ރާއްޖޭގައި ވޭޕް މަނާކުރީ ރައްޔިތުން އެކަމަށް އެދޭތީ: ރައީސް

ރާއްޖޭގައި ވޭޕް މަނާކުރީ ރައްޔިތުންގެ އެކަމަށް އެދުމުން ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.

ދުންފަތް ކޮންޓްރޯލް ކުރުމާ ބެހޭ ގާނޫނަށް ގެނައި އިސްލާހާ އެކު، ރާއްޖޭގައި ވޭޕް ބުއިމާއި އޭގެ ވިޔަފާރިކުރުން މިއަދުން ފެށިގެން ވަނީ މަނާވެފަ އެވެ.

އދ. އަތޮޅަށް ރައީސް މިހާރު ކުރައްވަމުން ގެންދަވާ ދަތުރުފުޅުގައި އެ އަތޮޅު މަހިބަދޫ ރައްޔިތުންނާ ބައްދަލުކުރައްވައި އެ މަނިކުފާނު ވިދާޅުވީ ދުނިޔޭގައި އުފެދޭ ނުބައި ކަންތައް ދިވެހިންގެ ތެރެއަށް ވެސް އައިސްފައިވާ ކަމަށާއި އެކަންކަމުން ސަލާމާތްވާން ޖެހޭ ކަމަށެވެ.

ރައީސް ވިދާޅުވީ ވޭޕު ވިއްކުމަކީ ގާނޫނުން ހުއްދަކޮށްގެން ކުރަމުން އައި ވިޔަފާރިއެއް ކަމަށާއިި އެ ވިޔަފާރި ކުރި ފަރާތްތަކުގެ އެއްވެސް ކުށެއް ނެތް ކަމަށެވެ.

ވޭޕުގެ ވަބާއިން ގައުމު ސަލާމަތްކުރުމަކީ ރައްޔިތުން ކުރަން ބޭނުުންވެފައި ތިބި ކަމެއް ކަމަށާއި ވޭޕް މަނާކޮށް، ފިޔަވަޅު އެޅީ އާ ޖީލުތަކުގެ ދުޅަހެޔޮކަން ކަށަވަރުކުރުމުގެ މަގުސަދުގައި ކަމަށް ވެސް ރައީސް ވިދާޅުވި އެވެ.

"މިސާލަކަށް، ވޭޕްގެ ވަބާ. އަޅުގަނޑަށް އެނގޭ ގާނޫނީ ގޮތުން ހުއްދަ އޮވެގެން ކުރިން [ވޭޕްގެ] ވިޔަފާރި ކުރީ. އެ މީހުންގެ ނެތް ކުށެއް. އެހެން ނަމަވެސް، މި ގައުމަށް ވަރަށް ބޮޑު ގެއްލުމެއް ވަނީ. އެ ވިޔަފާރި ކުރި މީހުންގެ ކުށެއް ނެތް، އެހެން ނަމަވެސް، ގައުމުގެ ރައްޔިތުން ހާލުގެ ދުލުން އެދެމުން ދިޔައީ މިކަމުން ތިމަންނަމެންގެ ދަރިން ސަލާމަތްކޮށްދޭށޭ،" އެ މަނިކުފާނު ވިދާޅުވި އެވެ.

"އެހެންވީމާ އަޅުގަނޑުމެން ނިންމީ އެކަން ހުއްޓާލަން."

އިޖުތިމާއީ ގޮތުން ރަނގަޅުކުރަން ހުރި ކަންކަން ކުރުމަށް މަސައްކަތް ކުރައްވަމުން ގެންދަވާކަން ފާހަގަ ކުރައްވާ ރައީސް ވިދާޅުވީ ޑްރަގުގެ ވަބާއިން ޒުވާނުން ސަލާމާތް ކުރުމަކީ ވެސް ކުރަން ޖެހިފައި އޮތް ކަމެއް ކަމަށެވެ. ފަންސާހަކަށް އަގަރުވީ ޑްރަގް މައްސަލަ ހައްލުވާނީ އެކަމުން ނުކުންނަން އަޒުމު ކަނޑައަޅައިގެން މަސައްކަތްކޮށްގެން ކަމަށް ރައީސް މުއިއްޒު ވިދާޅުވި އެވެ.

ޑްރަގާ ދެކޮޅު ގާނޫނުތައް ހުރި ނަމަވެސް ގާނޫނުގައި ހުރި ބާގަނޑުތަކުގެ ސަބަބުން ބޭނުންވާ ގޮތަށް އެކަމުން ސަލާމަތްވާން މަސައްކަތް ނުކުރެވޭކަން ރައީސް ފާހަގަކުރެއްވި އެވެ.