ރައީސްގެ މުސާރައިން 50 ޕަސެންޓް ނުނަންގަވަން ނިންމަވައިފި

ރައީސް ޑރ. މުހައްމަދު މުއިއްޒުގެ މުސާރައިން 50 ޕަސެންޓް ނުނެންގެވުމަށް އެމަނިކުފާނު މިއަދު ނިންމަވައިފި އެވެ.

ރައީސް މިރޭ އެކްސްގައި ކުރެއްވި ޕޯސްޓެއްގައި ވިދާޅުވީ ދައުލަތުގެ ހަރަދުތައް ކުޑަކުރުމަށް ކުރައްވާ މަސައްކަތްޕުޅުގެ ދަށުން އެ މަނިކުފާނުގެ މުސާރައިން 50 ޕަސެންޓް ނުނެގުމަށް އެމަނިކުފާނު ނިންމަވާފައިވާ ކަމަށެވެ.

ރައީސާއި ނައިބު ރައީސް މުސާރަ ކަނޑައެޅުމުގެ ގާނޫނުގެ ދަށުން މިހާރު ރައީސްގެ މުސާރައަކީ މަހަކު 100،000ރ. އެވެ. އެހެންވެ، މި ނިންމެވުމާ އެކު ރައީސަށް ދެން ލިބިވަޑައިގަންނަވާނީ 50،000ރ. ގެ މުސާރައެކެވެ.

"މީގެ އިތުރުން އަޅުގަނޑުގެ މުސާރައިގެ %50 ނުނަގާ ގޮތަށް ހަމަޖައްސަން ދެންނެވުން،" ރައީސްގެ ޕޯސްޓުގައި ވިދާޅުވި އެވެ.

ރައީސް މިއަދު ވަނީ ދައުލަތުގެ ސިޔާސީ މުވައްޒަފުންނާއި ދައުލަތުގެ އިސްވެރިންނާއި ކުންފުނިތަކުގެ އިސްވެރިން އަދި ރައްޔިތުންގެ މަޖިލީހުގެ މެމްބަރުންނާއި ފަނޑިޔާރުން ވެސް ހިމެނޭ ގޮތަށް، މުސާރައިން 10 ޕަސެންޓް، ދެ އަހަރު ދުވަހުގެ މުއްދަތަށް އުނިކުރަން ހުށަހަޅަން ނިންމަވައިފަ އެވެ.

ރައީސް ވިދާޅުވި ގޮތުގައި އެއީ މަޖިލީހަށް އަންނަ އަހަރުގެ ދައުލަތުގެ ބަޖެޓު ހުށަހަޅާއިރު، ސަރުކާރުގެ އިގުތިސާދީ އިސްލާހީ އެޖެންޑާގެ ދަށުން ދައުލަތުގެ ހަރަދުތައް ކުޑަކުރުމުގެ މަގުސަދުގައި އެމަނިކުފާނު އެޅުއްވި ފިޔަވަޅުތަކެކެވެ.

މި ފިޔަވަޅުތައް އެޅި ނަމަވެސް، 12،000ރ. އަށް ވުރެ ދަށުން މުސާރަ ލިބޭ މުވައްޒަފުން އިސްތިސްނާވާނެ ކަމަށް ވެސް ރައީސް ވިދާޅުވި އެވެ.

ދަރަނި ބޮޑުވެ، ރާއްޖޭގެ އިގުތިސާދީ ހާލަތު ދަށަށް ގޮސްފައި ވާތީ، ދައުލަތުގެ ހަރަދުތައް ކުޑަކުރުމުގެ ގޮތުން ގިނަ ފިޔަވަޅުތަކެއް އަޅަން ސަރުކާރުން ވަނީ ނިންމައިފަ އެވެ.

ހަރަދުތައް ކުޑަކުރުމުގެ ސިޔާސަތުގެ ދަށުން، ސިޔާސީ މަގާމުތަކުގައި މިހާރު ތިބި 228 މީހަކު މަގާމުން ވަކިކުރަން ވެސް ރައީސް ވަނީ މިދިޔަ ހަފުތާގައި ނިންމަވައިފަ އެވެ. އެ ނިންމެވުމުގެ ސަބަބުން މަހަކު 5.7 މިލިއަން ރުފިޔާ ދައުލަތަށް ސަލާމަތް ކުރެވޭނެ ކަމަށް ރައީސް ވިދާޅުވެފައިވެ އެވެ.