މިފްކޯގެ މައްޗަށް އޮތް 20 މިލިއަން ރުފިޔާގެ ހުކުމް ބާތިލެއް ނުކުރި

އަމިއްލަ ކުންފުންޏަކަށް 20.5 މިލިއަން ރުފިޔާ ގެއްލުމުގެ ބަދަލުގެ ގޮތުގައި ދޭން މިފްކޯގެ މައްޗަށް ކޮށްފައިވާ ހުކުމް ބާތިލް ނުކުރެވޭނެ ސިވިލް ކޯޓުން ނިންމައިފި އެވެ.

މިފްކޯ އިން އެއްބަސްވުމަކާ ހިލާފުވެފައިވާތީ އެމްޕްލޯއިމަންޓް ބިއުރޯ މޯލްޑިވްސް ކިޔާ ކުންފުންޏަކުން ސިވިލް ކޯޓަށް ހުށަހެޅި މައްސަލައަކާ ގުޅިގެން ގެއްލުމުގެ ބަދަލުގެ ގޮތުގައި 20.5 މިލިއަން ރުފިޔާ ދައްކަން މިފްކޯގެ މައްޗަށް މިދިޔަ އަހަރުގެ ނޮވެމްބަރު މަހު އެ ކޯޓުން އޮތީ ހުކުމްކޮށްފަ އެވެ.

ސިވިލް ކޯޓުން މިފްކޯގެ ޣައިރު ހާޒިރުގައި އޭރު ކުރި ހުކުމުގައި އަންގާފައިވަނީ 14 ދުވަސް ތެރޭގައި ފައިސާ އެކީ އެއްފަހަރާ ދެއްކުމަށެވެ. ނަމަވެސް މަދަނީ އިޖްރައާތުގެ ގާނޫނުގެ ދަށުން، ޣައިރު ހާޒިރުގައި ކުރާ ހުކުމްތައް ރިވިއުކުރަން އެދެވޭތީ މިފްކޯއިން ވަނީ އެ ހުކުމް ބާތިލްކުރަން ސިވިލް ކޯޓުގައި އެދިފަ އެވެ.

މިފްކޯ އިން ހުށަހެޅި މައްސަލާގައި ބުނެފައިވަނީ ގެއްލުމުގެ ބަދަލު ދޭން ނުޖެހޭނެ ހަގީގީ ސަބަބުތަކެއް ހުރުމުން އެ މައްސަލާގައި ހެކި ހުށަހަޅަން ބޭނުންވާ ކަމަށެވެ.

ނަމަވެސް، މިދިޔަ ބުރާސްފަތި ދުވަހު ސިވިލް ކޯޓުން ކުރި ހުކުމުގައިވަނީ 20.5 މިލިއަން ދައްކަން މިފްކޯގެ މައްޗަށް ކޮށްފައިވާ ހުކުމަށް ބަދަލު ގެންނަންޖެހޭ ނުވަތަ ބާތިލް ކުރަންޖެހޭ ސަބަބެއް މި މައްސަލާގައި މިފްކޯއަށް ދެއްކިފައިނުވާ ކަމަށެވެ.

އެހެންކަމުން، އެ ހުކުމް ބާތިލް ކުރަން ޖެހޭ ހާލަތެއް ނެތް ކަމަށް ހުކުމުގައިވެ އެވެ.