އުވާލާ ޕާޓީއެއްގެ ކުލަ ފަސް އަހަރު ވަންދެން ބޭނުން ނުކުރެވޭ ގޮތް ހަދަނީ

ސިޔާސީ ޕާޓީއެއް އުވާލާތާ ފަސް އަހަރުގެ ތެރޭގައި އެ ޕާޓީއެއްގެ ކުލަ އާއި ނިޝާން ބޭނުން ނުކުރެވޭ ގޮތަށް ސިޔާސީ ޕާޓީތަކުގެ ގާނޫނަށް އިސްލާހެއް ހުށަހަޅައިފި އެވެ.

އެ އިސްލާހު ހުށަހަޅާފައި ވަނީ މަޖިލީހުގެ ކޮމިޓީ މަރުހަލާގައި މި ވަގުތު އޮތް ސިޔާސީ ޕާޓީތަކުގެ ގާނޫނަށް ހުށަހެޅި އިސްލާހު ގެނައުމުގެ ބިލަށެވެ.

މިއަދު ބޭއްވި މުޅި މަޖިލީހުގެ ކޮމިޓީގައި ޕާޓީތަކުގެ ކުލަ އާއި ނަމާއި ލޯގޯ އަދި އެހެނިހެން ނިޝާންތައް ބޭނުން ނުކުރެވޭ ގޮތަށް އިސްލާހު ހުށަހެޅީ ފަރެސްމާތޮޑާ ދާއިރާގެ މެންބަރު އަޝްރަފް ރަޝީދެވެ. އެ ހުށަހެޅުމަށް މަޖިލީހުގައި އެވަގުތު ތިއްބެވި 41 މެންބަރުން ވޯޓު ދެއްވި އެވެ.

އެ އިސްލާހުގައި ދެން އޮތީ ސިޔާސީ ޕާޓީތަކަށް ފިޔަވަޅު އަޅައި ޖޫރިމަނާ ކުރުމާއި ޕާޓީތަކަށް ދައުލަތުގެ ބަޖެޓުން ކަނޑައަޅާ އަދަދު ކުޑަ ކުރުމަށް ހުށަހަޅައިފަ އެވެ.

އެގޮތުން ގާނޫނާ ހިލާފުވެއްޖެ ނަމަ އެ އަމަލެއް ހިންގި މީހާ ޖޫރިމަނާ ކުރުމުގެ އިތުރުން ޕާޓީ 100،000ރ. އިން ޖޫރިމަނާ ކުރެވޭނެ ކަމަށް އެ އިސްލާހުގައި ބުނެފައިވެ އެވެ. އަދި ކުރިން ދައުލަތުގެ ބަޖެޓުގެ ޖުމްލަ އަދަދުން 0.1 ޕަސެންޓު ސިޔާސީ ޕާޓީތަކަށް ދޭންޖެހޭ ގޮތަށް އޮތް މާއްދާ ދައުލަތުގެ އާމްދަނީގެ 0.1-0.2 އަކާ ދެމެދުގެ އަދަދަަކަށް ހެދުމަށް ވަނީ ހުށަހަޅައިފަ އެވެ.

އުވާލާ ޕާޓީގެ ނަމާއި ކުލަ އާއި ނިޝާން ބޭނުން ނުކުރެވޭ ގޮތް ހަދަން އިސްލާހެއް ހުށަހަޅާފައިވާ އިރު މި ފަހުން ޕީޕީއެމް އުވާލުމުގެ މަޝްވަރާތަކެއް ވެސް ވަނީ ކޮށްފަ އެވެ.