މަރުގެ އެކްސިޑެންޓު: ދުއްވީ އެހެން މީހަކު ކުއްޔަށް ނެގި ސައިކަލެއް

މާލޭގައި މިދިޔަ އާދިއްތަ ދުވަހުގެ ރޭ ޔޫސުފް އަލްސަން މުހައްމަދު ނިޔާވި އެކްސިޑެންޓުގައި ދުއްވީ އެހެން މީހަކު ކުއްޔަށް ނެގި ސައިކަލެއްކަން އެނގިއްޖެ އެވެ.

އާއިލާއާ ގާތް ގުޅުމެއް އޮންނަ މީހަކު "މިހާރު" އަށް ކިޔައިދިން ގޮތުގައި، މިދިޔަ މެއި މަހު 17 އަހަރު ފުރުނު އަލްސަން ސައިކަލު ދުއްވާ ކަމެއް އެ އާއިލާގެ އެއްވެސް މީހަކަށް ނޭނގެ އެވެ. ތަނަކަށް ދާން ޖެހުނަސް ކޮންމެ ފަހަރަކު ބައްޕަ، މުހައްމަދު އަބްދުލްޣަނީ (ތޭރަވާ) އަދި އާއިލާގެ އެކި މީހުން ތަންތަނަށް ގެންގޮސްދޭ ކަމަށް ބުންޏެވެ.

ލަވަކިޔުންތެރިޔާ މަރިޔަމް އަޝްފާ އަދި ތޭރަވާގެ ހުރި ހަމައެކަނި ދަރިފުޅު، އަލްސަން ބޮޑުތަކުރުފާނުމަގު، މާފަންނު ބަސް ޓާމިނަލް ކައިރީ އެކްސިޑެންޓުވުވެ ނިޔާވީ އެހެން ކުއްޖަކާ އެކު ސައިކަލުގައި ބާރަށް ދުއްވަނިކޮށް، މަގު ހުރަސްކުރަން އުޅުނު މީހެއްގެ ގައިގައި ޖެހި، ކުރިމަތިން އައި ޕިކަޕެއްގައި ޖެހިގެންނެވެ.

ނަން ނުޖެހުމަށް އެދި ވާހަކަދެއްކި މީހާ ބުނީ އަލްސަން ދުއްވީ ތަނަކުން ކުއްޔަށް ނެގި ސައިކަލެއްކަން އެނގުމުން، އެފަދަ ވިޔަފާރިކުރާ ތަންތަނަށް ގުޅައިގެން އާއިލާއިން މައުލޫމާތު ހޯދި ކަމަށެވެ.

"އެ ހިސާބުން މި އެނގުނީ ސައިކަލު އަސްލު ދޫކުރީ 22 އަހަރުގެ ފިރިހެނަކަށް ކަމަށް، އޭނާގެ އައިޑީކާޑާއި ލައިސަންސް ކާޑު ދެއްކީމާ ދޫކޮށްފައިވާކަން ޔަގީންވަނީ،" އޭނާ ބުންޏެވެ.

"އެކްސިޑެންޓުވި ދުވަހުގެ ހަވީރު ސައިކަލު ޑެލިވާ ކޮށްދިނީ."

ސައިކަލު ކުއްޔަށް ނެގީ އަލްސަން ދުއްވި ސައިކަލް ފަހަތުގައި އިން 16 އަހަރުގެ ކުއްޖާގެ އާއިލާގެ މީހެކެވެ. ނަމަވެސް، އޭނާ ސައިކަލު ނެގުމަށްފަހު ދުއްވަން ދިނީ ކާކަށް ކަމެއް ނޭނގެ އެވެ.

އެކްސިޑެންޓުވި ސައިކަލުގައި އިން 16 އަހަރުގެ ކުއްޖާއަށް އައިޖީއެމްއެޗްގެ ވޯޑުގައި އަންނަނީ ފަރުވާ ދެމުންނެވެ. މަގުހުރަސްކުރަނިކޮށް އަނިޔާވި، ބ. ތުޅާދުއަށް އުފަން 40 އަހަރުގެ ފިރިހެން މީހާއަށް ވެންޓިލޭޓަރުގައި ފަރުވާ ދެމުން އަންނަ ކަމަށް އައިޖީއެމްއެޗުން ބުންޏެވެ.