ކުއްލިއަކަށް ބިކަވެ ދަރިފުޅުގެ އިންތިޒާރުގައި

އެންދަމަށް މ. އަތޮޅަށް ގޮސް އޮތް ދޯނީގެ ފާހާނާގައި އޭނާ ހުރީ ވަރަށް ހަމަޖެހިލައިގެން ފެންވަރާށެވެ. ކުއްލިއަކަށް ކަނާތާއި އެއް ފައިން ވާގި ދޫވެ ފާހާނާތެރެއަށް ވެއްޓުނީ އެވެ.

އަލީ ނަސީރު (އައްޔަ) އޭނާގެ އުފަން ރަށް ދ. މާއެނބޫދޫގައި ބިނާކުރަމުން ދިޔަ އުފާވެރި، ތަނަވަސް ދިރިއުޅުން އެ ހިސާބުން ހުއްޓުނީ އެވެ. އުމުރުން 46 އަހަރުގައި އޭނާއަށް ޖެހުނީ ސްޓްރޯކެކެވެ.

އޭގެ ކުރިން އައްޔައަކީ ސޮނެވާ ގިލީގައި ރޫމްބޯއީއަކަށް އުޅުނު މީހެކެވެ. ރަނގަޅު އާމްދަނީއަކާ އެކު އުޅުނީ އުފާވެރި، ހިތްހަމަޖެހޭ ވަރުގެ ދިރިއުޅުމެކެވެ.

އިންޑިއާ މީހަކާ ކައިވެނި ކޮށްގެން، މިހާރު އުމުރުން 18 އަހަރުގެ އަންހެން ކުއްޖަކު ވެސް ހުރިއިރު ރިސޯޓުން ލިބޭ ކޮންމެ ޗުއްޓީއެއްގައި އޭރު އާއިލާގެ ގާތަށް ގޮސް އުޅުނެވެ. އަނބިދަރިންގެ ހަރަދުތައް ފަސޭހަކަމާ އެކު ބަލަހައްޓަމުން ދިޔަ އެވެ. އައްޔަ އަކީ އޭނާގެ އާއިލާގެ އެންމެ ހަގު މީހާއަށް ވިޔަސް ޒިންމާދަރުކަމާ އެކު އެ އާއިލާ އަށް ވެސް އަޅާލުން ދިނެވެ.

މި ދިރިއުޅުން އިތުރަށް ފުރިހަމަކުރުމަށް، މެދުނުކެނޑި ރިސޯޓުގައި 15 އަހަރު އަދާކުރި ވަޒީފާ ދޫކޮށްލައި ރަށަށް ބަދަލުވީ ދެ މިލިއަން ރުފިޔާގެ ލޯނެއް ނަގައި، ބޮޑު މަސްދޯންޏެއް ބަނދެ އެ ދުއްވަމުންނެވެ. އައްޔަގެ ދިރިއުޅުން އެކޮޅުކޮޅުން ޖެހުނީ އޭގެ ތިން އަހަރެއްހާ ދުވަސް ފަހުންނެވެ.

"މަހަށް ގޮސް ހުއްޓާ ފާހަނަ ތެރެއަށް ވެއްޓުނީ [ސްޓްރޯކެއް] ޖެހިގެން. ޖެހުނު ގޮތަށް ހޭ ނެތުނީ. ނޭނގޭ ކިތައް ދުވަސް ކަމެއް ހޮސްޕިޓަލުގައި ވެސް. އެ ހިސާބުން މުޅި ދިރިއުޅުން ބަދަލުވަނީ. ދަރި އާއި އަންހެނުންނާ ގެއްލި،" މީގެ ހަ އަހަރު ކުރިން ޖެހުނު ސްޓްރޯކުގައި ހަޔާތް ބަދަލުވި ގޮތުގެ ވާހަކަ އޭނާ ފެށީ ވެސް ރޮމުންނެވެ.

"ދެން އެ ހިސާބުން ހުރިހާ ރައްޓެހިން ވެސް ގެއްލި. މިހާރު ވަރަށް ހާލުގައި މި އުޅެނީ،"

ސްޓްރޯކަށް އައިޖީއެމްއެޗުގައި ދިން ފަރުވާއަށް ފަހު، އޭނާ އިތުރު ކުރިއެރުން ލިބޭތޯ ތެޔޮ ދެމުން ފަދަ އެކި ފަރުވާތައް ވެސް ހޯދި އެވެ. ފަހުން ރަށުގައި ދުވަސްތަކެއް ވަންދެން ހުރުމަށް ފަހު، އިންޑިއާ އަށް ގެންގޮސްގެން ވެސް ފަރުވާކުރި އެވެ. އެކަމަކު އަވަހަށް، ރަނގަޅު ފަރުވާއެއް ނުދެވި ހުރުމުގެ ސަބަބުން، ހިނގައި އުޅުމުގައި އޭނާ އަށް ވަރަށް އުނދަގުލެވެ.

