އޭނާއަށް ހޭލެވުނީ އައިސީޔޫގައި އޮއްވަ އެވެ. އެ އޮވެވެނީ ކޮންތާކު ކަމެއް، އެ ތަނަށް ދެވުނީ ކިހިނެއް ކަމެއް ވެސް ނޭނގެ އެވެ. އޭގެ ކުރިން ވީ އެއްވެސް ކަމެއް ހަނދާނަކު ނެތެވެ.
16 މާޗް 2025
އޭނާއަށް ހޭލެވުނީ އައިސީޔޫގައި އޮއްވަ އެވެ. އެ އޮވެވެނީ ކޮންތާކު ކަމެއް، އެ ތަނަށް ދެވުނީ ކިހިނެއް ކަމެއް ވެސް ނޭނގެ އެވެ. އޭގެ ކުރިން ވީ އެއްވެސް ކަމެއް ހަނދާނަކު ނެތެވެ.
މުހައްމަދު ފިރުޝާނަށް އޭރު ވާނީ 17 އަހަރެވެ. އެއީ، ފުރާވަރުގައި، އޭނާ އެންމެ ހަރަކާތްތެރިކޮށް އުޅުނު ދުވަސްވަރެވެ. މިޒާޖުގެ ގޮތުން އެއީ ވަރަށް ސިޔާސަކޮށް އުޅުނު މީހެކެވެ. އެހެންވެ، ވަރަށް ގިނައިން ރަށްޓެހިންނާ އެކު ހީސަމާސަކޮށް، ސަކަރާތް ޖަހައި ހަދަ އެވެ. ހަމަ އާދައިގެ މަތިން އެހެން އުޅުނު ދުވަހެކެވެ.
އެކަމަކު، އެ ދުވަސްވީ އޭނާގެ މުޅި ދިރިއުޅުން ބަދަލުކޮށްލި ދުވަހަށެވެ.
މުހައްމަދު ފިރުޝާން: މަސްނޫއީ ފަޔެއް ޖަހާފައިވާ ފިރުޝާން ގައްދޫގެ މަގުމަތީގައި ހިނގާފައި ދަނީ.-- ފޮޓޯ: ފަޔާޒް މޫސާ | މިހާރު
ގދ. ގައްދު އަށް އުފަން، މިހާރު އުމުރުން 21 އަހަރުގެ ފިރުޝާނަކީ އޭރު މަސްވެރިއެކެވެ. ސްކޫލް ނިންމި ގޮތަށް އޭނާ އާމްދަނީ ހޯދީ އެ މަސައްކަތުންނެވެ.
މަހަށް ދާ ދޯނި އެހެލާފައި އޮތުމުން މަހަށް ނުދެވި ރަށުގައި ހުރި އެ ދުވަހު، ރަށްޓެހިންނާ އެކު މަޖާކޮށްލަން ދިޔައީ ގައްދޫ ކައިރީގައި އޮތް ފަޅުރަށަކަށެވެ. އެއީ ގައްދޫ ކައިރީގައި އޮންނަ ލޮނަދޫހުއްޓާއަށެވެ. ކުރިން ރިސޯޓެއްގައި ގޮތުގައި ހަދަމުން އައިސް، މަސައްކަތް ހުއްޓިފައި އޮތް ރަށެކެވެ.
އަށެއްކަ ރަށްޓެހިންނާ އެކު، އެ ރަށަށް ދަތުރު ގޮސް، އެ މީހުން ތިބީ ވަރަށް ބޮޑަށް ވީރާނާވެފައި ހުރި މޫދު ކޮޓަރިއެއްގަ އެވެ.
އެ ތަނުގައި ތިބެ، ސަކަރާތް ޖަހަން އުޅުމުގެ ތެރޭގައި ހޮޅިބުރިތަކެއް ނަގައި، އެ މީހުން ކޮންކްރީޓުގަނޑުގައި ތަޅަން ފެށި އެވެ.
"އެއް ފަހަރު އަޅުގަނޑު ޖެހި ހަނދާންވޭ، އެ ފަހަރު އެތަނަކާ ލައްވާ ނުލާ ދިޔައީ. ދެވަނަ ފަހަރަށް އަޅުގަނޑު ޖެހީ، ދެން އަޅުގަނޑަކަށް ނޭނގޭ ވީގޮތެއް،" ހަނދާން ހުރި ވަރަކުން ފިރުޝާން ކިޔައިދިނެވެ.
"ހަނދާންވާ ގޮތުން ވެއްޖިއްޔާ އަޅުގަނޑު ހޭ އެރި އިރުގައި އޮތީ އޭޑީކޭގައި،"
"ސީދާ ކަންވީ ގޮތް ވެސް އެނގުނީ ފޯނު އަތަށް ލިބުނީމަ. ފޯނު އަތަށް ލިބިގެން ފޭސްބުކަށް ވަނުމުން، އެ ހިސާބުން އެނގުނީ ފައި ވެސް ބުރިކޮށްލާފަކަން އޮތީ."
