ސިންގަޕޫރު ކުއްޖާ މަރުވީ ދޯނި ފަހަތަށް ޖެހުމުން ބުރަފަތީގައި ތާށިވެގެން

ސިންގަޕޫރުގެ ސެއިންޓް ޖޯސެފްސް އިންސްޓިޓިއުޓް (އެސްޖޭއައި) އިންޓަނޭޝަލްގެ ދަރިވަރުން ސްކޫލް ޓްރިޕެއްގައި އދ. ދިގުރަށަށް ގޮސް އުޅެނިކޮށް އޭގެ ތެރެއިން ކުއްޖަކު ދޯންޏެއްގެ ބުރަފަތީގައި ޖެހި މަރުވި ހާދިސާ ހިނގީ ކުދިން މޫދަށް ބޭލުމަށް ފަހު ދޯނި ފަހަތަށް ޖެހުމުން ކަމަށް އެ މަންޒަރު ދުށް މީހަކު ބުނެފި އެވެ.

ސްކޫލްގެ ވޭލް ޝާކް ޕްރޮޖެކްޓެއްގައި ރާއްޖެ އައި ކުދިންގެ ތެރޭގައި ހިމެނުނު 15 އަހަރުގެ އަންހެން ކުއްޖާގެ މަރުގެ ހާދިސާއާ ބެހޭ ގޮތުން ރާއްޖޭގެ ފުލުހުން ބުނެފައި ވަނީ އެ ކުއްޖާ މަރުވީ "ސްނޯކްލިން އަށް ގޮސް ދޯނިން މޫދަށް ފުންމާލި ވަގުތު ދޯނީގެ ބުރަފަތީގައި ޖެހި ޒަހަމްވެގެން" ކަމަށެވެ.

ފުލުހުންނަށް އެ ހާދިސާ ރިޕޯޓްކޮށްފައިވަނީ ހެނދުނު 9:55 ހާއިރު ކަމަށާއި ޒަހަމްވި ކުއްޖާ ހެލްތު ސެންޓަރަށް ގެންދިޔައިރު ވެސް މަރުވެފައިވާ ކަމަށް ހެލްތު ސެންޓަރާ ހަވާލާދީ ފުލުހުން އެ ދުވަހު ބުންޏެވެ.

"މިހާރު" އަށް މައުލޫމާތު ހިއްސާކުރި މީހަކު ބުނި ގޮތުގައި އެ ހާދިސާ ހިނގީ ކުއްޖާ މޫދަށް ފުންމާލި ވަގުތަކު ނޫނެވެ.

"ކުދިން ތިބީ ކޯމަސްތަކެއް ދުވަމުން ދާތީ އެ މަންޒަރު ބަލަން. އޭގެ ތެރެއިން އެއް ކޯމަސް ފުންމައި ކުޅެމުން ގޮސް އެހެން ކޯމަސްތަކާ ވަކިވީމާ ކުދިން ތިބީ ވަރަށް ޝައުގުވެރިކަމާ އެކު އެ މަންޒަރު ބަލަން. ކޯމަސްތަކާ ދޯނި ކައިރިކޮށްފައި ކުދިން މޫދަށް ފޭބީ ދޯނީގައި ތިބި ތިން ގައިޑުން ހުއްދަ ދިނުމުން،" އޭނާ ކިޔައިދިނެވެ.

އޭނާ ބުނީ ކޯމަސްތަކާ އެކު ފަތާލަން ލިބުމުން ކުދިން ތިބީ ވަރަށް އުފާވެފައި ކަމަށެވެ.

އެހެންވެ ގައިޑުން އެކަމަށް ހުއްދަ ދިނުމާ އެކު ފުރަތަމަ މޫދަށް އެރެން ތައްޔާރުވީ ހަ ކުއްޖަކު ކަމަށެވެ.

"އޭރު ހުރިހާ ކުދިން ވެސް ތިބީ ދޯނީގައި ލައިން ހަދައިގެން އިށީނދެ. އިންޖީނު ނިއްވާލާފައި ހުރީ،" މަންޒަރު ދުށް މީހާ ބުންޏެވެ.

އެކަމަކު އޭނާ ބުނީ މި ހާދިސާ ހިނގީ ފުރަތަމަ މޫދަށް އެރެން އުޅުނު ސްކޫލް ސްޓާފުންނާއި ހުރިހާ ދަރިވަރުން މޫދަށް ނުވެސް އެރި އުޅެނިކޮށް ކަމަށެވެ.

"އެއް ބަަޔަކު މޫދަށް އެރުނު ތަނާ ކުއްލިއަކަށް އިންޖީން ސްޓާޓްކޮށްލީ،" ހާދިސާ ކައިރިން ފެނުނު އެ މީހާ ކިޔައިދިނެވެ.

