"ޑޫން: ޕްރޮފެސީ"ގެ ދެވަނަ ސީޒަން އިއުލާންކޮށްފި

ހޮލީވުޑްގެ ސައިންސް ފިކްޝަން ފިލްމު "ޑޫން"ގެ ޕްރީކުއެލް ސީރީޒް "ޑޫން: ޕްރޮފެސީ"ގެ ދެވަނަ ސީޒަނެއް ގެނެސްދޭން ނިންމައިފި އެވެ.

މި ސީރީޒް އުފައްދާ އެޗްބީއޯ އިން އިއްޔެ ވަނީ ދެވަނަ ސީޒަން ގެނެސްދޭން ނިންމިކަން އިއުލާންކޮށްފަ އެވެ. ނަމަވެސް އިތުރު އެއްވެސް ތަފުސީލެއް އަދި ނުދެ އެވެ.

"ޑޫން: ޕްރޮފެސީ" ފުރަތަމަ ސީޒަން މިހާރު ގެނެސްދެމުން އަންނައިރު، މި ސީޒަންގެ އެންމެ ފަހު ދެ އެޕިސޯޑު ސްޓްރީމް ކުރަން ފަށާނީ އަންނަ އާދިއްތަ ދުވަހު އެވެ. ފުރަތަމަ ސީޒަންގައި ޖުމްލަ ހަތް އެޕިސޯޑު ގެނެސްދެ އެވެ.

ފުރަތަމަ ސީޒަނަށް ވަނީ ބެލުންތެރިންނާއި ކްރިޓިކްސްގެ ވެސް ބޮޑު ތަރުހީބެއް ލިބިފަ އެވެ.

"ޑޫން: ޕްރޮފެސީ" މަސައްކަތް ފެށީ 2019 ވަނަ އަހަރު އެވެ. އަދި އެންމެ ފުރަތަމަ މި ސީރީޒަށް ދިން ނަމަކީ "ޑޫން: ސިސްޓަހުޑް" އެވެ. މި ސީރީޒް ބިނާކޮށްފައި ވަނީ ބްރަޔަން ހާބަޓް އާއި ކެވިން ޖޭ އެންޑަސަން ލިޔެފައިވާ ވާހަކަ "ސިސްޓަހުޑް އޮފް ޑޫން" އަށެވެ.

މި ސީރީޒްގައި ދައްކަނީ "ޑޫން" ފިލްމް ސީރީޒްގައި ހިނގި ކަންތައްތަކުގެ 10،000 އަހަރު ކުރި އެވެ.