ވާވުގެ "ރަންގަނޑު" ފުށުން ޖަހާލައިފި

ރާއްޖެއަށް މި ފަހުން ކުރި ގަދަ ވިއްސާރާގައި ވ. އަތޮޅުގެ ލޯކަލް ޓޫރިޒަމްގެ "ރަންގަނޑު"ގެ ގޮތުގައި މަޝްހޫރު ޝިޕްރެކް ފުށުން ޖަހާލައި، ވަރަށް ބޮޑަށް ހަލާކުވެއްޖެ އެވެ.

ވ. ކެޔޮދޫ ކައިރީގައި އޮންނަ މި ޝިޕްރެކް އަށް ލިބުނު ގެއްލުންތައް ފެންނަ ފޮޓޯތަކާއި ވީޑިއޯތައް ސޯޝަލް މީޑިއާގައި ވަނީ އާންމުވެފަ އެވެ.

ކެޔޮދޫގައި ހިންގާ ގެސްޓް ހައުސްއެއް ކަމަށްވާ ހެވަނަ މޯލްޑިވްސް އިން ވަނީ ޝިޕްރެކަށް ލިބުނު ގެއްލުންތައް ފެންނަ ވީޑިއޯތައް އިންސްޓަގްރާމްގައި ހިއްސާކޮށްފަ އެވެ. އެ ވީޑިއޯތަކުން ފެންނަ ގޮތުގައި، މީގެ ކުރިން މޫދު މަތިން ރީއްޗަށް ފެންނަން އޮތް އެ ބޯޓުގެ ދިރުނބާކޮޅު އޮތީ އަނެއްކޮޅަށް ފުށުން ޖަހާލައިފަ އެވެ.

ފެނުން މައްޗަށް މިހާރު ފެންނަން އޮތީ ކުރިން މޫދު އަޑީގައި އޮތް އެ ބޯޓުގެ ބަނޑުފިލާގެ ބައެކެވެ. އެ ބޯޓުގެ މަޑޫތައް ވެސް އޮތީ ވަރަށް ބޮޑަށް ފީވެ، ހަލާކުވެފަ އެވެ.

ބެލެވޭ ގޮތުގައި، އެ ބޯޓު އޮތީ މި ފަހުން މޫސުން ގޯސްވި ދުވަސްވަރު، ވަރަށް އޮއިބާރުވެ، ފުށުން ޖަހާލައިފަ އެވެ. ބައެއް މީހުން ބުނި ގޮތުގައި، ދިޔަވަރު ބޮޑު ދުވަހެއްގައި މި ބޯޓު ފެނުން މައްޗަށް ދެން ނުފެންނާނެ އެވެ.

ގިނަ ބަޔަކު ވަނީ އެ ބޯޓަށް މިހެން ވުމުން ވަރަށް ބޮޑަށް ދެރަވެ، ޝުއޫރުތައް ވެސް ފާޅުކޮށްފަ އެވެ.

ރާއްޖޭގެ ޓިކްޓޮކްގައި މަޝްހޫރު އަދި ވ. ފުލިދޫގައި އެކްސްކާޝަން ސެންޓަރެއް ވެސް ހިންގާ ކެނެޑާގެ މީހެއް ކަމަށްވާ ޖެން ޑާލިންގެ އިންސްޓަގްރާމް ސްޓޯރީގައި ވެސް ވަނީ މި ބޯޓަށް ލިބުނު ގެއްލުންތައް ހިއްސާކޮށްފަ އެވެ.

"ވަރަށް ދެރަވެއްޖެ މިހެން ވީމަ. އަށް އަހަރު ކުރިން އަހަރެން ރާއްޖެ އައިއިރު، މި އަތޮޅުގައި މުރަކަ ދިރުން އޮތީ ހުއްޓިފައި. މިދިޔަ އަހަރު ގާ ހުދުވި ދުވަސްވަރު މުރަކަތައް ވަނީ މަރުވެފައި. އެހެންވެފައި، އޮއްވާ އަނެއްކާ މިހެން މި ވީ [ޝިޕްރެކް ހަލާކުވީ]،" އޭނާގެ އިންސްޓަ ސްޓޯރީގައި ބުންޏެވެ.

