ސޮނީ އާއި ހުރަވަޅި އިންވެސްޓްމަންޓްސް އިން ހުޅުމާލޭގައި ދެ ޝޮޕިން ކޮމްޕްކްސް އަޅަނީ

ސޮނީ ހާޑްވެއާ އާއި ހުރަވަޅި ބީޗް ރިސޯޓް އިންވެސްޓްމަންޓްސް އިން ހުޅުމާލޭގައި ޝޮޕިން ކޮމްޕްލެކްސް އެޅުމަށް ނިންމައި އެ ފަރާތްތަކާ އެކު ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން އިއްޔެ އެއްބަސްވުމެއްގައި ސޮއިކޮށްފި އެވެ.

މި އެއްބަސްވުންތަކުގައި އެޗްޑީސީން ސޮއިކުރެއްވީ މެނޭޖިން ޑިރެކްޓަރު މުހައްމަދު ސައިމަން އެވެ. ސޮނީ ހާޑްވެއާގެ ފަރާތުން ސޮއިކުރެއްވީ އެ ކުންފުނީގެ މެނޭޖިން ޑިރެކްޓަރު މޫސާ ކަލީމް އެވެ. ހުރަވަޅި ބީޗް ރިސޯޓް އިންވެސްޓްމަންޓުން އެއްބަސްވުމުގައި ސޮއިކުރެއްވީ މެނޭޖިން ޑިރެކްޓަރު އާމިރު މަންސޫރު އެވެ.

އެޗްޑީސީން ބުނިގޮތުގައި ސޮނީ ހާޑްވެއާ އިން ހުޅުމާލޭގައި އިމާރާތްކުރާ ހަ ބުރީގެ މަލްޓި ސްޓޯރީ ޝޮޕިން ކޮމްޕްލެކްސް އަޅާނީ ރެހެންދި ސްކޫލް ކައިރީގަ އެވެ. އަންނަ އަހަރުގެ މެދުތެރޭގައި މަސައްކަތް ނިމޭ މި ޝޮޕިން ކޮމްޕްލެކްސް ހާއްސަ ކޮށްފައި ވަނީ ހާޑްވެއާގެ ސާމާނަށެވެ.

ހުރަވަޅި ބީޗް ރިސޯޓް އިންވެސްޓްމަންޓުން ކޮމާޝަލް ކޮމްޕްލެކްސް އިމާރާތް ކުރަނީ ހުޅުމާލޭގެ ފެރީ ޓާމިނަލްގެ އުތުރުން ބީޗް ސަރަހައްދުގަ އެވެ. ދެ ބުރީގެ މި އިމާރާތުގައި ޗޭންޖިން ރޫމްތަކާއި ފާހާނާ އާއި ޅަދަރި މައިންގެ ކޮޓަރި އާއި ނަމާދުކުރާ ކޮޓަރިތަކާއި ފްރީ ވައިފައި އަދި އޭޓީއެމްގެ ޚިދުމަތް ލިބެން ހުންނާނެ ކަމަށް އެޗްޑީސީން ބުންޏެވެ.

ހުރަވަޅި އިންވެސްޓްމަންޓްސް އިން އިމާރާތްކުރާ ކޮމާޝަލް ކޮމްޕްލެކްސްގެ މަސައްކަތް ނިންމަން ކަނޑައަޅާފައި ވަނީ އަންނަ އަހަރުގެ މެދުތެރޭގަ އެވެ.