ދިރިއުޅުމުގެ ކާމިޔާބު ދަތުރެއްގެ ހުންގާނުގައި އަނބިމީހާ

ކުޑަކުޑަ ދޯންޏެއްގެ ހުންގާނުގައި ހިފައިގެން އުމުރުން 66 އަހަރުގެ ރަޝީދާ ހުސައިން ދ. ބަނޑިދޫގެ ފަޅަށް ވަންނަނީ އެވެ. އޭރު އޭނާގެ ފިރިމީހާ އަބްދުﷲ، 64، ދިޔައީ ދޯނީގެ ކުރީކޮޅުގައި ހުރެގެން ދޯނި ބާއްވަންވީ މިސްރާބު ދައްކަމުންނެވެ.

އެ ދެމަފިރިން އައީ ބަނޑިދޫ ކައިރީ އޮންނަ ފަޅަކުން ވެލި ނަގައިގެންނެވެ. ބަނދަރާ ދޯނި ގާތްވުމުން، ދެ މީހުން އެކުގައި އޭގައި ހުރި ވެލިބަސްތާތައް ނަގައި ބަނދަރު މައްޗަށް ބާލަން ފެށި އެވެ. މިއީ ދެތިން ހާސް ގޯނި ވެއްޔަށް ބަޔަކު ދިން އޯޑަރަކަށް ކުރި ދަތުރެކެވެ. މިއީ ދެމަފިރިން އާމްދަނީ ހޯދާ އެއް މަގެވެ. ގޯންޏަކަށް 10ރ. ގެ ރޭޓުން ވިއްކައިގެން ރަނގަޅު އެއްޗެއް ލިބެ އެވެ.

މި މަސައްކަތް ފެށީ މީގެ އަހަރެއްހާ ދުވަސް ކުރިންނެވެ. އެކަމަކު ބޮއްކުރާގައި ފަލި ޖަހާފައި މަހަށް މި ދެމަފިރިން ނުކުންނަތާ ތިން އަހަރު ވެއްޖެ އެވެ. މި މަސައްކަތްތައް ދެ މީހުން އެކުގައި ފެށީ، ކަކުލުހުޅުގައި މައްސަލަ ޖެހި، އަބްދުالله ކަންނެއްޔަށް ދިއުން އެއްކޮށް ހުއްޓާލައި ރަށުގައި މަޑުކުރަން ޖެހުމުންނެވެ.

މޫސުން ރަނގަޅު ނަމަ ފަތިސް ނަމާދުކުރާ ގޮތަށް ކޮންމެ ދުވަހަކު ވެސް ދެމަފިރިން އެކުގައި ވެއްޔަށް ދެ އެވެ. މައިގަނޑު ގޮތެއްގައި ރަޝީދާގެ މަސައްކަތަކަށް އޮންނަނީ ނަގިލި އެއްލާފައި ވަލަށް ދެމުމާއި ވެލި ބަސްތާތައް ދޯނީގައި ރީއްޗަށް އެތުރުން ކަހަލަ ކަންކަމާއި ބަނޑުހައިވެގެން ފިރިމީހާ ބުނެފިއްޔާ ކާނެ އެއްޗެއް ދިއްކޮށްލުން ކަހަލަ ކަމެކެވެ.

"ފިރިމީހާ މޫދަށް ފައިބާނީ. އަހަރެން ދޯނީގައި ހުރެގެން އަތްގާތްކޮށްލަދޭން ދަނީ. އޭނާ ބަނޑުހައި ވެއްޖެއްޔާ އެއްޗެއް ދިކޮށްލަދީ، ވަލަށް ދަމާއި ބަސްތާ އެތުރުން ކަހަލަ ކަންކަން ކޮށްލަދެނީ. އޭރުން އޭނަ އެކަންޏެއް ނުވާނެއެއްނު،" ބަނޑިދޫ ކަައިރީ އޮންނަ ތިން ފަޅަކުން ވެލި ނަގާ ރަޝީދާ ބުންޏެވެ.

އެކަންކަމުގެ އިތުރުން ދޯނި ދުއްވުމާއި ނެރުން ވަދެ ނިކުމެ ހެދުން ކަހަލަ ކަންކަން ވެސް އޭނާއަށް އެނގެ އެވެ.

"އޭނާ [ފިރިމީހާ] ކޮންމެ ކަމެއް ކުރިއަސް ހުންގާނު ބަލަހައްޓަން ޖެހޭނެ. ރޭގަނޑު ވެސް ދަން ހުންގާނު ހިފައިގެން. މުށިމަހަށް ދާއިރު ވެސް އޭނާ ނަނުލައި ބަރިލާ ހަދަން ދެން ހުންގާނުގައި ހުންނާނީ. ހަމަ އެގޮތަށް ދަތުރު ގޮސްގެން ދަސްކުރީ،" ނުވަ ކުދިންގެ މަންމަ، ރަޝީދާ ބުންޏެވެ.

ވެލި ނަގައިގެން އަންނަ ގޮތަށް ވެސް ހުއްޓާނުލައި މި ދެމަފިރިން އުޅެނީ އެކި މަސައްކަތްތަކުގަ އެވެ.

ރަޝީދާއަކީ ކުރިން ފަންގި ވިޔެ، ބޮނބި ތަޅައި ރޯނު ވަށައިގެން ވެސް ވިއްކި އެވެ. އެކަަމަކު އަތް އައްސިވެ، ދަންވަރަށް ނިދަން އުނދަގޫވެގެން އުޅޭތީ މިހާރު އެ މަސައްކަތް ކުރަން ފިރިމީހާ ހުއްދައެއް ނުދެ އެވެ.

