އަޒަރްބައިޖާންގެ ބޯޓު ވެއްޓުމުން ޕުޓިން މާފަށް އެދިވަޑައިގެންފި

އަޒަރުބައިޖާން ވެއްޓުނު މަތިންދާބޯޓު ރަޝިޔާގެ ޗެޗެންޔާގެ ގްރޮޒްނީއަށް ޖައްސަން މަސައްކަތްކުރި ކަމަށާއި އެ ވަގުތު ރަޝިއާގެ ވައިގެ ދިފާއީ ނިޒާމު ދިޔައީ މަސައްކަތްކުރަމުން ކަމަށް ވިދާޅުވެ ރަޝިޔާގެ ރައީސް ނުސީދާކޮށް އެ ހާދިސާގެ ޒިންމާ ނަންގަވައިފި އެވެ.

ކްރެމްލިން އިން ބުނީ އަޒަރްބައިޖާންގެ ލީޑަރު އިލްހާމް އަލިޔޭވް އަށް ޕުޓިން ފޯނުކުރައްވައި، ހިތާމަވެރި ހާދިސާއާ ގުޅިގެން މާފަށް އެދިވަޑައިގަތް ކަމަށެވެ. ނަމަވެސް ބޯޓު ވެއްޓުނީ ރަޝިޔާގެ އެއާ ޑިފެންސް ސިސްޓަމުން ދެވުނު ހަމަލާއަކުން ކަމެއް ވިދާޅެއް ނުވެ އެވެ.

ރަޝިޔާއިން މިހާތަނަށް ބުނެފައި ވަނީ ގްރޯޒްނީ އަށް ބޯޓު ޖައްސަން ހަމަޖެހިފައި އޮތް ނަމަވެސް އެ ސަރަހައްދަށް އޭރު ދިޔައީ ޔުކްރެއިންގެ ޑްރޯންތަކުން ހަމަލާ ދެމުން ކަމަށެވެ. އެހެންވެ ބޯޓަށް އޭގެ މަންޒިލަށް ނުދެވި ކަޒަކަސްތާނުގެ ހުޅަނގު ސަރަހައްދަށް ވެއްޓުނީ ކަމަށެވެ.

އަޒަރްބައިޖާނުން ބުނީ ރައީސް އަލިޔޭވް ވަނީ ބޯޓު ވެއްޓުނީ ރަޝިޔާ ސަރަހައްދުން ހަަމަލާއެއް އަމާޒުވެގެން ކަމަށް ޕުޓިން އަށް ރައީސް ދެންނެވި ކަމަށެވެ.

ރަޝިޔާއިން ބުނީ މަތިންދާބޯޓު ގްރޮޒްނީއަށް ޖެއްސުމަށް "އެތައް ފަހަރަކު" މަސައްކަތް ކުރި ކަމަށް އަލިޔޭވް ގާތު ޕުޓިން ވިދާޅުވި ކަމަށެވެ.

އަޒަރުބައިޖާން އެއާލައިންސް އިން ބުނި ގޮތުގައި އެ ބޯޓުގައި 67 މީހުން ތިބިއިރު އޭގެ ތެރޭގައި 62 ފަސިންޖަރުންނާއި ފަސް ކްރޫ ހިމެނެ އެވެ. މީގެ ތެރެއިން ބަޔަކު ސަލާމަތްވެފައި ވިޔަސް 38 މީހަކު މަރުވެފައިވާ ކަމަށް މިހާރު ވަނީ ބެލެވިފަ އެވެ.