68 އަހަރުގެ ދަރިވަރެއް: ކިޔެވުމަށް ވަކިއުމުރެއް ނެތް

ނޭޕާލުގެ 68 އަހަރުގެ ދަރިވަރު ބުނަނީ ކިޔެވުމަށް ވަކި އުމުރެއް ނެތް ކަމަށް

15 ޖޫން 2016

ކަތުމަންޑޫ (ޖޫން 15) - ނޭޕާލުގެ 68 އަހަރުގެ ކާފަ އަކީ މިހާރު އެ ގައުމުގެ އެންމެ ދުވަސްވީ ސްކޫލް ދަރިވަރެވެ. ނުރަ ތުނބުޅިއެއްލާފައި ހުރި ދުރްގާ ކާމީ ސްކޫލަށް ގޮސް ކިޔަވަނީ އޭނާގެ ކާފަ ދަރިންނަށް ވުރެ ހަގު ކުދިންނާ އެކު އެވެ.

ހަސަން އާމިރު

ނޭޕާލުގެ ދުވަސްވީ ދަރިވަރު ސްކޫލުގެ އިތުރު ހަރަކާތެއްގެ ގޮތުގައި ވޮލީ ކުޅެނީ.

އަސާގަނޑާ އެކު ގަޑިއެއްހާ އިރު ހިނގާފައި ކޮންމެ ދުވަހަކު ސްކޫލަށް ދާ ކާމީ ބުނީ އޭނާގެ ޅަ އުމުރުގައި ކިޔެވުމަށް ހުރަސް އެޅުނީ ފަގީރު ހާލަތުގެ ސަބަބުން ކަމަށެވެ. ޓީޗަރަކަށް ވުމަށް ކުރި އުއްމީދު ފުރިހަމަ ނުވި ނަމަވެސް އުފަން ހަ ދަރިންނާއި ކާފަ އަށް ކުދިން ލިބިފައިވީ ނަމަވެސް ސްކޫލަށް ދާން ޖެހިލުން ނުވާ ކަމަށް އޭނާ ބުންޏެވެ. ކާމީ ބުނީ އަނބިމީހާ މަރުވުމުން ހަޔާތަށް ވެރިވި އެކަނިވެރިކަން މިހާރު ފަޅުފިލުވައިދެނީ ހަފުތާއަކު ހަ ދުވަހު ސްކޫލަށް ގޮސްގެން ކަމަށެވެ.

ނޭޕާލުގެ 68 އަހަރުގެ ދަރިވަރަށް ކްލާހުގައި ޓީޗަރު އެހީވެދެނީ.

"އަހަރެންގެ ހިތާމަތަކާ ދުރުވާން މިހާރު ދަނީ ސްކޫލަށް،" ނޭޕާލުގެ އެންމެ ދުވަސްވީ ދަރިވަރު ބުންޏެވެ.

ކްލާހުގައި އޭނާ ކިޔަވަމުން ދަނީ އުމުރުން 14-15 އަހަރުގެ ދަރިވަރުންނާ އެކު އެވެ. އޭނާ އެންމެ ފުރަތަމަ ދިޔައީ ޕްރައިމަރީ ސްކޫލަކަށެވެ. އެ ތަނުގައި 7-8 އަހަރުގެ ކުދިންނާ އެކު ލިޔަން ކިޔަން ދަސް ކުރުމަށް ފަހު އޭގެ ފަހުން ވަނީ އުމުރުން 11 އަހަރުގެ ދަރިވަރުންނާ އެކު ގްރޭޑް ފަހެއް ނިންމައިފަ އެވެ.

ނޭޕާލުގެ ދުވަސްވީ ދަރިވަރު ކްލާސް ކުއްޖަކާ އެކު ސްކޫލަށް ދަނީ.

ކާމީ އަށް ކިޔަވައިދޭ އެއް ޓީޗަރަކު ބުނީ އޭނާގެ ބައްޕަ އަށް ވުރެ އުމުރުން ދުވަސްވީ ދަރިވަރަކަށް ކިޔަވައިދިނުމަކީ ލިބޭ ވަރަށް ބޮޑު އުފަލެއް ކަމަށެވެ.

ކާމީ މިހާރު ކިޔަވަމުން ދަނީ ގްރޭޑް 10 ގަ އެވެ. އެ ކްލާހުގައި ކިޔަވަމުންދާ 20 ދަރިވަރުން ކާމީ އަށް މުޚާތަބް ކުރަނީ "ބާ"ގެ ނަމުންނެވެ. ނޭޕާލުން ބަހުން އެއީ ބައްޕަ އެވެ. ކާމީގެ އުމުރު ކިތަންމެ މަތި ނަމަވެސް އޭނާ ދަނީ ޅަ ދަރިވަރުންނާ އެކު ވޮލީ ކުޅުމާއި ސްކޫލުގެ އެހެން ހަރަކާތްތަކުގައި ވެސް ބައިވެރިވަމުންނެވެ.

ނޭޕާލުގެ އެންމެ ދުވަސްވީ ދަރިވަރަށް ކްލާހުގައި ޓީޗަރު ސުވާލު ކުރަނީ.

"މިހާ އުމުރުން ދުވަސްވީ މީހަކު ސްކޫލަށް ކިޔަވަން އަންނަނީ ކީއްވެ ބާވައޭ ހިތަށް އަރާ. އެކަމަކު ދުވަސްތައް ފާއިތުވީ ވަރަކަށް އޭނާއާ ގުޅުން ބަދަހިވަމުން ދަނީ،" ކާމީއާ އެކު ކިޔަވަމުންދާ 14 އަހަރުގެ ދަރިވަރަކު ބުންޏެވެ. "އޭނާ ކިޔެވުމަށް ތަންކޮޅެއް ދަށް. އެކަމަކު އަހަރެން އޭނާ އަށް އެހީތެރިވެދެން."

ނޭޕާލުގެ އެންމެ ދުވަސްވީ ދަރިވަރު ކާމީ (މ) އޭނާގެ ކްލާސް ކުދިންނާ އެކު ފޮޓޯއަކަށް ހުއްޓިގެން.

ކާމީ ބުނީ އޭނާ މިހާރު ބޭނުން ވަނީ މަރުވަންދެން ކިޔަވަން ކަމަށެވެ. އަދި ކިޔެވުމަކީ ވަކި އުމުރަކަށް އޮތް ކަމެއް ނޫންކަން އޭނާ ސާބިތުކޮށްދޭން ބޭނުންވާ ކަމަށް ވެސް ބުންޏެވެ.

Comments