މީހުންނަށް ނޭނގި ޕާޓީ ބަދަލުކުރާ މައްސަލަތަކެއް ފެންމަތިވުމުން އެމްޑީޕީން ކަންބޮޑުވުން ފާޅުކޮށްފި

އެމްޑީޕީގެ ދަފްތަރުގައި ތިބި މެމްބަރުންނަށް ނޭނގި އެ މީހުން އެހެން ޕާޓީތަކުގެ ދަފްތަރުގައި ހިމަނަމުންދާ ކަމަށް ބުނެ އެ ޕާޓީން ކަންބޮޑުވުން ފާޅުކޮށްފި އެވެ.

އެމްޑީޕީން ނެރުނު ނޫސްބަޔާނެއްގައި ބުނީ އެ ޕާޓީގެ ދަފްތަރުގައި ތިބި މެމްބަރުން އެހެން ޕާޓީތަކުގެ ދަފްތަރުގައި އަދި ވަކިން ހާއްސަކޮށް، ވެރިކަންކުރާ ޕީއެންސީގެ ދަފްތަރުގައި ހިމަނަމުންދާ ކަމުގެ ގިނަ ޝަކުވާތަކެއް ލިބިފައިވާ ކަމަށެވެ.

ޕީއެންސީއަށް ވަނުމަށް ފޯމު ފުރާފައި ނުވާ އެމްޑީޕީގެ ބައެއް އާންމު މެމްބަރުންނާއި ގައުމީ މަޖިލީހުގެ މެމްބަރުން ވެސް އެމްޑީޕީގެ ދަފްތަރުން އުނިކޮށް ޕީއެންސީގެ ހިމަނާފައި ވާތީ، އެ މައްސަލަ އެންމެ ހަރުކަށި އިބާރާތުން ކުށްވެރިކުރާ ކަމަށް އެ ބަޔާނުގައި ބުންޏެވެ.

އެހެން ބައެއް ޕާޓީތަކުގެ ދަފްތަރުގައި ވެސް އެމްޑީޕީގެ މެމްބަރުން ހިމަނާފައި ވާތީ، މި މައްސަލަތައް ބަލައިދިނުމަށް އިލެކްޝަންސް ކޮމިޝަނަށް ރަސްމީކޮށް ހުށަހަޅާނެ ކަމަށް އެ ޕާޓީން ބުންޏެވެ.

އެމްޑީޕީން ތުހުމަތުކުރާ ގޮތުގައި، އެ ޕާޓީގެ މެމްބަރުން އެހެން ޕާޓީތަކަށް ބަދަލުކޮށްފައި ވަނީ ސޮއި ފޯޖުކޮށްގެން އިލެކްޝަންސް ކޮމިޝަނަށް ފޯމު ހުށަހަޅައިގެންނެވެ.

"މިފަދަ ގިނަ މައްސަލަތަކެއް ތިލަވެފައިވާއިރު، ސިޔާސީ ޕާޓީތަކަށް މީހުން ވެއްދުމާއި ވަކިކުރުމަށް މިހާރު ކަނޑައަޅާފައިވާ އުސޫލުތަކާއި އިޖުރާއަތްތައް އިތުރަށް ހަރުދަނާކޮށް ވަގު ފޯމު ފުރައިގެން ޕީއެންސީގެ ދަފްތަރަށް މީހުން އިތުރުކުރަން ހުރި ދޮރުތައް ބަންދުކުރުމަށް އިލެކްޝަން ކޮމިޝަނަށް މި ޕާޓީން ގޮވާލަމެވެ،" އެމްޑީޕީގެ ބަޔާނުގައި ބުންޏެވެ.

ސަރުކާރުގެ މުއައްސަސާތަކުގައި ރައްކާކޮށްފައި ހުރި އާންމު ރައްޔިތުންގެ ޒާތީ މައުލޫމާތު ބޭނުންކޮށްގެން ޕީއެންސީއަށް ފޯމު ފުރައިގެން މެމްބަޝިޕް އިތުރު ކުރަމުންދާ ކަމަށް ތުހުމަތުކޮށް އެމްޑީޕީން ބުނީ މިކަން ސީރިއަސް މައްސަލައެއްގެ ގޮތުގައި ބަލައި ގާނޫނީ ފިޔަވަޅު އެޅުމަށް ވެސް އިލެކްޝަންސް ކޮމިޝަނަށް ގޮވާލާ ކަމަށެވެ.

ސޮއި ފޯޖުކޮށްގެން ޕީއެންސީގެ ދަފްތަރުގައި މީހުން ރަޖިސްޓްރީ ކުރަމުންދާ މައްސަލަތައް ތަހުގީގުކުރުމަށް ވެސް މުއައްސަސާތަކަށް ގޮވާލާ ކަމަށް އެމްޑީޕީން ބުންޏެވެ.

އެމްޑީޕީގެ މެންބަރެއްގެ ގޮތުގައި 2005 ވަަނަ އަހަރުން ފެށިގެން ހުންނެވި، އަދި އެމްޑީޕީ ސަރުކާރުގައި ހެރިޓޭޖް މިނިސްޓްރީގެ ސްޓޭޓް މިނިސްޓަރުކަން ކުރެއްވި މުހައްމަދު ތޯރިގް (މަނަދޫ ތޯރިގް) ވެސް އޭނާ މިހާރު އޮތީ ޕީއެންސީގެ ދަފްތަރަށް ބަދަލުކޮށްފައި ކަމަށް ވިދާޅުވެ އެ މައްސަލަ ފުލުހުންނަށް ވެސް ހުށަހަޅުއްވައިފަ އެވެ. މަނަދޫ ދާއިރާގެ ރައީސްގެ މަގާމުގައި ހުންނެވި ތޯރިގް އޭނާގެ ޒާތީ މައުލޫމާތު ވަގަށް ބޭނުންކޮށް ޕީއެންސީއަށް ފޯމު ފުރާފައިވާ މައްސަލަ ބަލައިދިނުމަށް އެދި ޕޮލިސް ކޮމިޝަނަރު އަލީ ޝުޖާއުއަށް ފޮނުއްވި ސިޓީ ވެސް ސޯޝަލް މީޑިއާގައި އާންމުކުރައްވައިފަ އެވެ.

މި މައްސަލާގައި އިލެކްޝަންސް ކޮމިޝަންގެ ބަހެއް އަދި ނުލިބެ އެވެ.