ޖޭޕީގެ ދިދައަކީ އެ ޕާޓީގެ ފިކުރީ މުދަލެއް، ގާނޫނީ ގޮތުން ބަދަލެއް ނުގެނެވޭނެ: އެމްޑީޕީ

ޖުމްހޫރީ ޕާޓީ (ޖޭޕީ) ގެ ދިދައަކީ އެ ޕާޓީގެ ފިކުރީ މުދަލެއް ކަމަށާއި ފަހުން ހަދާ އުސޫލަކުން އެ މުދަލަށް އަރައިގަތުމަކީ ގާނޫނީ ގޮތުން ކުރެވޭނެ ކަމެއް ނޫން ކަމަށް އިދިކޮޅު އެމްޑީޕީން މިއަދު ބުނެފި އެވެ.

ޖޭޕީގެ ދިދަ އާއި ނިޝާން ބޭނުންކުރުން އިލެކްޝަންސް ކޮމިޝަން (އީސީ) އިން އިއްޔެ މަނާކުުރުމުން އެކަން ކުށްވެރިކޮށް އެމްޑީޕީން ނެރުނު ބަޔާނުގައި ބުނީ ދައުލަތުގެ މުއައްސަސާތަކުން އަމިއްލަ ފަރާތްތަކުގެ މުދަލަށް އެގޮތަށް އަރައިގަތުމަކީ ވަރަށް ނާތަހުޒީބު ވިޔާނުދާ އަމަލެއް ކަމަށެވެ. އެއިން ވެސް އެނގެނީ މި ސަރުކާރު ހަމައިން ނެއްޓިފައިވާ މިންވަރު ކަމަށް ވެސް ޖުމްހޫރީ ޕާޓީއާ އެކު އިދިކޮޅު އިއްތިހާދުގައި މަސައްކަތްކުރާ އެމްޑީޕީން ބުންޏެވެ.

ޖޭޕީގެ ދިދަ އާއި ނިޝާން ބޭނުންކުރުން އީސީން މަނާކުރީ ރައީސުލްޖުމްހޫރިއްޔާ އަށް ހާއްސަ ދިދައިން އެ ޕާޓީގެ ނިޝާނާއި ދިދަ ރަމްޒުކޮށްދޭ ކަމަށް ބުނެ އެވެ.

މިިދިޔަ މާޗުމަހު ހޯމް މިނިސްޓްރީން އެކުލަވާލި ދިދަ ބޭނުންކުރުމާ ބެހޭ އުސޫލު ބުނާގޮތުން ރައީސަށް ހާއްސަ ދިދައާ ވައްތަރު ދިދައެއް ނުވަތަ ނިޝާނެއް އެހެން އެއްވެސް ފަރާތަކުން ބޭނުންކޮށްގެން ނުވާނެ އެވެ.

ރައީސުލްޖުމްހޫރިއްޔާގެ ދިދަ ހުންނަން ޖެހޭ ގޮތް ކަމަށް ބުނެފައިވަނީ، ގައުމީ ދިދައިގެ ހަނދުފަޅީގެ އެތެރެއަށްވާ ގޮތަށް ފަސް ފިޔައިގެ ތަރިއެއް ހިމެނޭ ގޮތަށެވެ. ރައީސުލްޖުމްހުރިއްޔާގެ ދިދަ ހުންނަނީ ހަނދުފަޅީގެ އެތެރެއަށްވާ ގޮތަށް ފަސް ފިޔައިގެ ތަރިއެއް ހިމެނޭ ގޮތަށެވެ. ޖޭޕީގެ ރަސްމީ ދިދައިގައި ވެސް ހަނދުފަޅިއަކާއި ތަރިއެއް ހިމެނެ އެވެ.

އެމްޑީޕީން ފާހަގަކުރި ގޮތުގައި އެ ޕާޓީގެ ލޯގޯ އާއި ޖުޑީޝަރީގެ ލޯގޯއާ ވެސް އެއްގޮތެވެ. އަދި އެމްޑީޕީގެ ލޯގޯ އަކީ ސުޕްރީމް ކޯޓު އުފެއްދުމުގެ ކުރިން ބޭނުން ކުރަން ފަށާފައިވާ ލޯގޯއެއް ކަމަށް ވެސް ބުންޏެވެ.

"އެހެންކަމަށްވާއިރު، މި ޕާޓީން ބޭނުންކުރަމުން އަންނަ ލޯގޯ އާއި އެއްގޮތް ލޯގޯއެއް ޖުޑިޝަރީން ބޭނުންކުރަމުން ގެންދާއިރު، އެކަން ކުރުން އެ ފަރާތަށް މަނާ ނުކުރެވޭ ކަމަށް ވާނަމަ، އެގޮތަކީ ވެސް ހަމަޖެހޭ ގޮތެއް ނޫންކަން ލަދުވެތިކަމާއެކު ފާހަގަކުރަމެވެ،" އެމްޑީޕީން ބުންޏެވެ.

ޖޭޕީގެ ދިދަ ބޭނުންކުރުން މަނާކުރުމުން އެ މައްސަލަ ކޯޓަށް ހުށަހެޅުމަށް އެ ޕާޓީގެ ގައުމީ ހިންގާ ކޮމެޓީން ރޭ ވަނީ ނިންމައިފަ އެވެ. އަދި މިއަދު އެ މައްސަލަ ކޯޓަށް ހުށަހެޅުމަށް މަސައްކަތް ކުރަމުން އަންނަ ކަމަށް ސްޕޯކްސްޕާސަން އަލީ ސޯލިހު ވިދާޅުވެފައިވެ އެވެ.

ޕީޕީއެމްގެ ކުރީގެ ރައީސް މައުމޫން އަބްުދުލް ގައްޔޫމުގެ އޮފީހުގައި ނަގާފައިވާ ގައުމީ ދިދަ ވެސް ފުލުހުން ވަނީ ނަގައިފަ އެވެ. އެ ދިދަ ނެގީ ދިދަ ބޭނުންކުރުމާބެހޭ އުސޫލުގެ ދަށުންނެވެ.