ރައްޔިތުންނަށް ލިބިފައިވާ ބާރުތައް ދަމަހައްޓަން އާ ހިތްވަރާއެކު މަސައްކަތްކުރަން ޖެހިއްޖެ: އިބޫ

ރައްޔިތުންނަށް ލިބިދީފައިވާ ބާރުތައް ދެމެހެއްޓުމަށް މިއަދު އާ ހިތްވަރާ އެކު، މަސައްކަތްކުރަން ޖެހިފައިވާ ކަމަށް ކުރީގެ ރައީސް އިބްރާހިމް މުހައްމަދު ސޯލިހު (އިބޫ) މިއަދު ވިދާޅުވެއްޖެ އެވެ.

މި އަހަރުގެ ޖުމްހޫރީ ދުވަހުގެ ތަހުނިޔާ ފޮނުއްވައި އިބޫ އެކްސްގައި ކުރެއްވި ޕޯސްޓެއްގައި ވިދާޅުވީ ޖުމްހޫރިއްޔަތެއްގައި ދައުލަތުގެ ބާރުތައް ފެށެނީ ރައްޔިތުންގެ ކިބައިން ކަމަށެވެ.

އެހެންވެ، ގައުމުގެ ހުރިހާ ކަމެއްގައި ރައްޔިތުންނަށް ލިބިދީފައިވާ ބާރުތައް ދެމެހެއްޓުމަކީ ޖުމްހޫރިއްޔަތުގެ އެންމެ މުހިއްމު އަސާސްކަމުގައި ވާތީ މިއަދު އެ މަސައްކަތް އާ ހިތްވަރާއެކު ކުރަންޖެހިފައިވާ ކަމަށް އެ މަނިކުފާނު ވިދާޅުވި އެވެ.

ރައްޔިތުންނަށް ލިބިފައިވާ ބާރުތައް ދެމެހެއްޓުމަށް އާ ހިތްވަރާއެކު މަސައްކަތްކުރަންޖެހޭ ކަމަށް ކުރީގެ ރައީސް ވިދާޅުވިއިރު، މި ސަރުކާރުގެ ވިސްނުމަކީ ކައުންސިލަރުންގެ އަދަދު މަދުކުރުމެވެ. ނަމަވެސް، މަޖިލީހުގެ ލާމަރުކަޒީ ކޮމިޓީގައި އެލްޖީއޭގެ އިސްވެރިން އޭގެ ކުރިން ވަނީ ކައުންސިލަރުންގެ އަދަދު މަދުވުމަކީ އާއްމުންގެ ބައިވެރިވުން ކުޑަވާނެ ކަމަކަށް ވާތީ، ކައުންސިލަރުންގެ އަދަދު މަދުކުރަން ނުފެންނަ ކަމަށް ވިދާޅުވެފަ އެވެ.

ނަމަވެސް ކައުންސިލަރުންގެ މުސާރަ އަށް ބޮޑު ހޭދައެއް ކުރަން ޖެހޭއިރު، ކުދިކުދި ރަށްރަށަށް ވެސް ގިނަ ކައުންސިލަރުންތަކެއް ލައިގެން މާ ބޮޑު މަސައްކަތެއް ނެތި ތިބެން ޖެހުމަކީ ސަރުކާރުގެ ކަންބޮޑުވުމެކެވެ.

ޖުމްހޫރީ ދުވަހުގެ ގޮތުގައި ނޮވެމްބަރު 11 ފާހަގަކުރަމުން މި އަންނަނީ 1968 ގައި ފެށި ޖުމްހޫރީ ވެރިކަމާ ގުޅުވައިގެންނެވެ.

މިހާރު މި ފާހަގަކުރާ ޖުމްހޫރީ ދުވަސް ގުނަން ފެށީ މުހައްމަދު ފަރީދުގެ ރަސްކަމަށް ފަހު އެކުލަވާލި ގާނޫނުއަސާސީގައި ވެރިކަމުގެ ނިޒާމަކީ ޖުމްހޫރިއްޔަތެއް ކަމަށް ކަނޑައަޅައި އޭގެ ދަށުން ރައީސްކަމަށް އިންތިހާބުކުރި އިބްރާހިމް ނާސިރު ރައީސްކަމުގެ ހުވާ، ނޮވެމްބަރު 11، 1968 ގައި ކުރެއްވި ހިސާބުންނެވެ