އެހެންވެ، ވެއްޔަށް ދިއުމުގެ އިތުރުން ކޮންމެ ދުވަހެއްގެ ރޭގަނޑާ ދިމާކޮށް އެ މީހުން މަހަށް ވެސް ދެ އެވެ. އެހެން ގޮސް ލިބޭ މަސްކޮޅު، ގޭގައި ކައްކައިގެން، ރިހާކުރަށް ވެސް ހަދަނީ ދެމަފިރިން، އެކަކު އަނެކަކަށް އަތްގާތް ކޮށްދީގެންނެވެ.

"ރިހާކުރު ފުޅިއެއް 300ރ. އަަށް ވިއްކަނީ މި ރަށުގައި. ދެން މާލެއަށް މީހަކު ފޮނުވަން ބުނެފިއްޔާ ވެސް ފޮނުވައިދޭން ލާރި ފޮނުވީމަ،" އޭނާ ބުންޏެވެ.

އެ ކަންކަމުގެ އިތުރުން އަބްދުالله އަކީ ސްކޫލުގެ ސެކިއުރިޓީ ބަލަހައްޓާ މީހެކެވެ. އެކަމުން ވެސް އެ މީހުންނަށް 5،000ރ. ލިބެ އެވެ.

"ދެން މަހަށް ގޮސްގެންނާއި ވެލި ނަގައިގެން ވެސް ލިބޭ މޫސުން ގޯސް ނޫނިއްޔާ 15،000ރ. އަނެއްކާ 65 އަހަރުވީމަ ލިބޭ އެލަވަންސް ވެސް އަޅުގަނޑަށް މިދިޔަ އަހަރު ލިބެން ފަށައިފި. އެހެންވީމަ ދިރިއުޅުން ދައްޗެއް ނޫން." އޭނާ ބުންޏެވެ.

ބުރަ މަސައްކަތްތައް ކޮށްގެން ދެ މީހުންނަށް ރަނގަޅު އާމްދަނީއެއް ލިބިއްޖެ އެވެ. އެންމެ މުހިއްމު ކަމެއްގެ ގޮތުގައި ހައްޖުގެ އަޅުކަމަށް މިހާރު ފައިސާ ދައްކައިފި އެވެ. ކުޑަ ޑިންގީއެއް ގަނެފި އެވެ. އެންމެ ހަގު ދަރިފުޅުގެ އެހީއާ ވެސް އެކު ޑިންގީއެއް ގަނެފައިވާއިރު މިއީ މަސް ދަތުރުތަކަށް ލިބުނު ވަރަށް ބޮޑު ލުޔެއް ކަމަށް އޭނާ ބުންޏެވެ.

"ދެން ހަމަ ދުރު ތަނެއް ވިޔަސް ދާންވީތާ މަސް ބާނަން. ވަރަށް ބޮޑަށް ދަތުރު ފަސޭހަވާނެ."

ރަޝީދާ އާއި އަބްދުالله ގެ ދިރިއުޅުމުން ފެންނަނީ އުމުރުން ދުވަސްވިޔަސް ލޯތްބާއި އެކަކު އަނެކަކަށް އޮތް އަޅާލުމާއި އޯގާތެރިކަމެކެވެ. ދެ މީހުން އެކަކު އަނެކަކަށް ވީވަރަކުން އެހީވެ ދިރިއުޅުން ފަސޭހަކޮށްދެ އެވެ.

"ގޭތެރޭގެ ކަންކަން ވެސް ދެ މީހުން ކުރަނީ. އޭނާ މަސް ކަނޑާނެ. ދައްތަ، މަސް ކައްކަން ހުޅުލާ ހުރިހާ ކަމެއް ކުރާނީ. ދަރުބަލާ ވެސް ފަޅު ރަށަށް ދަނީ ދެ މީހުން އެކީގައި. ހުރިހާ ކަމެއް ވެސް ކުރަނީ ދެ މީހުން،" ރަޝީދާ ބުންޏެވެ.

ނ. މަނަދޫ، އަބްދުالله އަކީ މީގެ އެތައް އަހަރެއް ކުރިން އެ ރަށަށް މައްސަލައެއްގައި އަރުވާލި މީހަކަށް ވިޔަސް ރަޝީދާގެ ފުރަތަމަ ކައިވެންޏަށް ލިބުނު ފަސް ކުދިންނަށް ވެސް ބައްޕައަކީ އެއީ އެވެ. އެހާ ވެސް ރަނގަޅެވެ.

މިހާރު އެ މީހުންގެ ކައިވެންޏަށް 35 އަހަރު ވެފައިވާއިރު އެ ކައިވެންޏަށް ހަތަރު ކުދިން އެބަ ތިއްބެވެ. ކުދިން ވެސް އެހާ ގުޅެ އެވެ.

"މިހެން ދާތީ މަލާމަތް ވެސް ކުރޭ މީހުން. އެކަމަކު އެއީ އަހަންނަށް މާބޮޑު ކަމެއް ނޫން. މީހުން ކިޔައި އުޅޭ ދަރިން ބޮޑުވެ، 66 އަހަރު ވީމަ ވެސް ކޮބާހޭ ބޭނުމެއް ތިހެން އުޅުމުގެ،" ރަޝީދާ ކިޔައިދިނެވެ.

"އަހަންނަށް މި މަސައްކަތުން ލިބެނީ ހިތްހަމަޖެހުމެއް. އެހެން ތަންތަނުގައި މީހުންގެ މުޅަމަސް ކައި މީހުންގެ ބަދުނާމުކުރަން ވާހަކަ ދައްކާ ހެދުމަށް ވުރެ ރަނގަޅެއްނު މިހެން އުޅުން."