"ނިލަންދޫގައި ތެޔޮ ދެމިން. ދެން އައިސް [މާއެނބޫދޫގައި] މޫދަށް އެރުނީ. އިންޑިއާގައި ވެސް ދެތިން މަސް ދުވަސް ވަންދެން ފަތްޕިލާވެލީގެ ބޭސް ކުރީ. ކޮށްގެންވީ ވަރު މިއީ،" ހަ މަސް ދުވަސް ވަންދެން ދިން ފަރުވާތައް އޭނާ ކިޔައިދިނެވެ.

"އެއްފަޅި އެއްކޮށް ވާގި ދިޔައީ. ހިނގައި އުޅެވޭ ގޮތަކަށް މިހާރު. އެކަމަކު އިތުރު ކަމެއް ނެތް."

އައްޔަ ބުނިގޮތުގައި ސްޓްރޯކް ޖެހުމުގެ ކުރިން އޭނާގެ ހަކުރާއި ލޭ މަތިކަން އެނގިފައިވެ އެވެ.

"ރިސޯޓުގައި އުޅުނުއިރު ސިނގިރޭޓު ބުއިން. އާދައިގެ ގޮތަކަށް ސައި ކޮފީ އޮންނާނެ ދެން. ހަމަ ޓައްކިޔާފައި ޖެހުނީ. އޭރު ހަކުރާއި ލެޔާއި ހުރީ މަތީގައި. އެކަން އެނގޭ. އެހެން ހުއްޓާ ދޯނީގައި ހުއްޓާ ހަމަ ޖެހުނީ."

އައްޔަ ބުނީ ސްޓްރޯކް ޖެހުނު ވަގުތު އަތާއި ފައިގެ ބާރު ދޫވެ ވެއްޓުނުކަން އެނގޭ ކަމަށާއި އެ ވަގުތު ހަޅޭއްލަވައިގެންފައި ފާހާނާގެ ދޮރުގެ ތަޅުގައި ހިފާލެވުނުކަން އެނގޭ ކަމަށެވެ. ދެން އޭގެ ފަހުން ވީ އެއްވެސް ކަމެއް ނޭނގެ އެވެ.

އެކަމަކު އެ ހުރިހާ ކަމަކަށް ވުރެ އައްޔަގެ ހިތްދަތިކަމަކީ ބަލިވިތާ ކުރީކޮޅު އެންމެންގެ ފަރާތުން ލިބުނު އޯގާތެރިކަމާއި އަޅާލުން މިހާރު ނުލިބުމެވެ. އެ ހިތްދަތިކަމުގައި އޭނާ ގުނަން ޖެހޭ ދުވަސްތައް އިތުރުވެ، މަޑުމަޑުން މީހުންގެ ލޯބި ފަނޑުވީ އެވެ.

"ދެން ގިނަ ދުވަސް ވަންޏާ މީހުން ވެސް އޮޓޮއިން ބަދަލުވޭދޯ. އެގޮތަށް ގޮސް އަޅާލާ މީހުން ހަމަ އެއްކޮށް ގޮސް މަދުވެއްޖެ،" އުމުރުން މިހާރު 52 އަހަރުގެ އަލީ ބުންޏެވެ.

"އެއް ބަޔަކު ވިސްނީ ނުކުޅެދޭ މީހެއްގެ ހާލުގައި މީނަ އޮންނާނީއޭ. ވާނުވާ ނޭނގި ހޮސްޕިޓަލުގައި ތިބީ. އަނެއް ބަޔަކު ވިސްނާނީ މީނަ ދެން މި ދިޔައީއޭތާ."

އަލީގެ ހަޔާތަށް އައި ބޮޑު ރާޅާ އެކު އޭނާއަށް އާމްދަނީ ލިބޭނެ ގޮތްތައް ހުސްވެއްޖެ އެވެ. ދުއްވަމުން އައި ދޯނީގެ މަސައްކަތްކުރާނެ އާއިލާ މީހަކު ނެތި ދޯނި ފަޅުގައި އޮވެ ވީރާނާ ވަނީ އެވެ. އެއިން އާމްދަނީ ލިބޭނެ ގޮތެއް ނެތެވެ.

ނުކުޅެދުންތެރިކަން ހުންނަ މީހުންނަށް ސަރުކާރުން ދޭ 3،000ރ. އޭނާ އަށް ވެސް ލިބެ އެވެ. އިންޑިއާގައި ހުރި ދަރިފުޅު ނާސިން ކިޔަވަމުން ދާއިރު އެ ހުރިހާ ފައިސާއެއް ފޮނުވަނީ ދަރިފުޅަށެވެ. އެކަމަކު އެއިން 200 ޑޮލަރު ވެސް ހަމައެއް ނުވެ އެވެ.

އައްޔަ ބުނީ ސަރުކާރުން ދޭ ފައިސާ އިތުރުކޮށްދޭން އެދި ހުށަހެޅި ކަމަށާއި އެކަމަކު އޭނާގެ ބެލެނިވެރިންގެ ގޮތުގައި ފޯމުގައި ޖެހި ދެ މީހުން ވެސް ޖަވާބެއް ނުދީގެން އެ ފޯމު ރިޖެކްޓް ވެފައިވާ ކަމަށް ވަނީ އަންގައިފަ އެވެ.

