ގައުމު މި ހާލަތަށް ވައްޓާލީ ކުރީގެ ސަރުކާރުތަކުން: ގާސިމް

ރާއްޖެ އިގްތިސާދީ ގޮތުން މިހާރު މިއޮތް ހާލަތަށް ވެއްޓުނީ ކުރީގެ ސަރުކާރުތަކުން އަމަލުކުރި ގޮތުގެ ސަބަބުން ކަމަށް ޖުމްހޫރީ ޕާޓީގެ ލީޑަރު އަދި ރައްޔިތުންގެ މަޖިލީހުގެ މާމިގިލި ދާއިރާގެ މެންބަރު ގާސިމް އިބްރާހިމް މިއަދު ވިދާޅުވެއްޖެ އެވެ.

މިއަދު މެންދުރު ފަހު މަޖިލީހުގައި ބޭއްވި ނޫސްވެރިންގެ ބައްދަލުވުމެއްގައި ގާސިމް ވިދާޅުވީ ގައުމު މިއަދު ވެއްޓިފައިވާ އަނދަވަޅުން ސަލާމަތް ކުރުމަށްޓަކައި މި ސަރުކާރުން ވަރަށް ރަނގަޅު ފިޔަވަޅުތަކެއް އަޅުއްވަމުން ގެންދަވާ ކަމަށެވެ. އަދި މިހާރު އޮތް ހާލަތަށް ގައުމު އަންނަން ޖެހުނީ ކުރީގެ ސަރުކާރުތަކުގެ އިހުމާލުން ކަމަށް އޭނާ ވިދާޅުވި އެވެ.

"އެއީ ރައީސް މައުމޫންގެ ވެރިކަމުގައެއް ނޫން، ވަރަށް ސާފު. އެއީ މައުމޫނަށް އަޅުގަނޑު ޕޮއިންޓެއް ދޭކަށް ނޫން. 2008 ވަނަ އަހަރު އައި ސަރުކާރާއި 2013 ވަނަ އަހަރު އައި ސަރުކާރާއި 2018 ވަނަ އަހަރު އައި ސަރުކާރުތަކުން ކުރައްވާފައިވާ ކަންތައްތަކުގެ ނަތީޖާއެއްގެ ގޮތުން،" ގާސިމް ވިދާޅުވި އެވެ.

ގާސިމް ވިދާޅުވީ އެ ތިން ވެރިކަމުގައި އެކި ނަންނަމުގައި ދަރަނި ނަގައި އަދި ބޮންޑު ވިއްކައިގެން 126 ބިލިއަން ރުފިޔާއިން ދަރަނިވެރިކޮށްފައިވާ ކަމަށެވެ.

މި ސަރުކާރުން ވެރިކަމާ ހަވާލުވިއިރު ވެސް އާސަންދަ އާއި އެންސްޕާގެ ބިލުތަކަށް އެކަނި ވެސް ބިލިއަނަކަށް ވުރެ ގިނަ ރުފިޔާ ނުދައްކާ ހުރި ކަމަށް މާލިއްޔަތު ކޮމިޓީގެ މުގައްރިރުކަން ވެސް ކުރައްވާ ގާސިމް ވިދާޅުވި އެވެ.

ސަރުކާރުތަކުން ރައްޔިތުންގެ ފައިސާއަށް ހިޔާނާތްތެރިވާ ވާހަކައަކީ އަބަދުވެސް އިވޭ ވާހަކައެއް ކަމަށާއި ނަމަވެސް މި ސަރުކާރުން ފެނިގެންދަނީ އެކަންކަން ހުއްޓުވަން ގިނަ ފިޔަވަޅުތަކެއް އަޅާ މަންޒަރު ކަމަށް ގާސިމް ވިދާޅުވި އެވެ.

"ކުންފުނިތަކުގެ މެނޭޖިން ޑިރެކްޓަރުންނާއި އެ ނޫން ވެސް މިނިސްޓަރުންނާ ބޭބޭފުޅުން ވެސް ވަކި ކުރައްވައިފި ކަންތައްތައް ރަނގަޅު މަގަށް ގެންދިއުމަށް ކުރައްވާ ކަންތައްތަކުގެ ތެރެއިން،" ގާސިމް ވިދާޅުވި އެވެ.

ގާސިމް ވިދާޅުވި ގޮތުގައި ރައީސް ޑރ. މުހައްމަދު މުއިއްޒުގެ ރިޔާސީ ބަޔާނުގައި ވިދާޅުވި ގޮތަށް ރައްޔިތުންގެ މަޖިލީހުގެ އިންތިހާބާއި ރިޔާސީ އިންތިހާބު އެއްކޮށްލައިގެން ބޭއްވުމަކީ ވަރަށް ރަނގަޅު ވިސްނުމެއް ކަމަށެވެ.

އެހެން ނޫންނަމަ ކޮންމެ ބޭފުޅަކު ވެސް ރައީސް ކަމަށް ވަޑައިގެންނެވުމަށް ފަހު ކުޑަ ދުވަސްކޮޅެއް ފަހުން މަގާމުގެ ނުފޫޒާއި ނަހަމަ ބާރުތައް ބޭނުން ކޮށްގެން މަޖިލިސް އިންތިހާބު ކާމިޔާބު ކުރުމަށް ދާއިރާތަކަށް ގިނަ ވައުދުތައް ވަމުންދާނެ ކަމަށް ގާސިމް ވިދާޅުވި އެވެ.

ގާސިމް ވިދާޅުވީ ދެ އިންތިހާބު އެއްކޮށްލުމާއެކު އެ މައްސަލަ ހައްލުވެގެން ދާނެ ކަމަށެވެ.