ޣައްޒާއާ ގުޅޭ ގޮތުން އަރަބި ގައުމުތަކުގެ ސިއްރު ބައްދަލުވުމެއް

ފަލަސްތީނުގެ ޣައްޒާ އެމެރިކާގެ ބާރުގެ ދަށަށް ގެންގޮސް އެތަނުން މީހުން ބޭލުމަށް އެމެރިކާގެ ރައީސް ޑޮނަލްޑް ޓްރަމްޕު ހުށަހެޅުއްވި މައްސަލާގައި އަރަބި ލީގުގެ ފޮރިން މިނިސްޓަރުންގެ ހާއްސަ ބައްދަލުވުމެއް ބާއްވައިފި އެވެ.

މި މަޝްވަރާތަކުގެ ތަފްސީލެއް ހާމަކޮށްފައެއް ނުވެ އެވެ.

ނަން ނުޖެހުމަށް ޝަރުތުކޮށް އަރަބި ލީގުގެ ބޭފުޅަކު އޭއެފްޕީއަށް ވިދާޅުވި ގޮތުގައި މިއީ ޣައްޒާގެ 2.4 މިލިއަން އާންމުން އެތަނުން ބޭރު ނުކޮށް، ހަނގުރާމައަށް ފަހު ޣައްޒާ އަލުން އާރާސްތުކުރުމަށާއި އެކަމާ ގުޅޭ މަޝްވަރާތަކަށް ތައްޔާރުވުމަށް ބޭއްވި ބައްދަލުވުމެއް ކަމަށެވެ.

މީޑިއާއަށް ހުޅުވާނުލައި ބޭއްވި ބައްދަލުވުމުގައި މަޝްވަރާކުރި ކަންކަމަށް "އަންގާރަ ދުވަހު ބާއްވާ ސަމިޓުގައި އަރަބި ލީޑަރުންނަށް ރުހުން ހޯދުމަށް ހުށަހަޅާނެ" ކަމަށް އެ އޮފިޝަލް ވިދާޅުވި އެވެ.

މި ބައްދަލުވުމުގެ ކުރިން މިސްރުގެ ފޮރިން މިިނިސްޓަރު ބަދުރު އަބުދުއްލަތީ ވަނީ އުރުދުން، ބަހްރެއިން، ޓިއުނީޝިއާ، އިރާގު އަދި ޔަމަނުގެ އިތުރުން ފަލަސްތީނުގެ އިސް ޑިޕްލޮމެޓާ އެކު ވަކިވަކިން ބައްދަލުކުރައްވައިފަ އެވެ.

ޣައްޒާއިން މީހުން ބާލައި މިސްރާއި އުރުދުންއަށް ގެންގޮސް ރިސޯޓެއް ގޮތަށް ޣައްޒާ ތަރައްގީކުރާނެ ކަމަށް ޓްރަމްޕް ވިދާޅުވުމުން އަރަބި އަދި އިސްލާމީ ގައުމުތަކުން ނުރުހުން ފާޅުކޮށް، ޓްރަމްޕުގެ އެ ހިޔާލާ އެއްގޮތަށް ކުރާ އެއްވެސް ކަމަކަށް އެއްބާރުލުން ނުދޭނެ ކަމަށް ވަނީ ބުނެފަ އެވެ.