ގައުމީ ޝޫޓިން ޗެމްޕިއަންޝިޕަށް އާއްމުންގެ ބޮޑު ތަރުހީބެއް

ސޯޝަލް ސެންޓަރުގައި މިހާރު ކުރިއަށްދާ އަމާޒަށް ބަޑި ޖެހުން (ޝޫޓިން) ގައުމީ މުބާރާތަށް އާއްމުންގެ ބޮޑު ތަރުހީބެއް ލިބިއްޖެ އެވެ.

މުޅިން އަލަށް، އާއްމުންނަށް ހުޅުވާލައިގެން ކުރިއަށް ގެންދާ ގައުމީ ޝޫޓިން ސްޕޯޓްސް ޗެމްޕިއަންޝިޕްގައި ކުޅިވަރަށް ޝައުގުވެރިކަން ހުންނަ އެކި އުމުރުފުރާގެ ގިނަ ބަޔަކު ވަނީ ބައިވެރި ވެފަ އެވެ. މުބާރާތް ކުރިއަށް ގެންދަނީ 270 އަށް ވުރެ ގިނަ ބައިވެރިންނާ އެކު އެވެ.

އާންމުންގެ ބައިވެރިވުން ބޮޑު މި މުބާރާތަށް ބައިވެރިން ތަމްރީނުކުރަން، އެސޯސިއޭޝަނުން ވަނީ ކޯޗުންގެ އެހީއާ އެކު ތަމްރީނު ޕްރޮގްރާމްތައް ވެސް ކުރިއަށް ގެންގޮސްފަ އެވެ.

މި މަހުގެ ފަސްވަނަ ދުވަހުގެ ރޭ މުބާރާތް ރަސްމީކޮށް ފެށުމުގެ ރަސްމިއްޔާތު ޝަރަފްވެރި ކޮށްދެއްވީ ޝޫޓިން އެސޯސިއޭޝަންގެ ރައީސް މޭޖާ ޖެނެރަލް ރިޓަޔާޑް ހާމިދު ޝަފީގް އެވެ.

މި މަހުގެ 25 އާ ހަމައަށް ކުރިއަށްދާ މުބާރާތުގެ އިވެންޓްތައް ކުރިއަށް ދަނީ ތިން ކެޓެގަރީއަކަށް ބަހާލައިގެންނެވެ. އެއީ އޯޕަން ކެޓެގަރީ އާއި ޖޫނިއާ ކެޓެގަރީގެ އިތުރުން ޔޫތު ކެޓެގަރީ އެވެ.

ރާއްޖޭގައި ގައުމީ ޝޫޓިން އެސޯސިއޭޝަން އުފެދުނީ 1993 ވަނަ އަހަރެވެ. ރާއްޖޭގެ ދިފާއީ ބާރު، އެމްއެންޑީއެފްގެ ބެލުމުގެ ދަށުން ހިންގާ ޝޫޓިން އެސޯސިއޭޝަނުން އަންނަނީ ބައިނަލްއަގުވާމީ މުބާރާތްތަކުގައި ވެސް ރާއްޖެ ތަމްސީލު ކުރަމުންނެވެ.