މާލެއަށް ކުރި ވިއްސާރަ: ފަސް ގެއަކުން މީހުން ބަދަލުކުރަނީ

ރެއިން ފެށިގެން މާލެއަށް ވެހުނު ބޯ ވާރޭގައި ފެންބޮޑުވުމުގެ ސަބަބުން ފަސް ގެއަކުން މީހުން ބަދަލުކުރަން ޖެހިފައިވާ ކަމަށް ނޭޝަނަލް ޑިޒާސްޓާ މެނޭޖްމެންޓް އޮތޯރިޓީން މިއަދު ބުނެފި އެވެ.

އެ އޮތޯރިޓީގެ ޗީފް އެގްޒެކެޓިވް ހިސާން ހަސަން ޕީއެސްއެމްއަށް ދެއްވި އިންޓަވިއުއެއްގައި ވިދާޅުވީ ފެންބޮޑުވެ ހާލަތު ގޯސްވެފައިވާ ފަސް ގެއަކުން މީހުން ބަދަލުކުރަން ޖެހިފައިވާ ކަމަށާއި އެއް ގެއިން މީހުން ބަދަލު ކުރުމުގެ މަސައްކަތް މިހާރު ފަށާފައިވާ ކަމަށެވެ.

ފެން ބޮޑުވުމުގެ ސަބަބުން ވަރަށް ގިނަ ގެތަކެއްގައި ވެލި ބަސްތާ ޖަހަން ޖެހިފައިވާ ކަމަށް ވެސް ހިސާން ވިދާޅުވި އެވެ.

މާލޭގެ ބޮޑު ސަރަަހައްދެއްގައި، ހާއްސަކޮށް މާފަންނުގެ އެކި ހިސާބުތަކުގައި ވަރަށް ބޮޑަށް ވަނީ ފެންބޮޑުވެފަ އެވެ. މެޓް އޮފީހުގެ ތަފާސްހިސާބުތައް ދައްކާ ގޮތުން މިދިޔަ 24 ގަޑިއިރު އެންމެ ގިނައިން ވާރޭ ވެހުނީ މާލެއަށެވެ. އެއީ 136.5 މިލިމީޓަރުގެ ވާރޭ އެވެ.

ފެން ހިންދުމުގެ މަސައްކަތް ސިފައިން މިހާރު ވެސް އަންނަނީ ކުރަމުންނެވެ. މާލޭގެ ފަސް ސަރަހައްދެއްގައި 16 ޕަންޕު ބަހައްޓައިގެން، ފެން ހިންދުމުގެ މަސައްކަތް ކުރަމުން އަންނަ ކަމަށް ސިފައިން ބުންޏެވެ.

މާލޭއަށް ބޯކޮށް ވާރޭވެހި ފެންބޮޑުވެދާނެ ކަމުގެ އިންޒާރު މިދިޔަ ބުރާސްފަތި ދުވަހު މެޓް އޮފީހުން އިދާރާތަކަށް ދީފައިވެ އެވެ. ސިފައިންނާއި ފުލުހުންނާއި ޑިޒާސްޓާ އަދި ޑިފެންސް މިނިސްޓްރީގެ އިސް ބޭފުޅުން ތިއްބަވާ ގްރޫޕަކަށް ވެސް މެޓް އޮފީހުން އެ އިންޒާރު ފޮނުވި އެވެ.

މެޓްގެ އެލާޓްގައި ބުނީ މިއީ ރާއްޖޭގެ ސަރަހައްދަށް ހުޅަނގު މޫސުން ނިމި، އިރުވައި މޫސުން ފެށޭ ދުވަސްވަރު ކަމަށެވެ. މޫސުން ބަދަލުވާ ދުވަސްވަރާ ދިމާކޮށް ރާއްޖެ ކައިރީގައި ދެ ކޮޅިގަނޑު އުފެދެމުން ދާތީ، ކުރިއަށް އޮތް ދުވަސްތަކުގައި ރާއްޖޭގެ ހުރިހާ ހިސާބަކަށް މޫސުން ގޯސްވާނެ ކަމަށް މެޓް އޮފީހުން ބުންޏެވެ.

ވައިގަދަވެ ވިއްސާރަވުމުން ލިބިދާނެ ގެއްލުންތަކުން ސަލާމަތްވާން ރައްކާތެރިކަމުގެ ފިޔަވަޅު އަޅަން އެންޑީއެމްއޭ އިން ވަނީ އިރުޝާދުދީފަ އެވެ. ވިއްސާރަވެ، ދިޔަވަރު ބޮޑުވާ ގަޑިތަކުގައި އުދަ އެރުން ވެސް އެކަށީގެންވާ ކަމެއް ކަމަށް އެންޑީއެމްއޭ އިން ބުންޏެވެ.

ޑިޒާސްޓާ މެނޭޖްމަންޓު އޮތޯރިޓީން ވަނީ ދަތުރުކުރުމުގެ ކުރިން މޫސުމާ ބެހޭ އެންމެ ފަހުގެ މައުލޫމާތު ހޯދައި މޫސުމަށް ސަމާލުކަން ދޭން އެދިފަ އެވެ.

މެޓް އޮފީހުން ބުނި ގޮތުގައި ކުރިއަށް އޮތް ދުވަސްތަކުގައި ރާއްޖޭގެ ބޮޑު ބަޔަކަށް ވައިގަދަވެ، ވިއްސާރަކުރާނެ އެވެ. އުތުރުގެ އަތޮޅުތަކުގެ ކަނޑު ގަދަވެ، ދެކުނާއި މެދުރާއްޖޭގެ އަތޮޅުތަކުގެ ކަނޑުތައް ވަރަށް ގަދަވާނެ ކަމަށް ވެސް އެ އިދާރާއިން ވަނީ ލަފާކޮށްފަ އެވެ.