިނިސްޓަރު އަޒްލީން އަހުމަދު މިއަދު ވިދާޅުވެއްޖެ އެވެ.

ގާސިމް މިދިޔަ ބުރާސްފަތި ދުވަހު އައިޖީއެމްއެޗުގައި އެޑްމިޓްކުރީ، އެ ދުވަހު ކްރިމިނަލް ކޯޓުގައި ބޭއްވި ޝަރީއަތުގެ ފަހު އަޑުއެހުމުގައި އިންނަވަނިކޮށް އަނބުރައިގަނެގެން ވެއްޓުމުންނެވެ. އިދިކޮޅު ފަރާތްތަކުން ބޭއްވި ޖަލްސާއެއްގައި ގާސިމް ދެއްކެވި ވާހަކައަކާ ގުޅިގެން ކުށް ސާބިތުވެ، އޭނާ ތިން އަހަރަށް ޖަލަށް ލުމަށް ކްރިމިނަލް ކޯޓުން ހުކުމްކުރީ ގާސިމް ސިއްހީ ހާލަތު ގޯސްވެ ހޮސްޕިޓަލްގައި އެޑްމިޓް ކޮށްފައި ވަނިކޮށް ބުރާސްފަތި ދުވަހުގެ ރޭ ދަންވަރު އެވެ.

ގާސިމް ހޮސްޕިޓަލްގައި އެޑްމިޓް ކޮށްފައިވާތާ ހަތަރު ދުވަސް ފަހުން، ރައީސް ޔާމީންގެ ޚާއްސަ މަންދޫބެއްގެ ގޮތުގައި ގާސިމްގެ އަރިހަށް ވަޑައިގަތުމަށް ފަހު، އަޒްލީން "މިހާރު" އަށް މިއަދު ވިދާޅުވީ ގާސިމްގެ "ޚާއްސަ އެދިވަޑައިގަތުމެއް" ރައީސަށް ދަންނަވަން ވިދާޅުވި ކަމަށެވެ. ނަމަވެސް އޭގެ ތަފުސީލެއް އަޒްލީން ނުދެއްވި އެވެ.

އެއީ ސިޔާސީ މެސެޖެއްތޯ ދެންނެވުމުން އަޒްލީން ވިދާޅުވީ އެއީ ސިޔާސީ ވާހަކައަކަށް ވުރެ ބޮޑަށް، އާލާސްކަންފުޅާ އުޅުއްވާ ބޭފުޅަކު ބޭނުންވާ ފަދަ އެދިވަޑައިގަތުމެއް ކަމަށެވެ.

"ރައީސުލްޖުމްހޫރިއްޔާގެ އަރިހުން އާންމު ރައްޔިތަކު އެދިވަޑައިގަންނަވަން ބޭނުންވާ ކަހަކަ އެދިވަޑައިގަތުމެއް އެއީ،" ރާއްޖެ އިން ޖަޕާނަށް ކަނޑައަޅާފައިވާ ސަފީރު މުހައްމަދު ހުސެއިން ޝަރީފް (މުންދު) އާ އެކު، ރައީސް ޔާމީންގެ ޚާއްސަ މަންދޫބެއްގެ ގޮތުން ގާސިމްގެ އަރިހަށް ވަޑައިގަތުމަށް ފަހު އަޒްލީން ވިދާޅުވި އެވެ.

މިނިސްޓަރު ވިދާޅުވި ގޮތުގައި ރައީސްގެ މަންދޫބުންތަކެއް ގާސިމްގެ އަރިހަށް ފޮނުއްވި މައިގަނޑު ބޭނުމަކީ އޭނާގެ ސިއްހީ ހާލަތު ވަޒަން ކުރުމެވެ. ޚާއްސަކޮށް ގާސިމްގެ ސިއްހީ ހާލަތާ ގުޅޭ ގޮތުން ތަފާތު ގޮތްގޮތަށް ވާހަކަތައް ދައްކާތީ އެކަން ބައްލަވަން ރައީސް ޔާމީން ބޭނުންފުޅުވީ ކަމަށް އަޒްލީން ވިދާޅުވި އެވެ.

އޭނާ ވިދާޅުވީ ގާސިމް އޮންނެވީ ހެޔޮހާލުގައި ކަމަށާއި ގާސިމް ބޭނުންވަނީ ވީ އެންމެ އަވަހަކަށް، ބޭސްފަރުވާ އަށް ރާއްޖެ އިން ބޭރަށް ވަޑައިގަތުމަށް ކަމަށެވެ. އަދި އެ މަސައްކަތް ސަރުކާރުން ބާރަށް ކުރިއަށް ގެންދާ ކަމަށް އަޒްލީން ވިދާޅުވި އެވެ.

"ގާސިމް ބޭރަށް ފޮނުވުމާ ގުޅޭ ވަރަށް ގިނަ ކަންކަން މިހާރު ފުރިހަމަ ވެއްޖެ. ދެން ހުރީ ވަރަށް މަދު ކަންތައްތަކެއް. ގާސިމް ރާއްޖެ އިން ބޭރަށް ފޮނުވުމަށްޓަކައި ފެސިލިޓޭޓް ކޮށްދޭންޖެހޭ ކަންކަން ވެސް ކޮށްދެމުން މި އަންނަނީ. އެކަމަށް އެއްވެސް ހުރަހެއް ނޯންނާނެ،" އޭނާ ވިދާޅުވި އެވެ.

ގާސިމް ބޭސްފަރުވާ އަށް ރާއްޖެ އިން ބޭރަށް ފޮނުވުން ލަސްވަނީ ކީއްވެތޯ ދެންނެވުމުން ވިދާޅުވީ އޭގެ ކުރިން ވަރަށް ގިނަ ކަންކަން ނިންމަންޖެހޭތީ ލަސްވީ ކަމަށެވެ.

އަޒްލީން ވިދާޅުވި ގޮތުގައި، ގާސިމް ފުރުވާލުމުގެ ހުއްދަ މޯލްޑިވްސް ކަރެކްޝަނަލް ސާވިސްގެ މެޑިކަލް ބޯޑުން ނުދީ ލަސްވަނީ ކޯރަމް ހަމަނުވެގެންނެވެ. އެކަމަކު އެ ބޯޑުގެ ބައްދަލުވުމެއް މިއަދު ބޭއްވުމަށް މަސައްކަތް ކުރަމުން އަންނަ ކަމަށް ކަރެކްޝަނަލް ސާވިސްގެ ފަރާތުން އެނގިވަޑައިގެންފައިވާ ކަމަށް އޭނާ ވިދާޅުވި އެވެ.

"ގާސިމް ވެސް އެންމެ ބޮޑަށް ބިރު ގަންނަނީ އެމަނިކުފާނުގެ [ސިއްހަތާ ގުޅޭ] ކަމެއް ގޯސްވެދާނެތީ. އެހެންވެ އަޅުގަނޑުމެން މި މަސައްކަތް ކުރަނީ ގާސިމް ވީހާ ވެސް އަވަހަކަށް ފުރާވަޑައިގެންނެވޭނެ ގޮތް ހަމަޖެއްސުމަށް،" އަޒްލީން ވިދާޅުވި އެވެ.

ގާސިމް ބޭސްފަރުވާ އަށް ރާއްޖެ އިން ބޭރަށް ފުރުވާލުމަށް ޑޮކްޓަރުން ލަފާދެއްވައި، އެކަން އެގޮތަށް ކުރުމަށް ކޯޓު ހުކުމުގައި ވެސް ވަނީ އަމުރުކޮށްފަ އެވެ.