ޖެންގެ ސްޓޯރީގައި ހިއްސާކޮށްފައިވާ، މޫދު އަޑިން ނަގާފައިވާ ވީޑިއޯއަކުން ފެންނަ ގޮތުގައި، އެ ބޯޓުގެ އިންޖީނު އޮތް ބައި އޮތީ ފީވެގެން ގޮސް ފުނޑި، ބޯޓާ ވަކިވެފަ އެވެ. އެ ބޯޓު ކުރިން އޮތް ގޮތަށް އޮތީ އެ އިންޖީނުގެ ބާރުގަ އެވެ. ބޯޓުގެ ކޮޅުފަސްކޮޅު ވެސް އޮތީ ބިނދިފަ އެވެ.

މި ޝިޕްރެކަކީ ޓޫރިސްޓުންނާއި ދިވެހިންގެ މެދުގައި ވެސް ވަރަށް މަގުބޫލު ތަނެކެވެ. އެ ބަލައިލުމަށާއި އޭގެ ކައިރީގައި ފީނުމަށް ވ. އަތޮޅާއި މާލެ އަތޮޅުގެ ރަށްރަށާއި ރިސޯޓުތަކުން ވެސް ވަރަށް ގިނަ އަދަދެއްގެ ޓޫރިސްޓުން ކޮންމެ ދުވަހަކު ދެ އެވެ. އެ ސަރަހައްދަށް ޓޫރިސްޓުން ގެންދަނީ ވެސް ގެސްޓް ހައުސްތަކާއި ރިސޯޓުތަކުން ޕެކޭޖުތައް ވިއްކައިގެންނެވެ.

ވ. އަތޮޅުގެ ލޯކަލް ޓޫރިޒަމް ކުރިއެރުމުގައި މި ޝިޕްރެކަކީ މުހިންމު ދައުރެއް އަދާކުރި ޓޫރިސްޓް އެޓްރެކްޝަނެކެވެ. އެ އަތޮޅުގައި ހުރި ގެސްޓް ހައުސްތައް ޕްރޮމޯޓްކުރާއިރު މި ޝިޕްރެކް ވަރަށް ބޮޑަށް ބޭނުންކުރެ އެވެ.

މި ބޯޓު އުރުނީ ކެޔޮދޫގެ ބޯޑަރުގެ ބޭރަށް ކަމަށް ވުމުން އެއީ އެ އަތޮޅު ކައުންސިލުގެ އިހުތިސާސްގެ ތެރޭގައި އޮތް އެއްޗެކެވެ. ބޯޓު އޮތް ސަރަހައްދު ބަލަހައްޓަނީ އަތޮޅު ކައުންސިލުންނެވެ. ނަމަވެސް، މިކަމާ ގުޅޭ ގޮތުން އެ ކައުންސިލްގެ ބަހެއް އަދި ނުލިބެ އެވެ.

މީގެ 10 އަހަރު ކުރިން މި ބޯޓު އެންމެ ފުރަތަމަ ފެނުނީ ވ. އަލިމަތާ ރިސޯޓާއި އެ އަތޮޅު ފެލިދުއާ ދިމާލުން އޮޔާ ދަނިކޮށް އެ އަތޮޅު ފެލިދޫގެ ދެ މަސްވެރިއަކަށެވެ. އިންޑޮނޭޝިއާގެ މި ބޯޓު އަޑިއަށް ދިޔަނުދީ ރަށަށް ގެންދެވޭތޯ އެމީހުން މަސައްކަތް ކުރިޔަސް، އެކަން ކާމިޔާބު ނުވި އެވެ. އެ ރަށް ކައިރީގައި މި ބޯޓު އަޅާފައި އޮއްވާ ކަނޑައިގެން ދިޔައީ އެވެ. ފަހުން އެ ބޯޓު އޮޔާ ގޮސް ހަރުވީ ކެޔޮދޫގެ ދެކުނުން، ކުޑަފަޅާއި ގިރާފަޅާ ދެމެދުން ވިލެއްގަ އެވެ

އޭގެ ފަހުން، ވ. އަތޮޅުގައި ލޯކަލް ޓޫރިޒަމް ކުރިއަރަން ފެށުމުން ގެސްޓް ހައުސްތަކުގެ ޑްރައިވަރުން އެ ބޯޓު އޮތް ސަރަހައްދުގައި މުރަކަ އިންދައި، ޓޫރިސްޓް އެޑްރެކްޝަނެއްގައި ގޮތުގައި ޕްރޮމޯޓްކުރަން ފެށި އެވެ.