ބޭރު ފައިސާއާ ބެހޭ ބިލް ކޮމިޓީން ފާސްކޮށްފި

ޓޫރިޒަމް ދާއިރާއަށް ވަންނަ ޑޮލަރު ރާއްޖޭގެ ބޭންކްތައް މެދުވެރިކޮށް މާރު ކުރަންޖެހޭ ގޮތަށް ބޭރު ފައިސާއާ ބެހޭ ބިލް ރައްޔިތުންގެ މަޖިލީހުގެ މާލިއްޔަތު ކޮމިޓީން މިއަދު ފާސްކޮށްފި އެވެ.

އެ ބިލް ފާސްކުރީ ކޮމިޓީގައި ބައިވެރިވެ ވަޑައިގެންނެވި ހަ މެންބަރުންގެ ތާއީދާ އެކު އެވެ. ބޭރު ފައިސާއާ ބެހޭ ބިލް ކޮމިޓީން ފާސްކުރި އިރު، އެ ބިލްގެ މައިގަނޑު ބައިތަކަށް ބަދަލުތަކެއް ގެނެސްފައެއް ނުވެ އެވެ.

އެހެން ނަމަވެސް ބިލްގައި ހުރި ބައެއް މާއްދާތަކަށް ކޮމިޓީ މަރުހަލާގައި ކުދި ކުދި އިސްލާހުތައް ގެނެސްފައިވެ އެވެ. އެ އިސްލާހުތަކުގެ ތެރޭގައި، ޓޫރިޒަމް ހިދުމަތްދޭ ތަންތަނުގެ މައުލޫމާތުތައް އެމްއެމްއޭއިން ބޭނުންވާ ހިނދެއްގައި ޓޫރިޒަމް މިނިސްޓްރީން ފޯރުކޮށްދޭން ޖެހޭނެ ކަމަށް ވެސް ހިމަނައިފަ އެވެ.

އެ ބިލްގައިވާ ގޮތުން ބޭރު ފައިސާގެ އާމްދަނީ ބޭންކު އެކައުންޓަކަށް ޖަމާކޮށް، މާރުކުރަންޖެހޭ ފަރާތްތަކުގެ ތެރޭގައި ހިމެނެނީ ޓޫރިޒަމް ދާއިރާގެ ވިޔަފާރިތަކުގެ އިތުރުން މަދުވެގެން 15 މިލިއަން ޑޮލަރު އާމްދަނީ ލިބޭ ފަރާތްތަކަށެވެ.

ބޭރު ފައިސާ އިން ލިބޭ އާމްދަނީން ބައެއް މާރުކުރުމުގައި "ކެޓެގަރީ އޭ" ގައި ހިމެނޭ ރިސޯޓްތަކަށް ލިބޭ އިހުތިޔާރަކީ ކޮންމެ ޓޫރިސްޓެއްގެ ބޮލަކަށް 500 ޑޮލަރު މާރުކުރުން ނުވަތަ ކޮންމެ މަހެއްގެ ޖުމްލަ އާމްދަނީގެ 20 ޕަސެންޓް ޑޮލަރު މާރު ކުރުން ކަމަށް ބިލްގައިވެ އެވެ.

"ކެޓެގަރީ ބީ" ގެ ދަށުން ގެސްޓް ހައުސްތަކުން، ކޮންމެ ޓޫރިސްޓަކަށް 25 ޑޮލަރުގެ ރޭޓުން ނުވަތަ މަހެއްގެ ތެރޭގައި އެ ފަރާތަށް ލިބޭ ބޭރު ފައިސާގެ އާމްދަނީގެ 20 ޕަސެންޓް މާރުކުރަން ޖެހޭނެ ކަމަށް ބިލްގައި ކަނޑައަޅާފައިވެ އެވެ.

އެ ބިލްގައި ބުނީ އެމްއެމްއޭ އިން މިދިޔަ އޮކްޓޫބަރު މަހު އާންމުކުރި ބޭރު ފައިސާއާ ބެހޭ ގަވާއިދުގެ ދަށުން އޮކްޓޫބަރު، ނޮވެމްބަރު، އަދި ޑިސެމްބަރު މަހުގެ ނިޔަލަށް ޓޫރިޒަމް ހިދުމަތްދޭ ތަންތަން ބޭންކްތައް މެދުވެރިކޮށް ކަނޑައަޅާފައިވާ އަދަދަށް ޑޮލަރު މާރުކުރަން ޖެހޭނެ އެވެ.

ރައީސް ޑރ. މުހައްމަދު މުއިއްޒު ވަނީ ބޭރު ފައިސާއާ ބެހޭ ބިލް މަޖިލިސް ޗުއްޓީއަށް ދިއުމުގެ ކުރިން ފާސްކޮށްދެއްވާނެ ކަމަށް އުންމީދު ކުރައްވާ ކަމަށް ވިދާޅުވެފަ އެވެ.

އެ ބިލް ދިރާސާކުރުމުގެ މަރުހަލާގައި މިއަދު މަޖިލީހުން ވަނީ ބޭންކްތަކުން ޑޮލަރު މާރުކުރުމާ މެދު އެންމެ ބޮޑަށް ކަންބޮޑުވުން ފާޅުކުރި، މަޓީގެ ބޭފުޅުންނާ ވެސް މިއަދު ބައްދަލުކުރައްވައިފަ އެވެ. އެކަމަކު މަޓީގެ އެދުމުގެ މަތިން ކޮމިޓީ ވަނީ ސިއްރުކޮށްފަ އެވެ.