ނަޝީދު އަނެއްކާވެސް ރިޔާސީ ރޭހަށް ނުކުންނަވަން ހިޔާލު ހޯއްދަވާތީ ނިޔާގެ ނުރުހުން!

ދެން އެންމެ އަވަހަށް ބާއްވާ ރިޔާސީ އިންތިހާބުގައި ވާދަކުރެއްވުމުގެ ޝައުގުވެރިކަން ކުރީގެ ރައީސް މުހައްމަދު ނަޝީދު ގެންގުޅުއްވާތީ އެމްޑީޕީގެ ކުރީގެ ޑެޕިއުޓީ ޗެއާޕާސަން އަލީ ނިޔާޒް (ނިޔާ) މިއަދު ނުރުހުން ފާޅުކުރައްވައިފި އެވެ.

ހައްޖުގެ ދުވަހުގެ ތަހުނިޔާގެ މެސެޖާ އެކު "އެކްސް" ގައި ކުރެއްވި ޕޯސްޓެއްގައި ނަޝީދުގެ ނަން ވިދާޅުނުވެ، އެކަމަކު އެ މަނިކުފާނަށް ދެއްވި ރައްދުގައި ނިޔާ ވިދާޅުވީ، ތިމަންނާ ބޭނުންވުމުން ރޫޅައި ހަލާކުގެ ތެރެއަށް އެންމެން ދޫކޮށްލައި، އަނެއްކާ ވެސް ތިމަންނާ ބޭނުންވުމުން ހަމަ އެ މީހުން ލައްވައި ރާވަން މަސައްކަތް ކުރެވޭ ނިޒާމަކަށް ރުހިވަޑައިނުގަންނަވާ ކަމަށެވެ.

އެމްޑީޕީގެ ލާމަރުކަޒި ކޮމިޓީގެ މުގައްރިރުކަން ވެސް ކުރައްވާ އަދި ކުރީގެ ރައީސް އިބްރާހިމް މުހައްމަދު ސޯލިހު (އިބޫ) ގެ ކޮއްކޯފުޅު ނިޔާ މިހެން ވިދާޅުވީ 2028 ގެ ރިޔާސީ އިންތިހާބުގައި ވާދަކުރައްވަން ޝައުގުވެރިވެވަޑައިގަންނަވާ ކަމަށް ނަޝީދު ވިދާޅުވެ، އެކަމުގެ ހިޔާލަކަށް އެދި އެމްޑީޕީ އާއި ޑިމޮކްރެޓްސްގެ ބައެއް އިސް ބޭފުޅުންނަށް މެސެޖެއް ފޮނުއްވާފައި ވަނިކޮށެެވެ.

މިދިޔަ ރިޔާސީ އިންތިހާބާ ދިމާކޮށް ނަޝީދު އިސްވެ ހުންނަވައި ޑިމޮކްރެޓްސް އުފެއްދެވީ ވެސް އެމްޑީޕީގެ ވެރިކަމާ މެދު ހިތްހަމަނުޖެހިވަޑައިގެންނެވެ. އެއީ އޭރުގެ ރައީސް އަދި އެމްޑީޕީގެ ރައީސް އިބްރާހިމް މުހައްމަދު ސޯލިހާ ދެބޭފުޅުންގެ ކޯޅުން ވަރަށް ބޮޑުވެ އުފެއްދި ޕާޓީއެކެވެ. އެއާ އެކު، އެމްޑީޕީގެ ބައެއް މެމްބަރުން ނަޝީދުގެ ފަހަތްޕުޅަށް އަރައި ޑިމޮކްރެޓްސް ވަރުގަދަ ކުރަން މަސައްކަތް ފެށި އެވެ.

ރިޔާސީ އިންތިހާބުގެ ކެމްޕެއިން ދުވަސްވަރު ޑިމޮކްރެޓްސްގެ ޖަލްސާއެއްގައި ނަޝީދު ވަނީ ކަށިކެޔޮ ގަނޑެއްހެން އެމްޑީޕީގެ ފޫ ވައް ވެއްޓިއްޖެ ކަމަށާއި އެ ޕާޓީ ރޫޅާލާއްވާނެ ކަމަށް ވެސް ވިދާޅުވެފަ އެވެ.