އެކަމަކު ކުދިން މޫދަށް ފައިބައި ނުނިމެނީސް ދޯނި ސްޓާޓްކޮށްލީ ކާކު ކަމެއް އަދި ކީއްވެގެން ކަމެއް ނޭނގެ އެވެ.

މޫދަށް އެރި އުޅުނު ކުދިންނަށް ނުރައްކާވާ އެތައް ކަމެއް ދޯނި ދުއްވި މީހުންގެ ފަރާތުން ކުރިމަތިވި ކަމުގެ ޝަކުވާ ވެސް އޮތުމާ އެކު މިއީ ވެސް އެ ފަރުވާ ކުޑަކަމުގެ ތެރެއިން ހިނގި ކަމެއްގެ ގޮތުގައި ސިންގަޕޫރުގެ ޓީމުން ވަނީ ކަންބޮޑުވުން ފާޅުކޮށްފަ އެވެ.

ހާދިސާ ކިޔައިދިން މީހާ ބުނި ގޮތުގައި ދޯނި ފަހަތަށް ޖެހުމާ އެކު "ސްޓޮޕް، ސްޓޮޕް" އޭ ގޮވައި ދޯނި ހުއްޓަން އެދި ސިންގަޕޫރު މީހަކު ގޮވަމުން ދިޔަ އެވެ.

"އޭރު މޫދުގައި ތިބި ކުދިންތަކުގެ ތެރެއަށް ދޯނި މަޑުމަޑުން އޮވެ ވަދެގެން ދަނީ. ދޯނި ހުއްޓަން ގޮވި މީހާ ދެން ގޮވަން ފެށީ މަރުވި ކުއްޖާގެ ނަމުން. އެ ކުއްޖާ ކޮބައިހޭ ގޮވަމުން ގޮސް ދޯނީގެ ފަހަތުން ބުރަފައްޗާ ދިމާލުން ގުދުވެ ބަލާފައި ބުނީ އެ ކުއްޖާ ބުރަފަތީގައި ތާށިވެފައި އެބަ އޮތް ކަމަށް،" އޭނާ ބުންޏެވެ.

ދޯނީގައި ރާއްޖޭގެ ގައިޑުން ތިބި ނަމަވެސް ކުއްޖާ ނަގަން އެންމެ ފުރަތަމަ މޫދަށް ފުންމާލީ ވެސް ކުދިންނާ ހަވާލުވެގެން އައިސް އުޅުނު ސިންގަޕޫރު މީހެއް ކަމަށް ބުންޏެވެ.

މި މައްސަލައިގައި މިހާތަނަށް ތަހުގީގު ކުރިއަށް ގޮސްފައިވާ ހިސާބަކާ ގުޅޭ ގޮތުން ސުވާލުކުރުމުން ފުލުހުންގެ މީޑިއާ އޮފިޝަލަކު ވިދާޅުވީ "މައްސަލައިގެ އަޕްޑޭޓެއް މިވަގުތު ނެތް" ކަމަށާއި "މައްސަލަ ދަނީ ތަހުގީގުކުރަމުން" ކަމަށެވެ.

ސިންގަޕޫރުގެ ސްޓްރެއިޓްސް ޓައިމްސް އިން ރިޕޯޓްކޮށްފައިވާ ގޮތުގައި ރާއްޖެ އައީ "ނެޝަނަލް ޔޫތު އެޗީވްމަންޓް އެވޯޑް" ގައި ހިމެނޭ ގްރޭޑް 9 ގެ ދަރިންވަރުންގެ ޓީމެކެވެ. ކުއްޖާ މަރުވި ހާދިސާއާ ގުޅިގެން ސްކޫލްގެ ވެރިންނާއި މަރުވި ކުއްޖާގެ ބެލެނިވެރިން ވެސް ރާއްޖެ އައިސް ހާދިސާއާ ބެހޭ މައުލޫމާތު ވަނީ ހޯދައިފަ އެވެ.

ރާއްޖެއަށް އަންނަ ޓޫރިސްޓުންނަށް އެކްސްކާޝަން ހިދުމަތް ދިނުމުގައި އަމަލުކުރާނެ މިންގަނޑުތަކެއް ނޯންނަ އިރު ސްނޯކްލިން އާއި ޑައިވިންގެ ތެރޭގައި ޓޫރިސްޓުން މަރުވުމުގެ އެތައް ހާދިސާއެއް ވަނީ ހިނގައިފަ އެވެ. ނުބެލެހެއްޓޭ ވަރަށް ގިނައިން މީހުން ގެންދިއުމާއި ޓޫރިސްޓުންނަށް ރަނގަޅަށް މައުލޫމާތު ނުދެވުން ފަދަ ކަންކަމުގެ ޝަކުވާ މިފަަދަ ހާދިސާތަކާ އެކު އަބަދުވެސް އާދެ އެވެ.