ކޮވިޝީލްޑް ވެކްސިން ހެދި ކުންފުނިން ކަރަންގެ ދަރުމާގެ 50 ޕަސެންޓް ހިއްސާ ގަނެފި

ކޮވިޑް-19 އަށް ފަރުވާކުރުމަށް ކޮވިޝީލްޑް ވެކްސިން އުފެއްދި އިންޑިއާގެ ކުންފުނިން ބޮލީވުޑްގެ ޑައިރެކްޓަރު/ޕްރޮޑިއުސަރު ކަރަން ޖޯހަރްގެ ދަރްމާ ޕްރޮޑަކްޝަންގެ 50 ޕަސެންޓް ހިއްސާ މިއަދު ގަނެފި އެވެ.

ސީރަމް އިންސްޓިޓިއުޓް އޮފް އިންޑިއާ ޕްރައިވެޓް ލިމިޓެޑަކީ އިންޑިއާގެ މަހުޖަނު އަދާރް ޕޫނަވައްލާގެ ކުންފުންޏެވެ. ކަރަންގެ ދަރްމާ ޕްރޮޑަކްޝަންގެ ހިއްސާ ގަތީ، އެ ކުންފުނީގެ ދަށުން މީގެ ކުޑަ ދުވަސްކޮޅެއް ކުރިން އުފެއްދި ސްރީން ޕްރޮޑަކްޝަނުންނެވެ.

ބޮލީވުޑްގެ އެންމެ ބޮޑު އެއް ޕްރޮޑަކްޝަން ހައުސް ވެސް ކަމަށްވާ ދަރްމާ އިން މިއަދު ވަނީ އެ ކުންފުނީގެ 50 ޕަސެންޓް ހިއްސާ ސްރީން ޕްރޮޑަކްޝަނަށް ވިއްކާލިކަން ނޫސްބަޔާނެއް މެދުވެރިކޮށް އިއުލާންކޮށްފަ އެވެ. އަދި އަދާރް ވެސް ވަނީ އެކަމާ ގުޅޭ ގޮތުން ނޫސްބަޔާނެއް ނެރެފަ އެވެ.

ސްރީން ޕްރޮޑަކްޝަނުން ވަނީ ދެ ޕްރޮޑަކްޝަން ގުޅިގެން ކޮންޓެންޓު އުފެއްދުމަށް 10 ބިލިއަން ރުޕީސްގެ އިންވެސްޓްކުރަން ނިންމައިފަ އެވެ. އަދި ދަރްމާއިން ވެސް ހަމަ އެ އަދަދަށް ރުޕީސް އިންވެސްޓްކުރަން ވަނީ ނިންމައިފަ އެވެ.

ދަރްމާގެ ނޫސްބަޔާނުގައި ބުނީ ކުންފުނީގެ އެގްޒެކެޓިވް ޗެއާމަނަކީ އަދިވެސް ކަރަން ކަމަށާއި ސީއީއޯއަކަށް ވެސް ހުންނާނީ ކުރިން ވެސް އެ މަގާމުގައި ހުރި އަޕޫރްވާ މެހެތާ ކަމަށެވެ.

މި އެއްބަސްވުމަކާ އެކު އެކި ބަސްތަކުން ފިލްމާއި ސީރީޒާއި ފްރެންޗައިޒްތަކާ އަދި އެހެން ކޮންޓެންޓުތައް ވެސް އުފައްދާނެ ކަމަށް އެ ބަޔާނުގައި ބުންޏެވެ.

ކަރަންގެ ދަރްމާގެ މައިނޯރިޓީ ހިއްސާއެއް ގަންނަން އިންޑިއާގެ މަހުޖަނު މުކޭޝް އަމްބާނީގެ ކުންފުނި، ރިލަޔަންސް އިންޑަސްޓްރީސް ލިމިޓެޑް (އާރްއައިއެލް) އިން ވެސް މަސައްކަތްކުރި އެވެ. މީގެ ކުރިން ވަނީ އިންޑިއާގެ ބޮޑު ކުންފުންޏެއް ކަމަށްވާ ގޮއެންކާ ގްރޫޕްގެ ދަށުގައިވާ ސަރެގާމާ އިން ވެސް ދަރްމާ ގަތުމަށް މަސައްކަތް ކުރި އެވެ. ނަމަވެސް، ނޫސްތަކުން ރިޕޯޓްކުރި ގޮތުގައި، އަގާ ގުޅޭ މައްސަލައެއްގައި އެ އެއްބަސްވުންތައް ވެސް ކުރިއަށް ނުދިޔަ އެވެ.

ދަރްމާގެ 90.7 ޕަސެންޓް ހިއްސާ ކުރިން އޮތީ ކަރަން އަށެވެ. އަދި 9.24 ޕަސެންޓް ހިއްސާ އޮތީ ކަރަންގެ މަންމަ ހިރޫ ޖޯހަރަށެވެ.

ކަރަންގެ ބައްޕަ ޔަޝް ޖޯހަރު 1979 ވަނަ އަހަރު އުފެއްދި ދަރްމާ ޕްރޮޑަކްޝަންސަނަކީ އިންޑިއާގެ އެންމެ ކުރިއަރާފައިވާ ފިލްމު ޕްރޮޑަކްޝަން ކުންފުނިތަކުގެ ތެރެއިން އެއް ކުންފުންޏެވެ. ކާމިޔާބު އެތައް ފިލްމުތަކެއް އެ ކުންފުނިން އުފައްދާފައިވެ އެވެ. ކަރަން އެ ކުންފުންޏާ ހަވާލުވީ އޭނާގެ ބައްޕަ މަރުވުމުން 2003 ގަ އެވެ.