ޕްރައިވެޓް އިންޝުއަރެންސަކަށް ބަދަލުކުރިޔަސް، ފުލުހުންނާއި ސިފައިން އަމިއްލަ އަތުން ހަރަދު ކުރާކަށް ނުޖެހޭނެ

ސިފައިންނާއި ފުލުހުންގެ މެޑިކަލް ވެލްފެއާ ސްކީމްގެ ހަރަދު އާދަޔާ ހިލާފަށް ބޮޑުވެ، ޕްރައިވެޓް އިންޝުއަރެންސް ނިޒާމަކަށް ބަދަލުކުރިޔަސް، އަމިއްލަ އަތުން ހަރަދެއް ކުރަން ނުޖެހޭނެ ކަމުގެ ޔަގީންކަން ފިނޭންސް މިނިސްޓަރު މޫސާ ޒަމީރު މިއަދު ދެއްވައިފި އެވެ.

އަންނަ އަހަރަށް ލަފާކޮށް ރައްޔިތުންގެ މަޖިލީހަށް ހުށަހަޅާފައިވާ ދައުލަތުގެ ބަޖެޓު ތަފްސީލުގައި ބުނެފައިވާ ގޮތުން، ސިފައިންނާއި ފުލުހުންގެ އާއިލާތަކަށް ޕްރައިވެޓް އިންޝުއަރެންސް ޕެކޭޖެއް ހަމަޖައްސައި، ދައުލަތުން ހަރަދު ކުރަން ޖެހޭ އަދަދު ކޮންޓްރޯލް ކުރަން ވަނީ ނިންމައިފަ އެވެ. ޕްރައިވެޓް އިންޝުއަރެންސް ހަމަވުމަށް ފަހު، އާސަންދަ ނިޒާމުގެ ތެރެއިން ވެސް ސިއްހީ ފަރުވާ ލިބޭނެ ކަމަށް ބުނެފައިވެ އެވެ.

ބަޖެޓާ ގުޅޭގޮތުން ބަޖެޓު ދިރާސާ ކުރާ މަޖިލީހުގެ ކޮމިޓީގެ މިއަދުގެ ބައްދަލުވުމުގައި ފިނޭންސް މިނިސްޓަރު ޒަމީރު ވިދާޅުވީ ސިފައިންނާއި ފުލުހުންގެ މެޑިކަލް ވެލްފެއާ ސްކީމަށް ބަދަލު ގެންނަން ރާވާފައި ވަނީ، ޕްރައިވެޓް ބަޔަކާ ހަވާލުކޮށްގެން ހަރަދު ކުޑަކޮށް، އެންމެ ރަނގަޅަށް އެކަން ކުރިއަށް ގެންދެވޭނެ ގޮތަށް ކަމަށެވެ.

އެކަމަކު އެ ބަދަލުގެ އެއްވެސް އުނދަގުލެއް ނޫނީ އުނި ކަމެއް ސިފައިންނާއި ފުލުހުންނަށް ނުފޯރާނެ ކަމުގެ ޔަގީންކަން ޒަމީރު ތަކުރާރުކޮށް ދެއްވި އެވެ.

"އިންޝުއަރެންސް ސްކީމެއް ނެގި ކަމުގައި ވިޔަސް، ލިމިޓު ހަމަވެއްޖެ ކަމަށް ވަންޏާ، އެ ހަރަދު ދައުލަތުން ކުރާ ގޮތަށް ރައީސުލްޖުމްހޫރިއްޔާ ރާއްވަވާފައި އޮތީ،" ޒަމީރު ވިދާޅުވި އެވެ.

"ސިފައިންނާއި ފުލުހުން އަތުން ހަރަދެއް ކުރަން ޖެހޭ ގޮތަކަށް ނޫން ރޭވިފައި އޮތީ."

ޒަމީރު ވިދާޅުވި ގޮތުގައި، މި ނިޒާމަށް ގެންނަ ބަދަލުގެ އެއްވެސް އިހުސާސެއް ފުލުހުންނާއި ސިފައިންނަށް ނުވާނެ އެވެ.

ސިފައިންނާއި ފުލުހުންގެ އިންޝުއަރެންސަށް މިދިޔަ އަހަރަށް ކަނޑައެޅި ބަޖެޓަށް ވުރެ 35 ޕަސެންޓް އިތުރަށް ހޭދަކޮށްފައިވާ ކަމަށް އޮޑިޓަ ޖެނެރަލްގ އޮފީހުގެ ރިޕޯޓުގައި ފާހަގަކޮށްފައިވެ އެވެ. އެ އޮފީހުން ބުނެފައިވާ ގޮތުގައި ބަޖެޓުގައި އިތުރު އިންޝުއަރެންސްތަކަށް 179 މިލިއަން ރުފިޔާ ކަނޑައަޅާފައިވާ އިރު އަހަރު ނިމުނު އިރު އެ އަދަދު ހުރީ 241 މިލިއަން ރުފިޔާގަ އެވެ.

ސިފައިންނާ ފުލުހުންނާއި އެ މީހުންގެ އާއިލާތަކަށް 2019 ވަނަ އަހަރު 148 މިލިއަން ރުފިޔާ ހަރަދުކޮށްފައިވެ އެވެ. އެހެންވެ، މިދިޔަ ފަސް އަހަރު ތެރޭގައި ސިފައިންނާއި ފުލުހުންގެ އިންޝުއަރެންސަށް ކުރި ހޭދަވަނީ ގާތްގަނޑަކަށް 40 ޕަސެންޓަށް އިތުރުވެފަ އެވެ.