މާލެ ސަރަހައްދަށް ވައިގެ ނުސާފުކަން މަތި ދުވަހެއް

މިއަދަކީ މާލެ ސަރަހައްދުގެ ޖައްވު ވަރަށް ބޮޑަށް ނުސާފު ދުވަހެއް ކަމަށް ވިލިމާލޭގައި ހުންނަ އެއާ ކޮލިޓީ މޮނީޓަރިން ސިސްޓަމުން ދައްކައިފި އެވެ.

ވިލިމާލޭގައި ހުންނަ ގައުމީ ޔުނިވާސިޓީގެ ސެންޓަ ފޯ މެރިޓައިމް ސްޓަޑީސްގެ ކެމްޕަސް އިމާރާތުގައި ބަހައްޓާފައިވާ އެއާ ކޮލިޓީ މޮނީޓަރިން ސިސްޓަމުން ދައްކާ ގޮތުން، މި ސަރަހައްދުގެ ވައިގެ ކޮލިޓީ މި ވަގުތު ހުރީ 107 ގަ އެވެ. މިއަދު 11:00 ގެ ކުރިން ހުރީ އެ އަށް ވުރެ ވެސް މަތީގަ އެވެ.

އެއީ ސިއްހަތަށް ނުރައްކާވާ މިންވަރެކެވެ. އެ މިންވަރުގައި ހުންނަ ނަމަ ހައި ރިސްކް މީހުން ހާއްސަ ސަމާލުކަމެއް ދޭން ޖެހޭނެ އެވެ. އެހެންވެ، ބޭރަށް ދާއިރު މާސްކު އަޅަން އިރުޝާދު ދީފައިވެ އެވެ.

މި ސަރަހައްދުގެ ވައިގެ ކޮލިޓީ މޮޑަރޭޓް ލެވެލަށް ދަށްވާނެ ކަމަށް ދައްކަނީ މެންދުރު 12:00 ގެ ފަހުންނެވެ.

މިދިޔަ ހަފުތާގައި ރާއް ޖެއަށް ކުރި ގަދަ ވިއްސާރައަށް ފަހު، އިއްޔެ އިން ފެށިގެން އަނެއްކާ ވެސް ރާއްޖެ ސަރަހައްދުގެ ޖައްވު ވަނީ ތަޣައްޔަރު ވާން ފަށައިފަ އެވެ. މި ވަގުތު، ހޭޒްގެ އަސަރު އެންމެ ބޮޑަށް ކުރަނީ ރާއްޖޭގެ އުތުރުގެ ރަށްތަކަށެވެ.

މިހާރު އާންމުކޮށް ކޮންމެ އަހަރަކު ވެސް، އިރުވައި މޫސުމުގައި ރާއްޖެ އަށް، ޖައްވު ތަޣައްޔަރުވުމުގެ ސަބަބުން ހޭޒް ނުވަތަ ފުސްކަމުގެ އަސަރު ކުރެ އެވެ. ރާއްޖޭގެ ޖައްވު ތަޣައްޔަރުވަނީ އުތުރު އިންޑިއާގެ ސަރަހައްދުތަކުގައި އަންނަ ނުސާފު ވައިގެ ސަބަބުންނެވެ.

ނަމަވެސް، މި އަހަރު އިރުވައި މޫސުން ފެށުމުގެ ކުރިން ވެސް ރާއްޖެ އަށް ހޭޒްގެ އަސަރުކުރި އެވެ. އާންމުކޮށް ރާއްޖެ އަށް ހޭޒްގެ އަސަރު ކުރަނީ އިރުވައި މޫސުމުގެ އުތުރު ހަޅައިގައި ބޭ އޮފް ބެންގަލްގެ ކަނޑުން އަންނަ ވަޔާ އެކުގަ އެވެ. އެކަމަކު، މި އަހަރު އިރުވައި މޫސުމުގެ ހަޅަ ޖަހަން ފެށުމުގެ ކުރިން މިދިޔަ ޑިސެމްބަރު މަހުގެ ކުރީކޮޅުގައި ހޭޒްގެ އަސަރު ފެނުނެވެ. އޭރު ތަޣައްޔަރު ވައި އައީ އަރަބި ކަނޑުންނެވެ. އޭގެ، ސަބަބެއް ކަމަށް ބެލެވުނީ އުތުރު އިންޑިއާގެ ސަރަހައްދުގައި އެ ދުވަސްވަރު އުފެދުނު ބާރުގަދަ ތޫފާން "ފެންގާލް"ގެ ވައިގެ މިސްރާބު ހުރި ގޮތުން ކަމަށެވެ.

މި ފަހަރު ރާއްޖެ އަށް އިރުވައި މޫސުން ފެށުނީ އެހެން އަހަރުތަކަށް ވުރެ މާ ލަހުން، މިދިޔަ ބުރާސްފަތި ދުވަހު އެވެ.

އުތުރު އިންޑިއާގެ ސަރަހައްދުތަކުން އަންނަ މި ތަޣައްޔަރު ވައިގައި އެކުލެވިގެން ވަނީ ހިރަފުހާއި ކާރުހާނާތަކުން އަރާ ދުމެވެ. ދުން ގިނަވެ، ފުސްވުމުގެ ސަބަބުން، ލޮލަށް ފެންނަ ދުރުމިން ދަށްވެ އެވެ. އެކަމުގެ ސަބަބުން ދަތުރުފަތުރު ކުރުމަށް ވެސް އުނދަގޫވެ އެވެ. އަދި ސިއްހީ އެކި މައްސަލަތައް ވެސް ކުރިމަތިވެ އެވެ.