އެންމެފަހުން ދެކުނު ކޮރެއާގެ ރައީސް އަޒުލްކޮށްފި

ދެކުނު ކޮރެއާގެ ރައީސް ޔޫން ސުކް ޔޯލް އަށް ކުރިމަތިވި ސިޔާސީ ޕްރެޝަރުން ސަލާމަތްވާން ކުއްލި ނުރައްކަލުގެ ހާލަތު އިއުލާންކުރައްވަން އުޅުއްވި މައްސަލައިގައި އޭނާގެ މައްޗަށް އިތުބާރު ނެތް ކަމަަށް މަޖިލީހުން މިއަދު ފާސްކޮށްފި އެވެ.

އިތުބާރު އޮތްތޯ ބަލަން މީގެ ހަފްތާއެއް ކުރިން ވެސް ވޯޓު ނަގަން މަސައްކަތްކުރި ނަމަވެސް ޔޫންގެ ޕާޓީގެ މެންބަރުން، ގާނޫނު ހަދާ މަޖިލީހުގެ ޖަލްސާ ބޮއިކޮޓްކުރުމުން ކޯރަމް ހަމަނުވެ ވޯޓަށް އެހޭ ގޮތް ނުވީ އެވެ.

ސިޔާސީ ބޮޑު ހައިޖާނެއްގެ ތެރޭގައި އޮތް ދެކުނު ކޮރެއާގައި މި މަހުގެ ތިން ވަނަ ދުވަހު ކުއްލި ނުރައްކަލުގެ ހާލަތު އިއުލާނުކުރި ނަމަވެސް އިދިކޮޅު ޕާޓީތަކުގެ ކޮންޓްރޯލް އޮތް މަޖިލީހުން ރައީސްގެ ގަރާރު ކުޑަ ވަގުތުކޮޅެއްގެ ތެރޭ ބާތިލްކުރީ އެވެ. އެއާ އެކު ދެން ފެށީ ޔޫން މަގާމުން ދުރުކުރުމުގެ މަސައްކަތެވެ. އިދިކޮޅު ޕާޓީތަކުން ބުނީ މިއަދުގެ ވޯޓަކީ ރައްޔިތުންނަށް ލިބުނު ކާމިޔާބީއެއް ކަމަށެވެ.

ޔޫންގެ އިތުބާރު ނެތް ކަމަށް ފާސްކުރަން ތައްޔާރުވަމުން ދިޔައިރު އޭނާއާ ދެކޮޅަށް އެތައް ހާސް ބަޔަކު ވަނީ މަގުތަކަށް ނުކުމެ އިސްތިއުފާ އަށް ގޮވައިފަ އެވެ.

ވޯޓަށް ފަހު ޓީވީން ދެއްވި ބަޔާނެއްގައި ޔޫން ވިދާޅުވީ އޭނާ "އެއްފަރާތަށް ޖެހޭނެ" ކަމަށެވެ. އެކަމަކު މާޝަލް ލޯ ހިންގަން އުޅުނު މައްސަލައިގައި މާފަށް އެދިވަޑައެއް ނުގަންނަވަ އެވެ.

މިއަދުގެ ވޯޓުގައި، ގާނޫނު ހަދާ މަޖިލީހުގެ 300 މެންބަރުންގެ ތެރެއިން 204 މެންބަރަކު ވަނީ ޔޫން މަގާމުން ވަކިކުރަން ފެންނަ ކަމަށް ވޯޓު ދެއްވައިފަ އެވެ. ނުފެންނަ ކަމަށް 85 ވޯޓު ދީފައި ވާއިރު ތިން މެންބަރަކު ވޯޓުގައި ބައިވެރިވެ ވަޑައެއް ނުގަންނަވަ އެވެ. އަދި އަށް ވޯޓެއް ވަނީ ބާތިލް ވެފަ އެވެ.

ދެކުނު ކޮރެއާގެ ގާނޫނުއަސާސީގައި އޮންނަ ގޮތުން، ރައީސަށް އިތުބާރު ނެތް ކަމަށް މަޖިލީހުން ފާސްކުރިޔަސް އަދި މަގާމުން ވަކިވީ ކަމަކަށް ނުބަލާނެ އެވެ. އެގޮތަށް ފާސްކުރުމާ އެކު ރައީސް ސަސްޕެންޑްވާނެ އެވެ. އަދި މަގާމުން ވަކިކުރުމާ މެދު ފަހު ބަސް ބުނާނީ ދުސްތޫރީ ކޯޓުންނެވެ. ކޯޓުން ގޮތެއް ނިންމަންދެން ރައީސް ހުންނާނީ ސަސްޕެންޝަނުގަ އެވެ.

ދުސްތޫރީ ކޯޓުން މިކަމުގައި 180 ދުވަސް ތެރޭ ގޮތެއް ނިންމަން ޖެހޭނެ އެވެ.

މަޖިލީހުގެ ނިންމުން ކޯޓުން ގަބޫލުކޮށްފި ނަމަ ޔޫން އަކީ ދެކުނު ކޮރެއާގެ ތާރީހުގައި ވެސް މިގޮތަށް މަގާމުން ވަކިކުރާ ދެ ވަނަ ރައީސަށް ވާނެ އެވެ.

ޒިންމާތަކުން ރައީސް އެކަހެރިވުމާ އެކު ވަގުތީ ގޮތުން ޒިންމާތަކާ ހަވާލުވެ ވަޑައިގަންނަވާ ބޮޑުވަޒީރު ހާން ޑަކް-ސޯ ނޫސްވެރިންނާ ބައްދަލުކުރައްވައި ވިދާޅުވީ، "ހަމަޖެހުން ގާއިމުކުރުމަށް ޓަކައި އަޅުގަނޑުގެ ހުރިހާ ހަކަތައެއް ބޭނުންކުރާނަން" ކަމަށެވެ.

އިމްޕީޗްމަންޓް ފާސްކުރަން 200 ވޯޓު ބޭނުންވާއިރު، އިދިކޮޅު މެމްބަރުން ބޭނުންވީ ޔޫންގެ ކޮންޒަވޭޓިވް ޕީޕަލްސް ޕަވާ ޕާޓީ (ޕީޕީޕީ)ގެ މަދުވެގެން އަށް މެމްބަރެއްގެ ވިސްނުން ބަދަލުކޮށް އިދިކޮޅުގެ ވޯޓުގައި ބައިވެރިކުރުވާށެވެ.