މުހައްމަދު ފިރުޝާންގެ ފައި: ކަނާތު ފައި ބުރިކޮށްލަން ޖެހުމުން އޭނާ ހުންނަނީ މަސްނޫއީ ފަޔެއް ލައްވައިފައި.-- ފޮޓޯ: ފަޔާޒް މޫސާ | މިހާރު
ފައި ބުރިކޮށްލާފައި އޮތްކަން އެނގުނު ވަގުތު އޭނާއަށް ރޮވުނެވެ.
ހޮޅިބުރިން ޖެހި ގަޑީގައި، ކޮންކްރީޓާއި ދަގަނޑުން ހަދައިފައި ހުރި އެ ބާ ސީލިންގު އޭނާގެ ގައިމައްޗަށް ވެއްޓުނީ އެވެ. އެހެން ކުދިންނަށް އަނިޔާއެއް ނުލިބި ސަލާމަތްވި އެވެ.
ސީލިންގު ވެއްޓި އެންމެ ބޮޑަށް ޒަހަމްވީ ފިރުޝާންގެ ކަނާތު ފަޔެވެ. އިމަޖެންސީގައި މާލެ ގެނެސް، އޭޑީކޭގައި އޮޕަރޭޝަންކޮށް، ކަކޫ ހުޅަށް ވުރެ މަތިން އެ ފައި ބުރިކޮށްލި އެވެ. ފައި ބުރިކޮށްލުން ނޫން އިތުރު ގޮތެއް ނެތިގެންނެވެ. އިތުރު ފަރުވާއަށް އޭޑީކޭގެ އައިސީޔޫގައި މަހެއްހާ ދުވަހު އޮންނަން ޖެހުނެވެ.
އެ ހާދިސާގައި ފިރުޝާނަށް ވަރަށް ބޮޑެތި އެހެން އަނިޔާތައް ވެސް ލިބުނެވެ. ކޮނޑުހުޅު ބިންދައިގެން ދިޔަ އެވެ. އަދި މޭ ކަށިގަނޑުގެ ބައެއް ވެސް ބިންދައިގެން ދިޔަ އެވެ. ބޮލަށް ވެސް ކޮންމެވެސް ވަރަކަށް އަނިޔާވި އެވެ.
ކޮންކްރީޓުގަނޑު ވެއްޓި ލިބުނު އަނިޔާގައި މުހައްމަދު ފިރުޝާންގެ ކޮނޑުހުޅަށް ލިބުނު އަނިޔާ: އެ ހާދިސާގައި ކޮނޑުހުޅު ބިންދައިގެން ދިޔަ.-- ފޮޓޯ: ފަޔާޒް މޫސާ | މިހާރު
އެއީ މީގެ ހަތަރު އަހަރު ކުރިން ހިނގި ކަމެކެވެ.
މިހާރު އޭނާ މަސްނޫއީ ފަޔެއް ޖަހައި، އުޅުމުގައި އާންމު މީހެކޭ އެއްވެސް ތަފާތެއް ނެތެވެ. މާޒީން ފިލާވަޅު ލިބި، ވަރަށް ހިތްވަރުކޮށް، އަމިއްލަ ފައިމައްޗަށް ތެދުވެ، ރަނގަޅު ދިރިއުޅުމެއް ވެސް ފަށައިފި އެވެ.
ކޮންކްރީޓުގަނޑު ވެއްޓި ބޮލަށް ލިބުނު އަނިޔާގެ ނިޝާނެއް ފިރުޝާންގެ ނިތްކުރިމަތީގައި.-- ފޮޓޯ: ފަޔާޒް މޫސާ | މިހާރު
ފިރުޝާނަކީ މިހާރު ގައްދޫ ފެނަކަ އިންޖީނުގޭގެ ޓެކްނީޝަނެކެވެ. ކައިވެންޏެއްކޮށް މިހާރު ތިންމަހުގެ ތުއްތު ކުއްޖަކު ވެސް އެބައޮތެވެ.
"މިހާރު ހުރިހާ ކަމެއް އަނެހެން އޯކޭ. ފައި ވެސް ޖަހާފައި މީނީ، ވަރަށް ގިނަ މީހުންގެ އެހީ އާއި ސަޕޯޓް ލިބުނު،" އޭނާ ބުންޏެވެ.
