ދުންފަތާ ދުރުވުމަށް ހަދާ ސެޒޭޝަން ފަރުވާއަށް ބޭނުންވާ ބާވަތްތައް އެތެރެކުރުން މަނައެއް ނޫން!

ދުންފަތް އުފެއްދުމަށް ބޭނުންކުރާ ތަކެތި ރާއްޖެ އެތެރެކުރުން މަނާވިޔަސް، ދުންފަތާ ދުރުވުމަށް ހަދާ ސެޒޭޝަން ފަރުވާއަށް ބޭނުންވާ ނިކޮޓިން ޕެޗް ފަދަ ބާވަތްތައް އޭގެ ތެރޭގައި ނުހިމެނޭނެ ކަމަށް ހެލްތު މިނިސްޓްރީން ބުނެފި އެވެ.

ދުންފަތުގެ ބާވަތްތައް އަމިއްލައަށް އުފައްދަން ބޭނުންކުރާ އެއްވެސް އެއްޗެއް ރާއްޖެ އެތެރެ ނުކުރެވޭނެކަން އަންގައި ހެލްތު މިނިސްޓްރީން ކަސްޓަމްސްގެ ކޮމިޝަނާ ޖެނެރަލް ފާތިމަތު ދިޔާނާ އަށް ފޮނުވި ސިޓީއެއް ޝޯޝަލް މީޑިއާގައި މިއަދު ވަނީ އާންމުވެފަ އެވެ. މިދިޔަ މަހު 24 ގައި އެ ސިޓީ ފޮނުވުމުގެ ކުރިން ހެލްތު މިނިސްޓްރީން ވަނީ އިތުރު އެހެން ސިޓީއެއް ވެސް ކަސްޓަމްސް އަށް ފޮނުވައިފަ އެވެ.

"މިހާރު"އަށް ލިބިފައިވާ އެ ސިޓީގައި ބުނެފައިވާ ގޮތުގައި، ދުންފަތުގެ އިސްތިއުމާލުން ދުރުހެލިވުމަށް އެދޭ މީހުންނަށް އެހީތެރިވެ، އެކަމަށް ބޭނުންވާ ފަރުވާ ފޯރުކޮށްދިނުމަކީ ދުންފަތް ކޮންޓްރޯލް ކުރުމާ ބެހޭ ގާނޫނުގެ ދަށުން ސަރުކާރަށް މަތިކޮށްފައިވާ ޒިންމާއެއް ކަމަށެވެ. އެ ހިދުމަތް ވީހާ ވެސް އަވަހަށް ފެށުމަށް ނިންމާފައި ވާތީ، އެކަމަށް ބޭނުންވާ "ނިކޮޓިން ރިޕްލޭސްމަންޓް ތެރެޕީ (އެންއާރުޓީ) ރާއްޖޭގެ ހުރިހާ ރަށެއްގައި ހުންނަ ފާމަސީތައް މެދުވެރިކޮށް ފޯރުކޮށްދިނުމަށް އެސްޓީއޯ އިން މަސައްކަތްކުރަމުން އަންނަ ކަމަށް އެ ސިޓީގައި ބުންޏެވެ.

އެ މަގުސަދުގައި އެސްޓީއޯ އިން އިމްޕޯޓްކޮށްފައިވާ ނިކޮޓިން ގަމް ޝިޕްމެންޓެއްގެ އިމްޕޯޓް ޑިއުޓީ މާފުކޮށްދިނުމުގެ އިންތިޒާމު ހަމަޖައްސައިދިނުމަށް ވެސް އެ ސިޓީގައި ހެލްތު މިނިސްޓްރީން ކަސްޓަމްސްގައި އެދިފައިވެ އެވެ.

"މިގޮތުން، ދުންފަތް ކޮންޓްރޯލް ކުރުމާ ބެހޭ ގާނޫނަށް ގެނެވުނު ފުރަތަމަ އިސްލާހުގައި ދުންފަތުގެ ބާވަތްތައް މަނާކުރެވިފައިވާއިރު، ސެޒޭޝަން ފަރުވާއަށް ބޭނުންވާ ބާވަތްތައް އިސްތިސްނާ ކުރެވިފައިވާކަން ފާހަގަކޮށްލަމެވެ. އިތުރު މައުލޫމާތެއްގެ ގޮތުގައި ދަންނަވަމެވެ. މިފަދަ ތަކެއްޗަކީ މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) އިން ބޭހެއްގެ ގޮތުގައި ކަނޑައަޅުއްވާފައިވާ އެއްޗެކެވެ،" އެ ސިޓީގައި ބުންޏެވެ.

ދުންފަތް ކޮންޓްރޯލް ކުރުމާ ބެހޭ ގާނޫނުގެ ދަށުން ރާއްޖޭގައި ދުންފަތް އުފެއްދުމަކީ މަނާކަމަކަށް ވާތީ، ދުންފަތުގެ އެއްވެސް ބާވަތެއް އުފެއްދުމަށް ބޭނުންކުރާ ތަކެތި އެތެރެކުރާ ނަމަ ހިފަހައްޓަން ހެލްތު މިނިސްޓްރީން ކަސްޓަމްސް އަށް އެންގި ސިޓީ މިއަދު ސޯޝަލް މީޑިއާގައި އާންމުވުމާ އެކު ބައެއް މީހުން ވަނީ އޭގެ ތެރޭގައި ސިޒޭޝަންގެ ފަރުވާއަށް ބޭނުންވާ އެއްޗެހި ނުވަތަ ނިކޮޓިން ޕެޗު ވެސް މަނާވި ކަމަށް ބުނެ ކަންބޮޑުވުން ފާޅުކޮށްފަ އެވެ.

ނަމަވެސް ރާއްޖޭގައި ދުންފަތް ކޮންޓްރޯލް ކުރުމާ ބެހޭ ގާނޫނުގައިވާ ގޮތުގައި، ދުންފަތުން ދުރުހެލިވުމަށް "ސެޒޭޝަން" ފަރުވާގެ ތެރެއިން ދެވޭ އަދި ކަމާ ބެހޭ ފަންނީ އިދާރާތަކުން ކަނޑައަޅައި ހުއްދަކޮށްފައިވާ ނިކޮޓިން ރިޕްލޭސްމަންޓް ތެރަޕީ ނުވަތަ ފަރުވާގެ ގޮތުގައި ބޭނުންކުރާ މި ކަހަލަ އެހެން ބާވަތްތައް މި ގާނޫނުގެ ބޭނުމަށް ދުންފަތުގެ ބާވަތްތައް ކަމަށް ނުބެލެވޭނެ އެވެ.

އެޗްޕީއޭގެ އޮފިޝަލަކު މިއަދު "މިހާރު"އަށް ވިދާޅުވީ ދުންފަތް އުފައްދަން ބޭނުންކުރާ ތަކެއްޗަކީ ރާއްޖެ އެތެރެކުރުން ގާނޫނީ ގޮތުން މަނާ ތަކެތި ކަމަށް މިފަހުން ގާނޫނަށް ގެނައި އިސްލާހުގައި އޮތީ ކަނޑައަޅާފައި ކަމަށެވެ. އެހެންވެ، ތަންފީޒީ އިދާރާތަކަށް އަންގާފައި ވަނީ އެ ގާނޫނުގައި ބުނެފައިވާ ގޮތަށް ގާނޫނު ތަންފީޒުކުރަން ކަމަށް އޮފިޝަލް ވިދާޅުވި އެވެ.