މައުލޫމާތު ނުދީފިނަމަ އިންފޮމޭޝަން އޮފިސަރުގެ މައްޗަށް ދައުވާކޮށް، ޖަލަށްލެވޭނެ: ކުރީގެ ޕީޖީ

އިންފޮމޭޝަން ކޮމިޝަނަރުގެ އެންގުމާ އެއްގޮތަށް އަމަލުނުކޮށް، މައުލޫމާތު ނުދީ 45 ދުވަސް ވަންދެން ހިފަހައްޓައިފިނަމަ އެ މައުލޫމާތެއް ހާމަނުކުރި އިންފޮމޭޝަން އޮފިސަރުގެ މައްޗަށް ޖިނާއީ ދައުވާ ކުރެވޭނެ ކަމަށް ކުރީގެ ޕްރޮސިކިއުޓާ ޖެނަރަލް ހުސެއިން ޝަމީމް ވިދާޅުވެއްޖެ އެވެ.

މައުލޫމާތު ހޯދައި ލިބިގަތުމުގެ ގާނޫނުގެ ދަށުން ދައުލަތުގެ ކޮންމެ އިދާރާއަކަށް ވެސް އެ މީހަކު ބޭނުންވާ މައުލޫމާތެއް ހޯދަން ހުށަހެޅުމުގެ ފުރުސަތު އޮވެ އެވެ. އެގޮތަށް ހުށަހަޅާ ހުށަހެޅުމަކަށް މައުލޫމާތު ދޭން ދެކޮޅު ހެދުމުން ނުވަތަ އެއްވެސް ޖަވާބެއް ނުދޭ ހާލަތުގައި ވެސް އެ މައްސަލައެއް އިންފޮމޭޝަން ކޮމިޝަނަރުގެ އޮފީހަށް ހުށަހެޅުމުގެ ފުރުސަތު ލިބެ އެވެ.

ކޮމިޝަނަރަށް ހުށަހަޅާ މައްސަލަތަކުގައި ހުޅުވާލައިގެން އަޑުއެހުންތައް ބޭއްވުމަށް ފަހު ގޮތް ނިންމަ އެވެ. ކޮމިޝަނަރުގެ ނިންމުމަކީ ދަށު ކޯޓެއްގެ ނިންމުމަކާ އެއްވަރުގެ ގާނޫނީ ބާރު އޮތް ނިންމުމެއް ކަމަށްވާއިރު، އެ އެންގުންތަކަށް ތަބާވުމަކީ ލާޒިމް ކަމެކެވެ. އާންމު ގޮތެއްގައި މައުލޫމާތު ދޭން އަންގާ އެންގުންތަކުގައި ކޮމިޝަނަރު އަންގަނީ ފަސް ދުވަހުގެ ތެރޭގައި މައުލޫމާތު ހާމަ ކުރުމަށެވެ.

އެ ނިންމުމާ މެދު ހިތްހަމަނުޖެހޭ ނަމަ، 30 ދުވަހުގެ ތެރޭގައި އެ މައްސަލައެއް ހައި ކޯޓުގައި އިސްތިއުނާފުކުރުމުގެ ފުރުސަތު އޮވެ އެވެ. ނަމަވެސް، މިފަހަކަށް އައިސް އިންފޮމޭޝަން ކޮމިޝަނަރުގެ ނިންމުންތަކަށް އަމަލުނުކޮށް އަދި މައްސަލަ އިސްތިއުނާފުނުކޮށް ތިބޭ މައްސަލަތައް ވަނީ ގިނަވެފަ އެވެ.

އެކަމަށް އިޝާރަތް ކުރައްވައި، ޝަމީމް އޭނާގެ ބްލޮގްގައި މިއަދު ލިޔުއްވާފައިވާ ގޮތުގައި، ކޮމިޝަނަރުގެ ނިންމުން ހައި ކޯޓުގައި އިސްތިއުނާފުކުރަން އޮންނަ މުއްދަތުގައި އިސްތިއުނާފު ނުކޮށްފިނަމަ އެ ނިންމުމަކީ ގާނޫނުގެ ބާރު ލިބިފައިވާ، އެއަށް ބަދަލެއް ނުގެނެވޭނެ ނިންމުމެއް ކަމަށެވެ. އޭނާ ވިދާޅުވި ގޮތުގައި އެފަދަ ނިންމުމަކަށް ތަބާނުވުމަކީ ވެސް އެކަމުގައި ގާނޫނީ ނަތީޖާތަކެއް ހުންނާނެ ކަމެކެވެ. ޝަމީމް ދެއްކެވީ މައުލޫމާތު ހޯދައި ލިބިގަތުމުގެ 65 ވަނަ މާއްދާ އެވެ.

އެ މާއްދާގައި ބުނެފައިވަނީ ކޮމިޝަނަރުގެ ނިންމުމަކާ މެދު އިސްތިއުނާފް ނުކޮށް އަދި އެ ނިންމުމަށް އަމަލު ވެސް ނުކޮށް ވަނިކޮށް، 45 ދުވަސް ފާއިތުވެއްޖެ ނަމަ، ގާނޫނީ ގޮތުން ކޮށްފައިވާ އަމުރަކަށް ނުކިޔަމަންތެރިވުމުން އަމަލުކުރާ އުސޫލުން އަމަލުކޮށްދިނުމަށްޓަކައި ކޯޓަށް ފޮނުވުމަށް އެދި ޕްރޮސިކިއުޓާ ޖެނެރަލްގެ އޮފީހަށް އިންފޮމޭޝަން ކޮމިޝަނަރަށް ހުށަހެޅިދާނެ ކަމަށެވެ.

