ކުނި މެނޭޖްކުރަން ބޭންކުން ހުޅުވާލި ޕްރޮޖެކްޓް ކާމިޔާބުކުރި ޖަމިއްޔާތައް ހޮވައިފި

ދިވެހިރާއްޖޭގައި ދެމެހެއްޓެނިވި ގޮތެއްގައި ކުނި މެނޭޖްކުރުމުގެ އާދަތައް ކުރިއަރުވަން އަމާޒުކޮށްގެން ބޭންކް އޮފް މޯލްޑިވްސް އިން ހިންގި ވޭސްޓް މެނޭޖްމަންޓް ގްރާންޓް ޕްރޮޖެކްޓް ކާމިޔާބު ކުރި ދެ ޖައްމިއްޔާ ހޮވައިފި އެވެ.

މި ގްރާންޓު ކާމިޔާބުކުރީ ލިވް އެންޑް ލާން އެންވަޔަރަންމަންޓަލް އެޑިޔުކޭޝަން މޯލްޑިވްސް އާއި މޯލްޑިވްސް އޯޝަން ޕްލާސްޓިކް އެލަޔަންސް (މޯޕާ) އިންނެވެ. މި ގްރާންޓުގެ ދަށުން ލިވް އެންޑް ލާން އެންވަޔަރަންމަންޓަލް އެޑިޔުކޭޝަން މޯލްޑިވްސް އަށް ތިން ގްލާސް ކްރަޝާ މެޝިން ހަދިޔާ ކުރަން ވަނީ ހަމަޖެހިފަ އެވެ.

މި ޖަމިއްޔާގެ ފަރާތުން އެ މެޝިންތައް ބޭނުން ކުރަން ހަމަޖެހިފައި ވަނީ ކ. ގާފަރާއި އއ. އުކުޅަސްގެ އިތުރުން އދ. ދިގުރަށުގަ އެވެ.

މި ގްރާންޓުގެ ދަށުން މޯޕާއަށް ގްލާސް ކްރަޝާ މެޝިނަކާއި ބޭލަރެއް ހަދިޔާ ކުރުމަށް ވަނީ ހަމަޖެހިފަ އެވެ. މިއީ ހުޅުމާލޭގައި ބޭނުން ކުރުމަށް ހަދިޔާ ކުރާ އާލާތްތަކެކެވެ.

ކުނިގޮނޑުތަކަށް އުކާލެވޭ ކުނީގެ މިންވަރު މަދުކޮށް، ކުނި ނައްތާލުމުގެ ހަރަދު ކުޑަކޮށް، ހަރުދަނާ ގޮތެއްގައި ރީސައިކަލްކުރުމުގެ މަސައްކަތް ބީއެމްއެލް އިން ދޭ މި ގްރާންޓުން، ކުރިއެރުވޭނެ އެވެ. މި ޕްރޮޖެކްޓަކީ ދެމެހެއްޓެނިވި މުޖުތަމައުތަކެއް ބިނާކުރުމަށާއި ތިމާވެށި ރައްކާތެރިކުރަން ބޭންކުން ކުރަމުން އަންނަ މަސައްކަތްތަކުގެ ތެރެއިން ހިންގި މަޝްރޫއެކެވެ.