ފިރުޝާނަށް މިހާރު ދަތިވާ މާ ބޮޑު ކަމެއް ނެތެވެ. އާދައިގެ މީހެކޭ އެއްގޮތަށް ހެލިފެލިވެ އުޅެވެ އެވެ. އެކަނި ހިނގާވެބިނގާވެ އުޅެވެ އެވެ. ސައިކަލު ވެސް ދުއްވަ އެވެ. އެކަމަކު، ކުރީގެ އުޅުމާއި މިހާރުގެ ދިރިއުޅުން ވަރަށް ބޮޑަށް ތަފާތެވެ. ކުރިން އޭނާއަކީ ވަރަށް އެކްޓިވްކޮށް، ކޮންމެ މަސައްކަތެއް ވެސް ހަމަ ކުރަން ޖެހިއްޖިއްޔާ ކޮށް އުޅުނު މީހެކެވެ. މިހާރު އެ ގޮތަށް ނޫޅެވޭތީ އޭނާ ދެރަވެ އެވެ. ނަމަވެސް، ކައިރީގައި ތިބި މީހުން ދޭ ހިތްވަރުން އޭނާ ދިރިއުޅެނީ ވަރަށް ހިތްހަމަޖެހިގެންނެވެ.
އޭނާ މަސްނޫއީ ފަޔެއް ލެއްވީ ނުހިނގި ގޮނޑިއެއްގައި އިންނަތާ ދެ އަހަރެއްހާ ދުވަސް ވީ ފަހުންނެވެ. ދައުލަތުގެ ބޭސްފަރުވާގެ ނިޒާމުން ލިބުނު އެހީގައި އެ ފައި ލެއްވީ، އަބަދު ގޮނޑިއެއްގައި އިނދެ އޭނާގެ ބާކީ އޮތް ދުވަސްތައް ވޭތުކުރަން ބޭނުން ނުވާތީ އެވެ.
އޭޑީކޭއިން ފަރުވާދީ، އޭނާ ގެއަށް ދޫކޮށްލި ފަހުން ވާހަކަ ނުދެއްކި ވެސް ވަރަށް ގިނަ ދުވަހު ހުއްޓެވެ. އެއީ ހޮސްޕިޓަލުގައި އޮތްއިރު އޭނާއަށް ކާންދިނުމަށް ކަރާއި ނޭފަތަށް ގުޅި ހޮޅިއެއްގެ ސަބަބުން ވީ ކަމެކެވެ. ފަހުން އެކަމަށް ވެސް ފަރުވާކޮށްގެން އަލުން ވާހަކަ ދެއްކެން ފެށި އެވެ. ރަނގަޅަށް އޮތް އޭނާގެ ވާތު ފައިގައި ވާގި ނެތިގެން ވެސް ގިނަ ދުވަސްތަކެއް ވަންދެން އުޅެން ޖެހުނެވެ.
މުހައްމަދު ފިރުޝާން ރަށްޓެއްސަކާ ވާހަކަދައްކާލަން މަގުމަތީގައި މަޑުކޮށްލައިގެން.-- ފޮޓޯ: ފަޔާޒް މޫސާ | މިހާރު
ފިރުޝާން އެނދުމަތިވެފައި އޮތް އެ ދުވަސްވަރު އޭނާ އުފުއްލައި، އޭރު އޭނާގެ ހުރިހާ ކަމެއް ކޮށްދިނީ ބައްޕައެއް ފަދަ އޭނާގެ ދޮންބައްޕަ އެވެ.
"އަޅުގަނޑަށް ދިމާވާ ކޮންމެ ކަމެއްގައި ވެސް އަޅުގަނޑުގެ ދޮންބައްޕަ ވަރަށް ރަނގަޅު. އެއީ ހަމަ އަސްލު ބައްޕައޭ ބުންޏަސް ދޮގަކަށް ނުވާނެ،" ފިރުޝާން ބުންޏެވެ.
މި ވޭނުގައި ފިރުޝާނަށް ލިބުނު އެންމެ ބޮޑު ހިތްވަރަކަށް ވެސް ވީ އޭނާގެ މަންމަ އާއި ބައްޕަ އާއި އާއިލާގެ އޯގާތެރިކަމެވެ.
"އަޅުގަނޑުގެ މަންމަ އާއި އަންހެނުންނާއި އަންހެނުންގެ މަންމަ ވަރަށް ސަޕޯޓިވް. އަޅުގަނޑު މީހަކަށް ހަދަން ވަރަށް މަސައްކަތްކޮށް، ހިތްވަރު ދިން،" އޭނާ ބުންޏެވެ.
ފިރުޝާން އިނދެގެން އުޅެނީ އޭނާއަށް މިކަން ދިމާވި ފަހުން ބައްދަލުވި މީހަކާ އެވެ. އޭނާއަށް މިހާ ހިސާބަށް އާދެވުނީ އަންހެނުންނާއި އަންހެނުންގެ އާއިލާއިން ވެސް ދިން ހިތްވަރުންނެވެ.
