ބީއެމްއެލްގެ ސްޓާޓަޕް ގްރާންޓް ލިބޭ ދެ ވިޔަފާރި ހޮވައިފި

އާ ވިޔަފާރިތައް ތަރައްގީކުރުމަށް އެހީވުމުގެ ގޮތުން ބީއެމްއެލް އިން ދޫކުރާ ސްޓާޓަޕް ގްރާންޓު މި އަހަރު ލިބޭ ދެ ވިޔަފާރި ހޮވައިފި އެވެ.

މި ގްރާންޓަކީ އަލަށް ފަށާ ވިޔަފާރިތަކާއި މިހާރު ކުރިއަރަމުން އަންނަ ވިޔަފާރިތައް ތަރައްގީކުރުމަށް އެ ބޭންކުން ދޭ 500،000ރ. ގެ ހިލޭ އެހީއެކެވެ. މި އަހަރު މި ގްރާންޓު ކާމިޔާބު ކުރީ ދަ އައިލެންޑް ފެކްޓްރީ އާއި އާފްޓާ ސްކޫލް އެވެ.

ދަ އައިލެންޑް ފެކްޓްރީއަށް ގްރާންޓު ދިނީ ރާއްޖޭގައި ތައްޔާރުކުރާ މަހުގެ އުފެއްދުންތަކުގެ ސިނާއަތަށް، ފެންވަރު ރަނގަޅު، އީޖާދީ ލުއިކާނާ އުފެއްދުމަށް ފެކްޓްރީއެއް ގާއިމްކުރުމަށެވެ. އާފްޓާ ސްކޫލަށް ދިން ގްރާންޓަކީ އަމިއްލައަށް ފަރުމާކޮށްގެން ރާއްޖޭގައި ސްޓެމް (ސައިންސް، ޓެކްނޮލޮޖީ، އިންޖީނިއަރިން، މެތަމެޓިކްސް) ކިޓު ދަރިވަރުންނަށް ފޯރުކޮށްދިނުމާއި ތަމްރީނު ޕްރޮގްރާމްތައް ހިންގުމަށް ދިން އެހީއެކެވެ.

ސްޓާޓަޕް ގްރާންޓް ކާމިޔާބުކުރި ފަރާތްތައް ހޮވީ ދެ މަރުހަލާއަކަށް ބަހާލައިގެން ގެންދިޔަ އިވެލުއޭޝަން ޕްރޮސެސްއަކަށް ފަހު އެވެ. މި ގްރާންޓު ދިނުމަށް ފުރަތަމަ މަރުހަލާގައި ބިޒްނަސް ޕްލޭންތައް އިވެލުއޭޓް ކުރުމަށް ފަހު އެންމެ ފާހަގަކޮށްލެވޭ 10 ވިޔަފާރި ޝޯޓްލިސްޓު ކުރި އެވެ. އަދި ދެވަނަ މަރުހަލާގައި ޝޯޓްލިސްޓްވި ފަރާތްތަކުން އެފަރާތުގެ ވިޔަފާރިއާ ގުޅޭ ޕްރެސެންޓޭޝަން އިވެލުއޭޝަން ކޮމިޓީއަށް ހުށަހެޅި އެވެ.

މިއީ ބީއެމްއެލްއިން މި ގްރާންޓު ދޫ ކުރި ތިން ވަނަ އަހަރެވެ.