އިމިގްރޭޝަންގެ ބަޔަކު ބިދޭސީންނާ ގުޅޭ މަސައްކަތް ރިޝްވަތު ނަގައިގެން ކުރާ މައްސަލައެއް ތަހުގީގުކުރަނީ

ރިޝްވަތު ނަގައިގެން އިމިގްރޭޝަންގެ މުވައްޒަފުންތަކެއް ބިދޭސީންނާ ގުޅޭ މަސައްކަތްތަކެއް ކުރާ މައްސަލައެއް ތަހުގީގުކުރަން ފަށައިފި އެވެ.

ހޯމްލޭންޑު ސެކިއުރިޓީ މިނިސްޓަރު އަލީ އިހުސާން މިރޭ އެކްސްގައި ކުރެއްވި ޕޯސްޓުގައި ވިދާޅުވީ ޔުނިފޯމު އެޅި މުއައްސަސާތަކުގެ ތެރޭގައި ތިބެ ޔުނިފޯމުގެ ހުރުމަތްކަނޑައި، އާއްމުންގެ ކުރިމަތީ މުއައްސަސާތަކުގެ އިތުބާރު ގެއްލުވާލާ މީހުންނާ ދޭތެރޭ ގާނޫނީ އެންމެ ހަރުކަށި ފިޔަވަޅު އެޅުމަށް ރައީސް ޑރ. މުހައްމަދު މުއިއްޒު އަންގަވާފައިވާ ކަމަށެވެ.

އޭގެ ތެރެއިން، އިމިގްރޭޝަންގެ ފަސް މުވައްޒަފަކު ގާނޫނާއި ގަވާއިދުތަކާ ހިލާފަށް ބިދޭސީންނާ ގުޅުން ހުރި ބައެއް ކަންކަން ކޮށް، އެކި ފަރާތްތަކުން ނަހަމަ ގޮތުގައި ފައިސާ ހޯދާ ކަމަށް ތުހުމަތުކުރެވޭ ކަމުގެ މައުލޫމާތު ލިބުމުން ފުލުހުން މެދުވެރިކޮށް ތަހުގީގުކުރަމުންދާ ކަމަށް ވިދާޅުވި އެވެ.

މިނިސްޓަރު "މިހާރު" އަށް ވިދާޅުވީ ތަހުގީގުގެ ކުރީކޮޅަށް ވާތީ އެ މުވައްޒަފުންނަށް އަދި ފިޔަވަޅެއް ނާޅާ ކަމަށެވެ.

އޭނާ ވިދާޅުވީ އެ މުވައްޒަފުން ބޭނުންކުރާ އިލެކްޓްރޯނިކް ސާމާނު ހިފަހައްޓައި ދިރިއުޅޭ ތަންތަން ބަލައި ފާސްކޮށްފައިވާ ކަމަށެވެ.

"މި މައްސަލައިގެ އިތުރު ތަފްސީލުތައް ތަހުގީގު ކުރިއަށްދާވަރަކުން ފުލުހުންނާއި ކަމާބެހޭ އެހެން އިދާރާތައް ގުޅިގެން ހާމަކުރަމުންދާނެ ވާހަކަ ދަންނަވަން. އަދި ދައުލަތުގެ މުއައްސަސާތަކުގެ އިތުބާރު ގެއްލިދާނެ ފަދަ ކަންކަމުން ބަރީއަވެ ތިބުމަށް އެންމެހާ ފަރާތްތަކަށް ތަކުރާރުކޮށް ދަންނަވަން،" އޭނާގެ އެކްސް ޕޯސްޓުގައިވެ އެވެ.

އިހުސާން ވިދާޅުވީ އެ ފަދަ ކަންކަމަކީ މި ސަރުކާރުން އެއްވެސް ވަރަކަށް ތަހައްމަލު ކުރާނެ ކަމެއް ނޫން ކަމަށެވެ. މިދިޔަ ޖޫން މަހު ފުލުހުން ހިންގި އޮޕަރޭޝަނެއްގައި، މާފުށީ ޖަލަށް ވަގަށް ތަކެތި ވައްދައިގެން 70 މިލިއަނަށް ވުރެ ގިނަ ރުފިޔާ ހޯދިކަމުގެ ތުހުމަތުގައި ކަރެކްޝަންސްގެ 18 މީހަކު ހައްޔަރުކުރި އެވެ. އޭގެ ތެރެއިން ފަސް މީހެއްގެ މައްޗަށް ވަނީ ދައުވާކޮށްފަ އެވެ.