މުހައްމަދު ފިރުޝާން "މިހާރު"އަށް އިންޓަވިއު ދެނީ.-- ފޮޓޯ: ފަޔާޒް މޫސާ | މިހާރު
ދެން އޭނާ އެންމެ ޝުކުރުވެރި ވަނީ އާއިލާ އަށް އެންމެ ދަތިވި އެ ވަގުތު، ގައްދޫ ދާއިރާގެ ކުރީގެ މެމްބަރު އަދި ވިޔަފާރިވެރިޔާ ޒާހިރު އާދަމް (ގައްދޫ ޒާހިރު) ދެއްވި އެހީތެރިކަމަށެވެ.
"މިކަން ހިނގީ ކޮވިޑު ދުވަސްވަރު، ޒާހިރުބެ ވެސް ނިޔާވީ އެ ދުވަސްވަރު، އެހެންވެ، އަޅުގަނޑާ ބައްދަލެއް ވެސް ނުވޭ. ޒާހިރުބެ އަށް ވަރަށް ބޮޑަށް ޝުކުރުވެރިވަން،" އޭނާ ބުންޏެވެ.
ފިރުޝާން މިހާރު ހުރީ އޭނާގެ މަސްނޫއީ ފައިގެ އެޖަސްމަންޓަށް އިންޑިއާ އަށް ދާން ޖެހިފަ އެވެ. އެ ފައި ޖެހި ފަހުން މީހާގެ ހަށިގަނޑަށް އަންނަމުންދާ ބަދަލުތަކާ އެކު އެއީ އަހަރުންއަހަރުން ކުރަން ޖެހޭ ކަމެކެވެ. އެކަމަކު، މި ވަގުތު މާލީ ހާލަތު ހުރި ގޮތުން އޭނާއަށް އަދި ހުރީ ނުދެވިފަ އެވެ. ނަމަވެސް، އޭނާ އުއްމީދުކުރަނީ މި އަހަރު އެކަން ކުރަން ދެވޭނެ ކަމަށެވެ.
ފިރުޝާން ޖަހައިފައި އިންނަ މަސްނޫއީ ފައި ދައްކާލަނީ.-- ފޮޓޯ: ފަޔާޒް މޫސާ | މިހާރު
"އަނެންހެން ބުނަންޏާ، ދުނިޔެ މަތީގައި މީހަކަށް ނުއުފުލޭވަރުގެ ބުރައެއް ނުޖައްސަވާނެ. ކޮންމެ ކަމެއްގައި ވެސް އެ މީހަކު ހިތްވަރު ކޮށްފިއްޔާ ނުވާނެ ކަމެއް ނޯންނާނެ، އެއީ ކިތައްމެ އުނދަގޫ، ކިތައްމެ ބޮޑު ކަމަކަށް ވިޔަސް. ހިތްވަރާ އެކުގައި މަސައްކަތްކޮށްފި ނަމަ، އެކަމެއް ހާސިލްވާނެ،" ދިރިއުޅުން ބަދަލުކޮށްލި މި ފިލާވަޅުން އޭނާއަށް ލިބުނު އެންމެ ބޮޑު އިބުރަތަކީ އެއީ ކަމަށް ފިރުޝާން ބުންޏެވެ.
"ހިތްވަރުކުރުމަކީ ކޮންމެ މީހަކަށް ވެސް ކުރެވޭނެ ކަމެއް."
ދަރިފުޅުގެ މަރުގެ ހިތާމައިގެ ތެރެއިން ބޮޑު ނިއުމަތެއް
އެނދުގައި އޮންނަންޖެހޭނެއޭ ބުންޏަސް މި ހުރީ ތެދުވެ
މި ކަވި މަސައްކަތުން ފާއިޒާ އެންމެން އާޝޯހުކޮށްލަނީ
މުހައްމަދު މި ހިންގަނީ މަސްވެރިންގެ ބުޅި ފެކްޓަރީ
ކުއްލިއަކަށް ބިކަވެ ދަރިފުޅުގެ އިންތިޒާރުގައި
ފެންނަނީ އަރަމުން އަންނަ ޒުވާން ޝައިހަށް އޮތް ލޯބި
ދިވެހި ހުނަރުގެ ފުރިހަމަކަން މި ދަބަސްތަކުން
އެކަނިވެރި ދިރިއުޅުމުން އައިސްތު ނެރެދިނީ ހުނަރުތައް
ހަގީގީ މަސްވެރި އާއިލާއެއް، ފޫހިވީމާ ވެސް ލޯންޗަށް
އޯޓިޒަމް ދެ ކުދިންނާ އެކު އަސަރާއި ކަރުނައިގެ ހަޔާތެއް