މާލެ ސަރަހައްދުގައި 40،000 އަށް ވުރެ ގިނަ މަސްދަޅު ކޭސް ބަހައިފި

މާލެ ސަރަހައްދުގައި މިހާތަނަށް 40،000 އަށް ވުރެ ގިނަ މަސްދަޅު ކޭސް ސަރުކާރުން ބަހައިފި އެވެ.

ލޯކަލް ގަވަމެންޓް މިނިސްޓަރު އާދަމް ޝަރީފް މިއަދު "މިހާރު" އަށް ވިދާޅުވީ ރެއާ ހަމައަށް މާލެ ސަރަހައްދުގައި 40،000 އަށް ވުރެ ގިނަ މަސްދަޅު ކޭސް ބަހާފައިވާ ކަމަށެވެ.

މިނިސްޓަރު ވިދާޅުވީ ރަށްރަށުގައި މަސްދަޅު ކޭސް ބެހުމުގެ މަސައްކަތް ގާތްގަނޑަކަށް ނިމިފައިވާ ކަމަށެވެ.

"މިހާރު ހަމަ ގިނަ ރަށްރަށުގައި މަސްދަޅު ކޭސް ބަހައި ނިމިފައި ވަނީ،" މިނިސްޓަރު ވިދާޅުވި އެވެ.

މާލެ ސަރަހައްދުގައި މަސްދަޅު ކޭސް ބަހަން ފެށީ މިދިޔަ މަހު 20 ވަނަ ދުވަހު އެވެ. ފުރަތަމަ ހަމަޖެއްސީ މާލެ އާއި ހުޅުމާލެ އަދި ވިލިމާލޭގެ ޖުމްލަ ފަސް ތަނަކުން މަސްދަޅު ކޭސް ދޫކުރާށެވެ. ނަމަވެސް، ދިގު ކިއުތައް ދަމާލުމާ އެކު މަރުކަޒުތައް ސަރުކާރުން ވަނީ އިތުރުކޮށްފަ އެވެ. އަދި މަސްދަޅު ކޭސް މާލެ ސަރަހައްދުގައި ބެހުމަށް ޓޯކަން ނިޒާމެއް ވެސް ތައާރަފުކޮށްފައިވެ އެވެ.

މި ރޯދަމަހަށް ސަރުކާރުން ދޭ ހަދިޔާއެއްގެ ގޮތުގައި ކޮންމެ ގޭބީސީއަކަށް ދޫކުރަނީ 48 ދަޅުގެ މަސްކޭހެވެ. މަސްދަޅު ކޭސް ބަހަނީ ކަރަންޓު މީޓަރު ނަންބަރަށެވެ. ގާތްގަނޑަކަށް ރާއްޖޭގެ 80،000 އަށް ވުރެ ގޭބީސީތަކަށް މަސްދަޅު ބަހާނެ ކަމަށް ސަރުކާރުން ކުރިން ބުނެފައިވެ އެވެ.

ރަށްރަށުގައި މަސްދަޅު ކޭސް ބަހަނީ އެ ރަށްރަށުގެ ކައުންސިލްތަކާ ހަވާލުކޮށްގެންނެވެ.