"ގުޑް ނިއުސް"އަށް ފަހުގައި ދެން އޮތީ "ބޭޑް ނިއުސް"

ކަރަން ޖޯހަރްގެ ދަރްމާ ޕްރޮޑަކްޝަނުން ގެނެސްދިން ކާމިޔާބު ފިލްމު "ގުޑް ނިއުސް"ގެ ދެވަނަ ބައި "ބޭޑް ނިއުސް" އިއްޔެ އިއުލާންކޮށްފި އެވެ.

މި ފިލްމުގެ ޕޯސްޓަރާއި ރިލީޒްކުރާ ތާރީހު ވަނީ ސޯޝަލް މީޑިއާ މެދުވެރިކޮށް އާންމުކޮށްފަ އެވެ.

ވިކީ ކައުޝަލް އާއި ތުރިޕްތީ ދިމްރީ އަދި އައްމީ ވާކް ލީޑް ރޯލު ކުޅޭ މި ފިލްމަކީ މީގެ ދެ އަހަރު ކުރިން ޝޫޓިން ނިމިފައި އޮތް ފިލްމެކެވެ. މި ފިލްމަށް ކުރިން ކީ ވެސް އެހެން ނަމެކެވެ. އެއީ "މެރޭ މެހެބޫބް މޭރޭ ސަނަމް" އެވެ.

މި ފިލްމު ސިނަމާތަކުގައި ދައްކަން ފަށަން މިހާރު ނިންމާފައި ވަނީ އަންނަ ޖުލައި މަހުގެ 19 އިން ފެށިގެންނެވެ.

ދަރްމާ ޕްރޮޑަކްޝަން އާއި އެމެޒަން ޕްރައިމް ވީޑިއޯ ގުޅިގެން ހަދާފައިވާ މި ފިލްމުގެ ޑައިރެކްޓަރަކީ އާނަންދު ތިވާރީ އެވެ.

"ގުޑް ނިއުސް" އެކޭ އެއްގޮތަށް "ބޭޑް ނިއުސް" އަކީ ދަރިމައިވުމުގެ މައްސަލައާ ގުޅޭ ހަގީގީ ހާދިސާއެއްގެ މައްޗަށް ބިނާކޮށް ގެނެސްދޭ ފިލްމެކެވެ.

ކަރީނާ ކަޕޫރް ހާން އާއި އަކްޝޭ ކުމާރް ލީޑު ރޯލު ކުޅުނު، 2019 ވަނަ އަހަރު ގެނެސްދިން "ގުޑް ނިއުސް" އަކީ އައިވީއެފްގެ ފަރުވާ ހޯދައިގެން ދަރިން ހޯދަން އުޅުނު ދެމަފިރިންތަކެއްގެ ދަރިފަނި އޮޅުންބޮޅުންވެގެން ހިނގާ މަޖާ ކަންތައްތަކެއް ދެއްކި ފިލްމެކެވެ. އެ ފިލްމަށް އާންމުންގެ ބޮޑު ތަރުހީބެއް ލިބުނެވެ.