ރިސޯޓުގައި މަސައްކަތްކުރި ދުވަސްވަރު އައްޔަ އެއްކުރި ފައިސާ އާއި ސުނާމީގައި ގެއްލުންވި އާއިލާތަކަށް ދިން ފައިސާގެ އިތުރުން އޭނާގެ ބައްޕަގެ ފައިސާގައި، އެ މީހުން މާއެނބޫދޫގައި ދިރިއުޅޭ ގެ ހުރީ ރީއްޗަށް ދެ ބުރިއަށް ހަދައިފަ އެވެ. އައްޔަން ބުނީ އާއިލާގެ އެހެން މީހުންނަށް ގޯތި ލިބި ވަކިން އުޅެމުން އަޔަސް، ބައްޕަގެ ގޭގައި ހަދާފައި ހުރި ތަން ކުއްޔަށް ދީގެން ވެސް އާމްދަނީއެއް ލިބެން ނެތީ އެގޮތަށް އެންމެން އެއްބަސްނުވާތީ ކަމަށެވެ.

އައްޔަގެ އަނބިމީހާއަކީ ވެސް ތަނަވެސް މީހަކަށް ނުވާތީ އޭނާ ކައިރިއަށް އިންޑިއާ އަށް ގޮސްގެން ވެސް ބެލޭނެ ގޮތެއް ނެތެވެ. އެކަމަކު އޭނާގެ ދަރިފުޅު ކިޔަވައިނިމިގެން ރާއްޖެ އަށް އައިސް ވަޒީފާ އަދާކުރަން ހުންނާނެ ކަމަށް ބުނާތީ އައްޔަގެ ކުޑަނަމަވެސް އުންމީދެއް އެބަ އޮތެވެ.

އައްޔަ ބުނީ ހަޔާތުގައި އެންމެ އުނދަގޫ ވަގުތުގައި ވެސް ދެގޮތެއް ނުވެ ތިބީ ދެތިން ރައްޓެހިން ކަމަށެވެ.

އޭނާއަށް އާމްދަނީ ލިބޭނެ ގޮތެއް ހޯދައިދޭން އެ މީހުންގެ ގެއާ އިންވެެގެން ހުރި ކުޑަކުޑަ ތަންކޮޅެއްގެ ތެރޭގައި ކޮފީ އާއި ހެދިކާ ވިއްކޭނެ ގޮތެއް ހޯދައިދޭން އެ މީހުން އަންނަނީ މަސައްކަތް ކުރަމުންނެެވެ. އެއީ އެތަނުގައި އިނދެ އޭނާއަށް އެކަނި ކޮށްލެވޭނެ ކަމެކެވެ.

މިއީ ކުޑަ އާމްދަނީއެއްގެ އިތުރުން އައްޔަ އަށް ކުޑަ ކަސްރަތެއް ލިބޭނެ ކަމެއްގެ ގޮތުގައި ވިސްނައިގެން އެ މީހުން ކޮށްދޭ ކަމެކެވެ.

އަބަދު މަސައްކަތުގައި ހަރަކާތްތެރިކޮށް އުޅުނު އައްޔަަށް މިހާރު އޮތީ ފޫހި ދިރިއުޅުމެކެވެ. އެ ދެ ރައްޓެހިން ނެތް ނަމަ ކުރާނެ ކަމެއް ރަށުގައި ނޯވެ އެވެ. ވާހަކަ ދައްކާލައި ސަކަރާތް ޖަހާލާނެ މީހަކު ނެތެވެ. އެކަހަލަ ކޮންމެ ދުވަހަކު ކުޑަކޮށް ހިނގާލާފައި ދެން ގޮސް އޮވެވެނީ ހިތްދަތި ފިކުރެއްގެ ތެރޭގަ އެވެ.

"އެކަމަކު އެތަން [ކޮފީ ވިއްކާ ތަން] ހެދީމާ ރައްޓެހިން ވެސް އައިސް ދިމާވާނެތާ. ފައިސާ ވެސް ލިބޭނެތާ ކޮންމެވެސް ވަރަކަށް. ދެން އަހުމަދިއްޔާގައި ކިޔެވިއިރުގެ ރައްޓެއްސެއް ބުނި އޭނާ މިތަނަށް ބޭނުންވާ ބައެއް އެއްޗެހި ހޯދައިދޭނަމޭ." އެ ދެތިން ރައްޓެހިންނަށް ތައުރީފު ކުރަމުން އޭނާ ބުންޏެވެ.

މި އެކަނިވެރިކަމުގައި ވެސް އައްޔަ އަށް ލިބޭ ހިތްވަރަކީ އޭނާގެ ދަރިފުޅު އޭނާގެ ކައިރިއަށް އައުމެވެ. އެ ދުވަހެއް މިންވަރު ކުރައްވާތޯ އޭނާ ހުރީ އުންމީދުގަ އެވެ.