ޝަމީމް ވިދާޅުވި ގޮތުގައި އެ ކުށަކީ ގާނޫނުލްއުގޫބާތުގައި ބަޔާންކުރާ ޖުނަހުގެ 1 ވަނަ ދަރަޖައިގެ ކުށެކެވެ. އޭގެ އަސާސީ އަދަބަކީ ހަތަރު މަހާއި 24 ދުވަހަށް ޖަލަށްލުމެވެ.

އެކަންކުރީ، ދައުލަތުގެ ހިންގުމުގެ އިސް މަގާމެއްގައި ހުރި މީހަކު ނަމަ، ގާނޫނުލްއުގޫބާތުގެ 1100 ވަނަ މާއްދާގެ ދަށުން އަދަބު ބޮޑުވުމުގެ ފުރުސަތު ވެސް އޮންނާނެ ކަމަށް ޝަމީމް ވިދާޅުވި އެވެ. އަދި ކުށް ތަކުރާރުކުރާ ނަމަ އަދަބު ބޮޑުވެ، އެ ކުށުގެ ޖުމުލަ އަދަބު އެއް އަހަރު ދުވަހުގެ ޖަލު އަދަބަކަށް ވެސް ބޮޑުވެދާނެ ކަން ވެސް ޝަމީމް ފާހަގަ ކުރެއްވި އެވެ.

"ގާނޫނު ބުނާގޮތުން ގާނޫނުގައި ބުނާ ދުވަހަށް މައުލޫމާތު ނުދޭ ވަގުތު، އެ ހިސާބުން ކުށް އޮންނަނީ ފުރިހަމަވެފައި. މާނައަކީ، މުއްދަތުގެ ފަހުން މައުލޫމާތު ދިނަސް ވެސް، ކުށުގެ ތަހުގީގުކޮށް، ފިޔަވަޅު އަޅަން ހުރަހެއް ނެތުމެވެ. ވީމާ ޚާރިޖީ ވުޒާރާއިން ހެއްދެވި ގޮތަށް، ވަގުތު ފާއިތުވާ ފަހުން މައުލޫމާތު ދިނުމަކީ ވެސް ކުށުން ސަލާމަތްވާ ކަމެއް ނޫނެވެ." ޝަމީމް ލިޔުއްވާފައިވެ އެވެ.

ޝަމީމް ޕީޖީގެ މަގާމުގައި ހުންނަވަނިކޮށް އިންފޮމޭޝަން ކޮމިޝަނަރުގެ އެންގުމަކަށް ރައީސް އޮފީހުން ތަބާނުވި މައްސަލައެއް އެ އޮފީހަށް ފޮނުވާފައިވެ އެވެ. އެ މައްސަލަ ތަހުގީގު ކުރަން އޭރު ޝަމީމް ފުލުހުންނަށް އެންގެވި އެވެ. ނަމަވެސް މިހާތަނަށް އެ މައްސަލާގައި ވަކި ގޮތެއް ކަނޑައަޅާފައެއް ނުވެ އެވެ.

މައުލޫމާތު ހޯދައި ލިބިގަތުމުގެ ގާނޫނުގެ ދަށުން ހޯދަން އެދޭ މައުލޫމާތު ނުދީ ހިފަހައްޓާ މައްސަލަ އަނެއްކާވެސް ބޮޑުވެފައިވަނީ ފޮރިން މިނިސްޓްރީއަށް އައްޔަން ކުރައްވާފައިވާ ސިޔާސީ މުވައްޒަފުންގެ އަދަދު ހޯދަން އެދުނު މައުލޫމާތު ނުދީ އެ މިނިސްޓްރީން ހިފަހައްޓާ މައްސަލަ "މިހާރު" ގައި ރިޕޯޓްކުރުމާ ގުޅިގެންނެވެ.

ފޮރިން މިނިސްޓްރީއަށް އައްޔަންކޮށްފައިވާ ސިޔާސީ މުވައްޒަފުންގެ ތަފްސީލު ހޯދަން "މިހާރު" އިން ފުރަތަމަ ހުށަހެޅި މައްސަލަ މިދިޔަ މަހުގެ 30 ވަނަ ދުވަހު ނިންމާފައިވީ ނަމަވެސް، މިހާތަނަށް ވެސް އެ މައުލޫމާތު ފޯރުކޮށްދީފައެއް ނުވެ އެވެ. އެ މައްސަލާގައި ވެސް އަންގާފައި އޮތީ ފަސް ދުވަހުގެ ތެރޭގައި މައުލޫމާތު ހާމަކުރުމަށެވެ.

އޭގެފަހުން ދެވަނަ ފަހަރަކަށް ފޮރިން މިނިސްޓްރީގައި ތިބި ސިޔާސީ މުވައްޒަފުންގެ ހަމައެކަނި އަދަދު ހޯދަން ހުށަހެޅި މައްސަލާގައި ވެސް މައުލޫމާތު ނުދީ ހިފެހެއްޓި އެވެ. ނަމަވެސް، އެކަން "މިހާރު" ގައި ރިޕޯޓް ކުރުމުން އެ މައުލޫމާތު ދޭން ރައީސް ޑރ. މުހައްމަދު މުއިއްޒު އެންގެވުމުން ފަހުން ވަނީ އެ މައުލޫމާތު ދީފަ އެވެ.