ބާރުގަދަ ބިންހެލުމެއްގައި ވަނުއަޓޫ ފުނޑިއްޖެ

ޕެސިފިކް ކަނޑުގައި އޮންނަ ވަނުއަޓޫ އަށް މިއަދު އައި ބާރުގަދަ ބިންހެލުމެއްގައި ބޮޑެތި ގެއްލުންތައް ލިބި އެތައް ބަޔަކު މަރުވެއްޖެ ކަމަށް ބެލެވެން ފަށައިފި އެވެ.

ވަނުއަޓޫގެ ވެރިރަށް ޕޯޓް ވިލާ އިން އޭއެފްޕީއާ ވާހަކަ ދެއްކެވި ބައެއް ޑިޕްލޮމެޓުން ވިދާޅުވީ އިމާރާތްތައް ވެއްޓިފައިވާ ކަމަށާއި މަރުވެފައިވާ މީހުންގެ ހަށިތައް މަގުތަކުން ފެންނަ ކަމަށެވެ.

އެމެރިކާގެ ޖިއޮލޮޖިކަލް ސާވޭއިން ބުނި ގޮތުގައި 7.3 މެގްނިޓިއުޑްގެ ބާރުމިނުގައި ބިންހެލުން އައީ ވަނުއާޓޫގެ މައި ރަށް، އެފާޓްގެ އައްސޭރިފަށުން ގާތްގަނޑަކަށް 30 ކިލޯމީޓަރު ދުރަށް، 57 ކިލޯމީޓަރު އަޑިންނެވެ.

އެމެރިކާ އާއި ފްރާންސްގެ އެމްބަސީތައް ހުންނަ އިމާރާތެއްގެ މަތީ ފްލޯތައް ވެސް ވެއްޓިފައިވާ ކަމަށް އެ އިމާރާތުގައި އުޅޭ މީހެއް ކަމަށްވާ މައިކަލް ތޮމްޕްސަން ސެޓެލައިޓް ފޯނުން އޭއެފްޕީއަށް ދިން އިންޓަވިއުއެއްގައި ބުންޏެވެ. އޭނާ ވަނީ ލިބިފައިވާ ގެއްލުންތަކުގެ ފޮޓޯތައް ސޯޝަލް މީޑިއާގައި ވެސް ހިއްސާކޮށްފަ އެވެ.

"އިމާރާތްތަކުގެ ތެރޭގައި އެތައް ބަޔަކު އެބަތިބި. އިމާރާތްތަކުގެ ކައިރިން ދިޔައިރު އެ ތަންތަނުން މީހުންގެ މަރުވެފައިވާ ހަށިތައް ފެނުނު،" ތޮމްސްސަން ބުންޏެވެ.

މަގެއްގައި ބިންގަނޑު ކަނޑައިގެން ދިއުމުގެ ސަބަބުން ބަހެއް ގަނބައިގެން ގޮސްފައިވާ ކަމަށާއި އެހެންވެ އެ ހާދިސާގައި ވެސް ބަޔަކު މަރުވެފައިވާ ކަމަށް ބެލެވޭ ކަމަށް ބުންޏެވެ.

މި ބިންހެލުމުގެ ސަބަބުން ދެ ބްރިޖެއް ވެސް ވެއްޓިފައިވާ ކަމަށް ތޮމްސަން ބުންޏެވެ. އޭނާ ބުނީ ޑިޕްލޮމެޓިކް މިޝަންތައް ހުންނަ އިމާރާތެއް ބިމާ ހަމަވެފައިވާ ކަމަށެވެ.

"އެތަން މިހާރަކު ނެތް. ހަމަ އެއްކޮށް ބިމާ ހަމަވެފައި އޮތީ. އެންމެ މަތީ ތިން ފްލޯ ކޮންމެވެސް ގޮތަކަށް ހިފެހެއްޓިފައި އެބަހުރި. އެކަމަކު ގްރައުންޑް ފްލޯ ހަމަ އެއްކޮށް އޮތީ ފްލެޓްވެފައި،" އޭނާ ބުންޏެވެ.

އޭނާ ބުނީ އެތަނުގައި މީހަކު ހުރި ނަމަ އެ މީހަކު ސަލާމަތްވާނެ ކަމަށް ނުބެލެވޭ ކަމަށެވެ.

ބިންހެލުމާ ގުޅިގެން ސުނާމީގެ އިންޒާރު ނެރެފައިވާއިރު، ވަނުއާޓުގެ ބައެއް ސަރަހައްދުތަކަށް އެއް މީޓަރު (ތިން ފޫޓު) ގެ ރާޅު އަރާނެ ކަމަށް ލަފާކުރި ނަމަވެސް ޕެސިފިކް ސުނާމީ ވޯނިން ސެންޓަރުން ވަނީ އެ އިންޒާރު ވަރަށް އަވަހަށް އުވާލައިފަ އެވެ.

ޕެސިފިކްގެ ޖަޒީރާ ގައުމުތައް ކަމަށްވާ ފިޖީ، ކިރިބަތީ، ނިއު ކެލެޑޯނިއާ، ސޮލޮމަން އައިލެންޑްސް އަދި ޓުވާލޫ އަށް 30 ސެންޓިމީޓަރު (އެއް ފޫޓަށް) ވުރެ ކުޑަ ރާޅުތަކެއް ސުނާމީގެ ސަބަބުން އަރާނެ ކަމަށް ލަފާކޮށްފައިވެ އެވެ.

އާބާދީގައި 320،000 އުޅޭ ވަނުއަޓޫ އަކީ ޓެކްޓޮނިކް އެކްޓިވިޓީ ގިނަ "ރިންގް އޮފް ފަޔަ" ގެ މަތީގައި އޮންނަ، ބިންގަނޑު ތިރި ގައުމަކަށް ވާއިރު މިއީ އާންމުކޮށް ބިންހެލުން އަންނަ ހިސާބެކެވެ. ކޮންމެ އަހަރަކު ނެރޭ ވޯލްޑް ރިސްކް ރިޕޯޓުގައިވާ ގޮތުން ގުދުރަތީ ކާރިސާތައް ކަމަށްވާ ބިންހެލުމާއި ތޫފާނުގެ ގެއްލުންތަކާއި ފެންބޮޑުވުމާއި ސުނާމީ ފަދަ ކާރިސާތައް އެންމެ ބޮޑަށް ކުރިމަތިވާ ގައުމުތަކުގެ ތެރޭގައި ވާނުއާޓޫ ހިމެނެ އެވެ.