ޒަކިއްޔާގެ މަރަށް ދެ މަހަށް ވުރެ ގިނަ ދުވަސް: ވާނުވާ ނާންގާތީ ހޮޅުދޫން އިހުތިޖާޖަށް!

ނ. ހޮޅުދޫގައި ޒަހަމްތަކަކާ އެކު މަރުވެފައި އޮއްވައި ފެނުނު ޒަކިއްޔާ މޫސާގެ މަރުގެ މައްސަލައިގެ ތަހުގީގު ލަސްވެ، އެ ރަށުގެ ރައްޔިތުން މާދަމާ އިހުތިޖާޖަށް ނުކުންނަން ނިންމައިފި އެވެ.

އުމުރުން 50 އަހަރުގެ ޒަކަރިއްޔާ މަރުވެފައި އޮއްވައި ފެނުނީ އޭނާ ދިރިއުޅޭ ގޭގެ ބަދިގެ ފަރާތުގައި ހުރި ގުދަނެއްގެ ކައިރިން މިދިޔަ ސެޕްޓެމްބަރު މަހުގެ 10 ވަނަ ދުވަހު ހެނދުނު އެވެ.

ޒަކިއްޔާގެ ހަށިގަނޑުން ބޮޑެތި ޒަހަމްތަކެއް ފެންނަން ހުރި އިރު، އޭނާގެ މަރުގެ ތަހުގީގަށް ފުލުހުންގެ ހާއްސަ ޓީމެއް ވެސް މާލެ އިން ހޮޅުދު އަށް ދިޔަ އެވެ. އިތުރު ތަހުލީލުތަކަށް މާލެ އަށް ވެސް އޭނާގެ ހަށިގަނޑު ފުލުހުން ގެނަ އެވެ. އެކަމަކު ޕޯސްޓްމޯޓަމް ނަހަދައި ހަށިގަނޑު ރަށަށް ފޮނުވައިލުމާ އެކު ވަޅުލީ އެވެ.

އެ މަރަށް ދެ މަހަށް ވުރެ ގިނަ ދުވަސް ވިޔަސް ތަހުގީގު ކުރިއަށް ގެންދާ ކަމަށް ބުނެ ފުލުހުން އެ މައްސަލާގައި މީޑިއާއާ ވާހަކައެއް ނުދައްކަ އެވެ.

އެހެންވެ، ރަށު ތެރޭގައި އެކަމުގެ ކަންބޮޑުވުން ވަނީ ބޮޑުވެފަ އެވެ.

އެ މައްސަލާގައި ހޮޅުދޫން "މިހާރު" އާ ވާހަކަ ދެއްކި މީހަކު ބުނީ މާދަމާ ހަވީރު 4:15 ގައި ރަށުގެ ރައްޔިތުން ބޯޅަދަނޑަށް އެއްވެ އިހުތިޖާޖުކުރަން ނިންމާފއިވާ ކަމަށެވެ. އެއީ ޒަކިއްޔާގެ އާއިލާ އާއި ރަށުގެ ޒުވާނުންތަކެއް ގުޅިގެން ބާއްވާ ހަރަކާތެއް ކަމަށް އެ މީހާ ބުންޏެވެ.

"އަމިއްލައަކަށް ނޫން" ނަމުގައި ޒަކިއްޔާއަށް އިންސާފު ހޯދަން ގޮވާލައި މި އެއްވުން ބާއްވަނީ އޭނާ މަރުވީ އަމިއްލަ އަށް ކަމަށް އެ މީހުންނަށް ގަބޫލު ނުކުރެވޭތީ އެ ކަންބޮޑުވުންތައް އިއްވުމަށެވެ.

"މިހާރު" އާ ވާހަކަ ދެއްކި މީހާ ބުނީ ރަށު ތެރޭގައި ކަންބޮޑުވުން އޮތީ އެ މައްސަލާގައި މިހާތަނަށް މީހަކު ހައްޔަރު ނުކުރާތީ އާއި އެކަމުގައި ފުލުހުން ވެސް ވަކި އެއްޗެއް ނުބުނާތީ ކަމަށެވެ.

"ތަހުގީގު ލަސްވާތީ ކަންބޮޑުވުން އޮތީ. ފުލުހުން ވެސް މިހާތަނަށް ވަކި އެއްޗެއް ނުބުނޭ. އެހެންވީމާ ބަޔަކު ކުރި ކަމެއްތޯ ނޫނީ އެއީ ބަޔަކު ކުރި ކަމެއް ނަމަ އެ މީހުން ރަށު ތެރެއަށް ދޫކޮށްލާފައި ތިބުން އެއީ ކަންބޮޑުވުމަކީ،" އޭނާ ބުންޏެވެ.

އޭނާ ބުނި ގޮތުގައި އެ މައްސަލައާ ގުޅިގެން މީހަކު ހައްޔަރު ނުކުރާތީ ރަށުގެ މީހުން ތިބީ ނަފުސާނީ ވެފަ އެވެ.

ޒަކިއްޔާ މަރުވެފައި އޮއްވައި ފެނުނީ ގޭގެ ކުނި ނަގަން ވަން ބިދޭސީންތަކަކަށެވެ. އޭނާ މަރުވެފައި އޮތްއިރު ކަރުގައި ވަޅި އަޅައި ކައިރީގައި ވެސް ވަޅިއެއް އޮތް ކަމަށާއި އެ ވަޅީގައި ވެސް ކޮންމެވެސް ވަރަކަށް ލޭ ހުރި ކަމަށް އެ މަންޒަރު ދުށް މީހަކު "މިހާރު" އަށް ކުރިން ބުންޏެވެ.