ކާބުލްގެ ހޮސްޕިޓަލަކަށް ތާލިބާނުން ދިން ހަމަލާގައި 35 މަރު

ކާބުލް (ޖުލައި 24) - އަފްޣާނިސްތާނުގެ މެދުތެރޭ ގޯރް ޕްރޮވިންސްގެ ހޮސްޕިޓަލަކަށް ތާލިބާނުން މިއަދު ދިން ހަމަލާގައި މަރުވި މީހުންގެ އަދަދު 35 އަށް އަރައިފި އެވެ.

އަފްޣާނިސްތާނުގެ ރައީސްގެ ތަރުޖަމާން ޝާހު ހުސައިން މުރްތަޒާވީ ވިދާޅުވީ ތާލިބާނުން ހޮސްޕިޓަލަށް ވަދެ ދިން ހަމަލާގައި އާއްމުންގެ 35 މީހުން މަރުވެފައިވާ ކަމަށެވެ. ނަމަވެސް އެއީ ހޮސްޕިޓަލުގެ ސްޓާފުން ކަމެއް ނުވަތަ ބަލި މީހުން ކަމެއް ނޭނގެ އެވެ.

ހަމަލާ ދިނީ ތާލިބާނުން ކަމަށް ބުނި ނަމަވެސް އެ ޖަމާއަތުން ވަނީ އެކަން ދޮގުކޮށްފަ އެވެ. އަދި ހޮސްޕިޓަލް ހަލާކުވެފައި ވަނީ އެ ސަރަހައްދުގައި ހިނގާ ހަމަނުޖެހުމުގެ ސަބަބުން ކަމަށް ބުނެފައިވެ އެވެ.

އދ. އިން ބުނީ މި އަހަރުގެ މިހާތަނަށް އަފްޣާނިސްތާނުގެ އާއްމުންގެ ތެރޭން 1،662 މީހުން މަރުވެފައިވާ ކަމަށެވެ. މީގެ ތެރޭން 20 ޕަސެންޓް މީހުން މަރުވެފައި ވަނީ ވެރިރަށް ކާބުލް އިންނެވެ.

ކާބުލްގެ މެދުތެރޭގައި މެއި 31 ވަނަ ދުވަހު ދިން ބޮމުގެ ހަމަލާއެއްގައި ވަނީ 150 މީހުން މަރުވެފަ އެވެ. މިއީ ތާލިބާނުންގެ ވެރިކަން 2001 ވަނަ އަހަރު ވައްޓާލި ފަހުން އެންމެ ގިނަ މީހުން މަރުވި ހަމަލާ އެވެ.