ސީރިއާއިން ގެނައި މީހުން ސެންޓަރުގައި އިތުރު ހަ މަހު ބައިތިއްބަނީ

ސީރިއާގެ ދާހިލީ ހަނގުރާމާގައި ބައިވެރިވާން އެ ގައުމަށް ގޮސް ހާލުގައި ޖެހުމުން ސަރުކާރުން ރާއްޖެ ގެނައި ފަސް އާއިލާއެއްގެ 19 މީހުން ރީ އިންޓަގްރޭޝަން ސެންޓަރުގައި އިތުރު ހަ މަސް ދުވަހު ބައިތިއްބަން ހޯމް ލޭންޑް އެންޑް ސެކިއުރިޓީ މިނިސްޓްރީން ނިންމައިފި އެވެ.

ހަނގުރާމައަށް ދިޔަ މީހުންނާއި އެ މީހުންނާ އެކު ގެންދިޔަ އަންހެނުންނާއި އެ މީހުންގެ ދަރިންނާ އެކު 21 މީހަކު އެހީއަށް އެދުމުން ޗާޓަރު ފްލައިޓެއްގައި ސަރުކާރުން ރާއްޖެ ގެނެސްދިނީ މިދިޔަ ޖެނުއަރީ މަހު އެވެ. އޭގެ ތެރޭގައި ހިމެނެނީ 15 ކުޑަކުދިންނާއި ފަސް އަންހެނުންނާއި ފިރިހެނެކެވެ. އެ އެންމެން ވެސް އަލުން އަނބުރާ މުޖުތަމައުއަށް ގެނައުމުގެ ގޮތުން ރިހެބިލިޓޭޓްކުރުމަށް ހިންމަފުށީގައި ގާއިމް ކޮށްފައިވާ ސެންޓަރުގަ އެވެ.

ހޯމް ލޭންޑް މިނިސްޓްރީގެ ސްޕޯކްސް ޕާސަން ފާތިމަތު ރިފާތު "މިހާރު" އަށް ވިދާޅުވީ އެ މީހުންނަށް އޭރު ދިން ހަ މަހުގެ މުއްދަތު ހަމަވުމުން އިތުރު ހަ މަސް ދުވަހު ރީ އިންޓަގްރޭޝަން ސެންޓަރުގައި ތިބެން ޖެހޭ ގޮތަށް ނިންމީ މިދިޔަ އޮގަސްޓު 16 ގައި ކަމަށެވެ.

އޭގެ ތެރެއިން ޕްރޮގްރާމް ފުރިހަމަކުރި ދެ ކުއްޖަކު އާއިލާއާ ހަވާލުކޮށްފައިވާ ކަމަށް ވެސް އޭނާ ވިދާޅުވި އެވެ. ބާކީ ތިބި 19 މީހުން މި ވަގުތު އެ ސެންޓަރުގައި އެބަ ތިއްބެވެ.

ހަނގުރާމައަށް ގޮސް އަންނަ މީހުން އަނބުރާ މުޖުތަމައުއަށް ނެރެން ހުރިހާ ހަރަދުތަކެއް ކުރާނީ ސަރުކާރުންނެވެ.

އެ މީހުން ރާއްޖެ ގެނައި ދުވަހު ހޯމްލޭންޑް ސެކިއުރިޓީ މިނިސްޓަރު އަލީ އިހުސާން ވިދާޅުވެފައި ވަނީ ހަނގުރާމަވެރި ސަރަހައްދުތަކުގައި ތިއްބާ ރާއްޖެ ގެނައި ދިވެހިންގެ ތެރެއިން ގާނޫނީ ގޮތުން ފިޔަވަޅު އަޅަންޖެހޭ މީހުންނާ މެދު އަޅަންޖެހޭ ފިޔަވަޅުތައް އަޅާނެ ކަމަށެވެ.

ރައީސް ޑރ. މުހައްމަދު މުއިއްޒުގެ ވިސްނުންފުޅަކީ ދިވެހި ރައްޔިތަކަށް ލިބެން ޖެހޭ ސަލާމަތާއި ރައްކާތެރިކަމަށްޓަކައި މުޖުތަމައުގައި ބައިވެރިވާ މީހަކަށް ހެދުމަށް ކުރަންޖެހުނު ކޮންމެ ހަރަދެއް ދައުލަތުން ކުރެއްވުން ކަމަށް މިނިސްޓަރު އޭރު ވިދާޅުވި އެވެ.

ޓެރަރިޒަމް މަނާކުރުމުގެ ގާނޫނު ބުނާ ގޮތުން ހަނގުރާމަވެރި ސަރަހައްދަކަށް ސަރުކާރުގެ ހުއްދަ ނެތި ދިއުމަކީ ފަސް އަހަރާއި ހަތް އަހަރާ ދެމެދުގެ މުއްދަތަކަށް ޖަލަށްލެވޭ ކުށެކެވެ. އެ ގާނޫނުގެ ދަށުން ސީރިއާގެ ހުރިހާ ސަރަހައްދުތަކަކީ ހަނގުރާމަވެރި ސަރަހައްދެއްގެ ގޮތުގައި ރައީސް އޮތީ ކުރިން ކަނޑައަޅުއްވައިފަ އެވެ.

ހަނގުރާމައަށް ގޮސް ހާލުގައި ޖެހިފައި ވަނިކޮށް އެންމެ ފުރަތަމަ ބަޔަކު ގެނައީ 2022 ވަނަ އަހަރު އެވެ. އެއީ އަންހެނަކާއި އޭނާގެ ތިން ދަރިންނެވެ. އެ އާއިލާ ވެސް އިންޓަގްރެޓޭޝަން ސެންޓަރުގައި ޕްރޮގްރާމް ފުރިހަމަ ކުރުމުން އަނބުރާ މުޖުތަމައުއަށް ދޫކޮށްލައިފަ އެވެ.