މެމްބަރުންގެ މުސާރަ ކުޑަކުރަން ރަނގަޅީ އާ ދައުރަކާ ދިމާކޮށް: ފަލާހު

ރައްޔިތުންގެ މަޖިލީހުގެ މެމްބަރުންގެ މުސާރަ ކުޑަކުރަން އެންމެ ރަނގަޅު ގޮތަކީ، އާ ދައުރަކާ އެކު އެ މަސައްކަތްކުރުން ކަމަށް ޕީއެންސީގެ ޕީޖީ ލީޑަރު އިބްރާހިމް ފަލާހު ވިދާޅުވެއްޖެ އެވެ.

ފަލާހު މިހެން ވިދާޅުވީ މަޖިލިސް މެމްބަރުންގެ މުސާރަ ކުޑަކޮށް ކުރީގެ މެމްބަރުންނަށް ދޭ އިނާޔަތް ކަނޑާލަން ގޮވާލާ ޕެޓިޝަނެއްގައި ސޮއި ކުރަމުންދާ ދަނޑިވަޅެއްގަ އެވެ.

އެކްސްގައި ކުރެއްވި ޕޯސްޓެއްގައި ފަލާހު ވިދާޅުވީ، މެމްބަރުންގެ މުސާރަ ކުޑަކުރުމަކީ ގޯސް ހިޔާލެއް ނޫން ކަމަށެވެ. އެކަމަކު ނިމިދިޔަ 19 ވަނަ މަޖިލީހުގެ ދައުރުގައި އެމްޑީޕީގެ ސުޕަމެޖޯރިޓީ އޮވެ، އެ ދައުރު ނިމިގެން ދިޔައީ މެމްބަރުންގެ މުސާރަ އެއް ލައްކަ ރުފިޔާއަށް ބަދަލުކުރަން ކަމާ ގުޅުންހުރި ކޮމިޓީން ފާސްކޮށްފައި ކަމަށެވެ.

އޭނާ ވިދާޅުވި ގޮތުގައި އެކަން ބަދަލުނުކުރަން އޭރު ވެސް އިރުޝާދު ދެއްވީ ރައީސް ޑރ. މުހައްމަދު މުއިއްޒެވެ.

"އަޅުގަނޑުގެ ވިސްނުން ދަންނަވަން، މަޖިލީސް މެމްބަރުންގެ މުސާރައަށް ބަދަލުގެނައުން ރަނގަޅީ މަޖިލީސް ދައުރެއް ނިމި އާ ދައުރެއްގެ އިންތިހާބަށް،" އެކްސްގައި ކުރެއްވި ޕޯސްޓުގައި ފަލާހު ވިދާޅުވި އެވެ.

ފަލާހު ވިދާޅުވީ އާ ދައުރަކާ ދިމާކޮށް މެމްބަރުންގެ މުސާރައަށް ބަދަލު ގެންނަންވީ ސަބަބަކީ މަޖިލިސް އިންތިހާބަށް އެތައް މިލިއަން ރުފިޔާއެއް ހަރަދުކޮށްގެން ގޮނޑި ކާމިޔާބު ކުރާ ތަނުން މުސާރަ ކުޑަކޮށްފި ނަމަ، އިންތިހާބަށް ނެގި ދަރަނި އަދާކުރެވޭނެ ގޮތެއް ނޯންނާނެތީ ކަމަށެވެ.

އެހެންވެ، އޭނާ ވިދާޅުވީ، ދެން އޮންނަ އިންތިހާބަކާ ދިމާކޮށް މެމްބަރަކަށް 5000ރ. ގެ މުސާރައެއް ކަނޑައެޅިޔަސް އެ މުސާރައަށް ހިތްހަމަޖެހިގެން ކުރިމަތިލާ މެމްބަރުންނަށް، މުސާރަ ކުޑަކުރިޔަސް ކުރެވޭނެ ޝަކުވާއެއް ނޯންނާނެ ކަމަށެވެ.

މެމްބަރުންގެ މުސާރައާ އެކު އޭނާ ވަނީ ކުރީގެ ރައީސުންގެ އިނާޔަތްތަކާއި ފަނޑިޔާރުންގެ މުސާރައިގެ ކަންކަން ވެސް އެ ޕެޓިޝަނުގައި ހިމެނި ނަމަ، ރަނގަޅުވާނެ ކަމަށް ވެސް ވިދާޅުވެފަ އެވެ.

ޗޭންޖު.އޯގް ގައި އޮންލައިންކޮށް ސޮއިކުރަން ފަށާފައިވާ އެ ޕެޓިޝަނުގައި ވަނީ އިގްތިސާދަށް މާލީ ގޮތުން ބޮޑު ބުރައެއް ކުރިމަތިވެފައިވާ މި ދަނޑުވަޅުގައި މެމްބަރުންނަށް ދޭ ބޮޑު މުސާރަ އާއި ކޮމިޓީ އެލަވަންސް އަދި ޕްރިމިއަމް ހެލްތު އިންޝުއަރެންސަކީ ކަންބޮޑުވާ ކަމެއްގެ ގޮތުގައި ފާހަގަކޮށްފަ އެވެ.

މެމްބަރުންނަށް މުސާރައިގެ ގޮތުގައި މަހެއްގެ މައްޗަށް 62،000ރ. އަދި ކޮމިޓީ އެލަވަންސްގެ ގޮތުގައި 20،000ރ. އާ އެކު މަހެއްގެ މައްޗަށް 82،500ރ. ލިބެ އެވެ.

ރައްޔިތުންގެ މަޖިލީހުގެ އިމްތިޔާޒްތަކާއި ބާރުތަކުގެ ގާނޫނުގެ ދަށުން މަޖިލީހުގެ ކުރީގެ މެމްބަރުންނަށް ހިދުމަތުގެ އިނާޔަތުގެ ފައިސާ ދޫކުރަން ފެށީ ޖޫން، 2014 ގަ އެވެ. އެ ގާނޫނުގެ ދަށުން ކުރީގެ މެމްބަރުންނަށް މާލީ އިނާޔަތް ދެނީ މަޖިލީހުން ވަކިވުމަށް ފަހު އަދި އެ މެމްބަރަކަށް 55 އަހަރު ފުރުމުންނެވެ. އެއް ދައުރު އަދާކޮށްފައިވާނަމަ މުސާރައިގެ 30 ޕަސެންޓް އަދި ދެ ދައުރު އަދާކޮށްފައިވާ މެމްބަރުންނަށް މުސާރައިގެ 45 ޕަސެންޓް ހިދުމަތުގެ އިނާޔަތުގެ ގޮތުގައި ލިބެ އެވެ.

ޕެންޝަން އޮފީހުން މިދިޔަ ޑިސެމްބަރު މަހު ހިއްސާކުރި މައުލޫމާތުތަކަށް ބަލާއިރު، ކުރީގެ މެމްބަރުންގެ އިނާޔަތަށް ފާއިތުވި 10 އަހަރުގެ ތެރޭގައި ވަނީ 33.8 މިލިއަން ރުފިޔާ ހޭދަކޮށްފަ އެވެ. އަދި މިދިޔަ އަހަރު އެކަނި ވެސް 6.4 މިލިއަން ރުފިޔާ އެކަމަށް ހަރަދުކުރި އެވެ.