ހުވާ ކުރެއްވިތާ ދެ ދުވަސް ފަހުން ކަމަދޫ ކައުންސިލްގެ ނައިބު ރައީސް އިސްތިއުފާ ދެއްވައިފި

ބ. ކަމަދޫ ކައުންސިލްގެ ނައިބު ރައީސްކަމުގެ ހުވާ ކުރެއްވިތާ ދެ ދުވަސް ފަހުން، އެ މަގާމުން އަލީ މައުސޫމް މިއަދު އިސްތިއުފާ ދެއްވައިފި އެވެ.

ކައުންސިލަރު ކަމުގެ ހުވާ ކުރެއްވިތާ ދެ ދުވަސް ފަހުން، އެމްޑީޕީ މެމްބަރު އިސްތިއުފާ ދެއްވީ ކައުންސިލްގެ އިދާރީ މުވައްޒަފުންނާ މެދު ހިތްހަމަނުޖެހުން ފާޅުކުރެއްވުމަށް ފަހު އެވެ.

އެ ރަށު ކައުންސިލްގެ ޒިންމާދާރުވެރިޔާ އަލީ ޝަރީފް ވިދާޅުވީ، މިދިޔަ ދައުރުގައި ވެސް ކައުންސިލް މެމްބަރެއްގެ ގޮތުގައި ހުންނެވި މައުސޫމް އިސްތިއުފާ ދެއްވީ "އިދާރީ މުވައްޒަފުންގެ އާއިލީ މެމްބަރުންގެ ކެމްޕޭނު ޖަގަހައެއް"ގެ ގޮތުގައި ކައުންސިލް އިދާރާ ބޭނުން ކުރާ ކަމަށް ވިދާޅުވެ ކަމަށެވެ.

"އަޅުގަނޑުމެންނަށް އެއްގޮަތަކަށް ވެސް ނޭނގޭ ކޮން ކެމްޕޭނުގެ ވާހަކައެއް ކަމެއް މިއީ. އާއްމު ގޮތެއްގައި މި ފަދަ ތުހުމަތުތައް ކުރައްވަނީ އިންތިހާބުން ބަލިވާ މީހުން،" އަލީ ޝަރީފް ވިދާޅުވި އެވެ.

އޭނާ ވިދާޅުވީ އިންތިހާބުގެ ތެރޭގައި ވެސް އަދި ހުވާ ކުރުމާ ހަމައަށް ވެސް މައުސޫމާއި ކައުންސިލްގެ އެއްވެސް މުވައްޒަފަކާ މެދު މައްސަލަ ޖެހިފައި ނުވާ ކަމަށެވެ. އަދި އިއްޔެ ވެސް އޭނާ ކައުންސިލްގެ ރަސްމީ ދަތުރެއްގައި ބ. އޭދަފުއްޓަށް ވަޑައިގެންނެވި ކަމަށް ވިދާޅުވި އެވެ.

އިސްތިއުފާ ދެއްވުމުގެ ކުރިން، މިއަދުން ފެށިގެން ޗުއްޓީއަކަށް އެދިވަޑައިގެންފައިވާ ކަމަށް އަލީ ޝަރީފް ވިދާޅުވި އެވެ.

ލާމަރުކަޒީ ގާނޫނުގައި އޮންނަ ގޮތުން، ކައުންސިލަރަކު އިސްތިއުފާ ދެއްވައިފި ނަމަ، އެ މަގާމަށް މީހަކު އައްޔަން ކުރުމަށް ބައި އިލެކްޝަން ބާއްވަން ޖެހޭނެ އެވެ.

ކަމަދޫ ކައުންސިލްގައި މިހާރު ތިއްބަވަނީ ޕީޕީއެމް އަދި އެމްޑީޕީގެ ދެ މެމްބަރުންނެވެ.