އަމާޒަށް ބަޑިޖެހުމުގެ ތަމްރީން ހަދަން ޒުވާން ތިން ޝޫޓަރުން ކުވޭތަށް

އޭޝިއަން ޝޫޓިން ކޮންފެޑެރޭޝަން (އޭއެސްސީ) އިން ކުވޭތުގައި ކުރިއަށްގެންދާ ރައިފަލުން ބަޑި ޖެހުމުގެ ތަމްރީން ޕްރޮގްރާމެއް ފުރިހަމަކުރަން ރާއްޖޭގެ ޝޫޓިން އެސޯސިއޭޝަނުން ޒުވާން ތިން ކުއްޖަކު މިއަދު ކުވޭތު ސިޓީ އަށް ފުރުވައިފި އެވެ.

ޝޫޓިން އަކީ ހަމައެކަނި ސިފައިން ބައިވެރިވާ ކުޅިވަރެއްގެ ގޮތުގައި މިހާތަނަށް ރާއްޖޭގައި އޮތް ނަމަވެސް އެ ސަގާފަތް މަޑުމަޑުން ބަދަލުކުރަން އެސޯސިއޭޝަނުން އަންނަނީ މަސައްކަތްކުރަމުންނެވެ. އެގޮތުން 2014 ވަނަ އަހަރު ވެސް ވަނީ ސިފައިންގެ އަށް ނިސްބަތް ނުވާ ޝޫޓަރުންތަކަކަށް ރާއްޖޭން ބޭރުން ތަމްރީން ދީފަ އެވެ.

ޝޫޓިން އެސޯސިއޭޝަނުގެ އެގްޒެކެޓިވް ކޮމިޓީ މެމްބަރު އަދި ގައުމީ ކޯޗު އިބްރާހިމް ސަވާދު ބުނީ ހުޅުމާލޭގައި ޝޫޓިން ރޭންޖެއް ގާއިމްކުރުމުގެ ޕްލޭނެއް އެބައޮތް ކަމަށާއި ކުރިމަގުގައި އާއްމުންގެ ތެރެއިން މިކަމަށް ޝައުގުވެރިވާ ފަރާތްތަކަށް އެ ފުރުސަތު ދޭނެ ކަމަށެވެ.

މިއަދު ކުވޭތަށް ފުރީ މޯލްޑިވްސް ނެޝަނަލް ކެޑޭޓް ކޯގެ ދެ މެމްބަރުން ކަމަށްވާ ސީއެޗްއެސްސީގެ ގްރޭޑް 12 ގައި ކިޔަވަމުން އަންނަ އައިޝަތު ރަނީން އައިޝް އާއި މިދިޔަ އަހަރު ޖަމާލުއްދީން ސްކޫލް ނިންމާލި މުހައްމަދު ޔާނިއު އަހުމަދު އަދި އަމީނިއްޔާ ސްކޫލުގެ ގްރޭޑް 10 ގެ ދަރިވަރު އައިޝަތު ޔޫހާ އިމްތިޔާޒެވެ. ތިން ބައިވެރިންނާ އެކު ކޯޗެއްގެ ގޮތުގައި ދިޔައީ ގައުމީ ޓީމުގެ ސީނިއާ ޝޫޓަރު އަދި ޖޫނިއާ ކޯޗު އެމްއެންޑީއެފްގެ ސްޓާފް ސާޖަންޓް އިބްރާހިމް ސިމާދެވެ.

މިއަދުން ފެށިގެން މި މަހުގެ 27 އަށް ކުރިއަށްގެންދާ މި ތަމްރީން ކޭމްޕުގައި ޝޫޓަރުންނަށް ޕްރެކްޓިކަލް ތަމްރީން ދޭއިރު ޝޫޓަރުންނާއި ކޯޗުން މަނާބޭހަށް އަހުލުވެރިކޮށް އަދި ނަފްސާނީ ގޮތުން ތައްޔާރުވުމަށް ހާއްސަ ތަމްރީން ދޭނެ އެވެ. މީގެ އިތުރުން ކޯޗުންނަށް ހާއްސަ ޓެކްނިކަލް ސެޝަންތަކެއް ވެސް އޮންނާނެ އެވެ.

މި ކޯހަށް ފުރުމުގެ ކުރިން ތިން ބައިވެރިންނަށް ވަނީ ސިފައިންގޭގެ ޝޫޓިން ރޭންޖުގައި ވެސް އެކަށީގެންވާ ތަމްރީން ދީފަ އެވެ. ކުވޭތަށް ފޮނުވަން ކުދިން ހޮވާފައިވަނީ ކެޑޭޓް ކޯ އިން ބޭއްވި 18 ބައިވެރިންގެ ސިލެކްޝަނުންނެވެ.

ޝޫޓިން އިން ވަނީ ރާއްޖެ އަށް ބައިނަލްއަގްވާމީ މުބާރާތްތަކުގައި ރަނގަޅު ކާމިޔާބީތަކެއް ހޯދައިދީފަ އެވެ. އެކަމުގެ އަގުވަޒަންކޮށް މޯލްޑިވްސް އޮލިމްޕިކް ކޮމިޓީން ވަނީ 2010 ވަނަ އަހަރުގެ ސައުތު އޭޝިއަން ގޭމްސްގައި ރާއްޖޭގެ ދިދަ އުފުލުމުގެ ޝަރަފް ރާއްޖޭގައި އުފެދުނު އެންމެ ކާމިޔާބު އެއް ޝޫޓަރު އަހުމަދު މުމްތާޒަށް ދީފަ އެވެ.