އެހެންވެ، އެކަމަށް އިޝާރާތް ކުރައްވައި ނިޔާ ވިދާޅުވީ ބޭނުންއިރެއްގައި ޕާޓީ ހަލާކުގެ ތެރެއަށް ދޫކޮށްލުމަށް ފަހު، ބޭނުންވުމުން އަނެއްކާ ވެސް ހަމަ އެ ޕާޓީގެ މީހުން ލައްވާ ރާވަން މަސައްކަތްކުރާ ނިޒާމަކަށް ރުހޭ އުސޫލެއް ހަމަނޫން ކަމަށެވެ.

"ތިމަންނާ ބޭނުންވީމާ ރޫޅާލާފައި ހަލާކުތެ ރެއަށް އެންމެން ދޫކޮށްލާފައި ތިމަންނާ ބޭނުންވީމަ ހަމަ އެމީހުން ލައްވާ ރާވަން މަސައްކަތްކުރެވޭ ނިޒާމްއަކީ އަޅުގަނޑަށް ރުހެވޭ އުސޫލެއް، ހަމައެއް ނޫން،" ނިޔާ ވިދާޅުވި އެވެ.

ނިޔާޒަށް ރައްދު ދެއްވައި އުނގޫފާރު ދާއިރާގެ ކުރީގެ މެމްބަރު މުހައްމަދު ވަހީދު (ވައްޑޭ) ވިދާޅުވީ އެއްޗެއް ރޫޅާލެވޭނީ ބަލިކަށި ކޮށްލީމަ ކަމަށާއި ނިޔާ އެ އިޝާރަތް ކުރައްވާ އެއްޗެއް ބަލިކަށި ކޮށްލީ އިބޫގެ ސަރުކާރުން ވައްކަމުގެ މައްސަލަތައް ބެލުމަށް ހަވާލުވެ، އެކަން ނުކުރުމުން ކަމަށެވެ.

ވަހީދު ވިދާޅުވި ގޮތުގައި އެމްޑީޕީ ބަލިކަށިކޮށް ރޫޅާލީ، ވައްކަމުގެ މައްސަލަތައް ބަލަން ހަވާލުވެ، އެމްއެމްޕީއާރްސީގެ ކޮރަޕްޝަނާއި މަގާމުގެ ނުފޫޒު ބޭނުންކޮށްގެން ނާޖައިޒު ފައިދާ ހޯދުން އަދި މަނީލޯންޑަރިންގެ މައްސަލަތަކެއްގައި ޖަލަށްލާން ހުކުމްކޮށްފައިވާ ކުރީގެ ނައިބު ރައީސް އަހުމަދު އަދީބު ދޫކޮށްލި މީހުންނެވެ. އަދީބު ދޫކޮށްލީ އޭރުގެ ރައީސް އިބޫގެ ވެރިކަން ނިމެން ކުޑަ ދުވަސްކޮޅަކަށް ވެފައިވަނިކޮށެވެ.

ވަހީދު ވިދާޅުވީ ގޮތްނޭނގޭ މަރުތައް ބަލާނެކަމަށް ބުނެ ސަރުކާރާ އެމްޑީޕީން ހަވާލުވުމަށް ފަހު، ނަޝީދު މަރާލަން، ބޮން ގޮއްވި މައްސަލަ ވެސް ނުބެލި ކަމަށެވެ.

މޭ 6، 2021 ވަނަ ދުވަހުގެ ރޭ އަމިއްލަފުޅު ގެކޮޅު ގ. ކެނެރީގެ އިން ނަޝީދު ބޮޑީގާޑުންނާ އެކު ނުކުމެވަޑައިގެން، މަޖީދީ މަގުގައި އޮތް ކާރުކޮޅާ ދިމާއަށް ވަޑައިގަންނަވަނިކޮށް ދިން ހަމަލާގައި އެ މަނިކުފާނަށް ވަރަށް ބޮޑަށް އަނިޔާވި އެވެ. އެކަމަކު އެ މައްސަލާގައި މިހާތަނަށް އިންސާފު ނުލިބި އޮތުމުން ޑިމޮކްރެޓްސްގައި ނުތަނަވަސްކަން އެބަ އޮތެވެ.

