ނޯތު ކާފް ޒޯންގެ ޗެމްޕިއަންކަން އޮބްލޫ ސިލެކްޓް ސަންގެލި އަށް

ދިރާގު ޓެކާސް ރިސޯޓް ފުޓްސަލް ކަޕް 2024 ގެ ނޯތު ކާފް ޒޯންގެ ޗެމްޕިއަންކަން އޮބްލޫ ސިލެކްޓް ސަންގެލި ހޯދައިފި އެވެ.

މީރު މޯލްޑިވްސްއާ ދެކޮޅަށް ކުޅެ 2-2 އިން އެއްވަރުވި ފައިނަލް މެޗު ސަންގެލި ކާމިޔާބުކުރީ، ޕެނަލްޓީ ޝޫޓައުޓްގައި 4-3 އިން ކުރި ހޯދައިގެންނެވެ. މެޗުގެ މޮޅު ކުޅުންތެރިއަކަށް ހޮވުނީ ސަންގެލިގެ ކެޕްޓަން މުހައްމަދު ޝައުފާން އެވެ.

ޒޯންގެ އެންމެ މޮޅު ކުޅުންތެރިއަކަށް ހޮވުނީ ސަންގެލި ޓީމްގެ އަބްދުﷲ ޒަމީން އެވެ. އެންމެ މޮޅު ކޯޗަކަށް ސަންގެލި ޓީމްގެ އަބްދުލް މާޖިދު ހޮވުނު އިރު، ފެއާ ޕްލޭ ޓީމަކަށް ހޮވުނީ ބަންޔަން ޓްރީ ވައްބިންފަރެވެ.

ޖުމްލަ 12 ޓީމު ހަތަރު ގުރޫޕަށް ބަހާލައިގެން ކުޅުނު ނޯތު ކާފް ޒޯންގައި، ޖުމްލަ 12 ގޯލު ޖަހައިގެން ޒޯންގެ ޓޮޕް ސްކޯރާގެ މަގާމް ހޯދީ ޝެރެޓަން މޯލްޑިވްސް ފުލް މޫންގެ މުހައްމަދު މުސްލިހެވެ.

ޒޯންގެ އެންމެ މޮޅު ފަސް ކުޅުންތެރިންނަނީ ސަންގެލިގެ އަރުޝަމް މޫސާ ނައީމް އާއި ޝައުފާންގެ އިތުރުން މީރު މޯލްޑިވްސްގެ އަލީ ރީހާން އާއި އިބްރާހިމް ޝިނާޒް އަދި ޝެރެޓަންގެ މުސްލިހެވެ.

ޒޯންގެ ޗެމްޕިއަންކަމާ އެކު އޮބްލޫ ސިލެކްޓް ސަންގެލި އަށް ވަނީ މުބާރާތުގެ ސެމީ ފައިނަލުން ފުރުސަތު ލިބިފަ އެވެ. އަންގާރަ ދުވަހު ކުޅޭ ސެމީ ފައިނަލްގައި އެޓީމު ވާދަކުރާނީ ޖޯލި މޯލްޑިވްސްއާ އެވެ.

ޖޯލި މޯލްޑިވްސް ވަނީ ރ. ޒޯންގެ ޗެމްޕިއަންކަން ހޯދައި، ނޮކައުޓް ބުރުގައި ޅ. ޒޯންގެ ޗެމްޕިއަންކަން ހޯދި ލެ މެރީޑިއަން ބަލިކުރުމަށް ފަހު، ކުއާޓާގައި ނ. ޒޯންގެ ޗެމްޕިއަން ސޮނެވާ ޖާނީ ބަލިކޮށްފަ އެވެ.

ހަމަ އެ ދުވަހު ދެވަނަ ސެމީގައި ބައްދަލުކުރާނީ ސައުތު ކާފްގެ ޗެމްޕިއަން ހާޑް ރޮކް މޯލްޑިވްސް އާއި ބަގްލިއޯނީ މޯލްޑިވްސް އެވެ. ބަގްލިއޯނީ ވަނީ އޮގަސްޓް މަހު ބޭއްވި ދ. ޒޯންގެ ޗެމްޕިއަންކަން ހޯދައިފަ އެވެ.

ޓެކާސް ކަޕްގެ ފައިނަލް މެޗު އޮންނާނީ ބުރާސްފަތި ދުވަހު އެވެ.