މި ހަމަލާގެ އަޑީގައިވާ އެއްވެސް ފަރާތެއް މިއަދާ ހަމައަށް ވެސް ނުހޯދި، އިންސާފު ގާއިމުނުވެ އަހަރުތައް ފާއިތުވެ ދިއުމުން ވަނީ ކަންބޮޑުވުން ފާޅުކުރައްވައިފަ އެވެ.

"ރޫޅާލީ މުޅި އެތީގެ ސޫރައާ ތޮބީއަތް ބަދަލުކުރި މީހުން،" އެމްޑީޕީ ސަރުކާރުގެ އިސްވެރިންނަށް ނިސްބަތްކުރައްވާ ވައްޑޭ ވިދާޅުވި އެވެ.

އެމްޑީޕީން އިސްތިއުފާ ދެއްވުމަށްފަހު، ނަޝީދު އިސްވެ އުފެއްދެވި ދަ ޑިމޮކްރެޓްސް އަށް ރަސްމީކޮށް ސޮއި ކުރައްވަން އާޓިފިޝަލް ބީޗު ސަރަހައްދުގައި ބޭއްވި ޖަލްސާގައި ނަޝީދު ވިދާޅުވީ އެމްޑީޕީ އުފެއްދުމުގެ މައިގަނޑު އަމާޒަކަށްވީ ހަރުދަނާ އުސޫލުތަކާއި ހަމަތަކެއްގެ ތެރެއިން ރައްޔިތުންގެ ހާލަތު ރަނގަޅު ކުރުން ކަމަށެވެ. އެކަމަކު އެ އުސޫލުތައް އެމްޑީޕީން ގެއްލުވާލުމުން، ޕާޓީ ދޫކުރައްވައި ޑިމޮކްރެޓްސް އުފައްދަވަން މަޖުބޫރުވި އެ ހަމަތައް ހިފެހެއްޓުމަށްޓަކައި ކަމަށެވެ.

"އެމްޑީޕީ ރޫޅާލާނަން. ރޫޅާނާލާން. ތި ކެޔޮގަނޑުގެ ފޫ ވައް ވެއްޓިއްޖެ. ތި ޕާޓީ އަޅުގަނޑުމެން ރޫޅާލާނަން. ރޫޅާލާނަން. ރޫޅާލާނަން. ރޫޅާލާނަން." އެ ޖަލްސާގައި ނަޝީދު ވިދާޅުވި އެވެ.

އެކަމަކު މި ފަހުން، ނަޝީދު ވަނީ ރާއްޖެ އާއި އެމްޑީޕީ އަދި ޑިމޮކްރެޓްސް އަށް ވެސް އެންމެ ރަނގަޅު ގޮތަކީ އެ ދެ ޕާޓީ ގުޅުން ކަމަށް ވިދާޅުވެފަ އެވެ. އޭގެ ފަހުން ޑިމޮކްރެޓްސްގައި އިސްކޮށް ތިއްބެވި ބައެއް ބޭފުޅުން ވަނީ އެމްޑީޕީއާ އަލުން ގުޅިވަޑައިގެންފަ އެވެ.

އެމްޑީޕީގެ ލީޑަޝިޕްގެ ގިނަ ބޭފުޅުންނާއި އާންމުންގެ ގިނަ ބަޔަކު އަދިވެސް ގަބޫލުކުރަނީ 2023 ގެ ރިޔާސީ އިންތިހާބުގައި އެ ޕާޓީ ބަލިވީ ނަޝީދުގެ ސަބަބުންނެވެ. އެއީ ޑިމޮކްރެޓްސް އިން އެ އިންތިހާބަށް ކެންޑިޑޭޓަކު ނެރެ، އެމްޑީޕީ ބައިބައި ކޮށްލުމުގެ ނަތީހާ ކަމަށް ގަބޫލުކުރާ މީހުން އަދިވެސް އެބަތިއްބެވެ.