ޒުވާން ޓީމަށް މޮޅެއް ނުލިބުނު، ސީނިއާ ޓީމު ފުރައިފި

ރާއްޖޭގެ ޒުވާން ފިރިހެން ގައުމީ ވޮލީބޯޅަ ޓީމަށް މޮޅެއް ނުލިބި މިއަހަރުގެ ކާވާ 20 އަހަރުން ދަށުގެ ޗެމްޕިއަންޝިޕް ނިންމާލި އިރު، ކާވާ ޗެލެންޖް ކަޕްގައި ވާދަކުރަން ސީނިއާ ގައުމީ ޓީމު ވެސް މާބޮޑު ތައްޔާރީތަކެއް ނެތި އުޒްބަކިސްތާނަށް ފުރައިފި އެވެ.

ވާދަވެރި މެޗެއްގެ ތަޖުރިބާ ނެތި ޖޫނިއާ ޓީމު ލަންކާގައި އޮތް މުބާރާތުގެ ރައުންޑް ރޮބިން ބުރުގެ ފުރަތަމަ މެޗުގައި ނުކުތީ ތުރުކުމެނިސްތާނާ ދެކޮޅަށެވެ. އެ މެޗުގެ ފުރަތަމަ ދެ ސެޓު 25-10، 25-13 އިން ރާއްޖެއަށް ގެއްލުނު އިރު، ފަހު ސެޓުގައި ވަނީ ރަނގަޅު ވާދައެއް ކޮށްފަ އެވެ. އެ ސެޓު ގެއްލުނީ 27-25 އިންނެވެ.

ދެ ވަނަ މެޗުގައި ލަންކާ އަތުން ބަލިވީ، 25-14، 25-14 އަދި 25-11 އިންނެވެ. އެއަށް ފަހު ނޭޕާލާ ދެކޮޅަށް ކުޅުނު މެޗުން 25-5، 25-12 އަދި 25-20 އިން ބަލިވި އިރު، އުޒްބަކިސްތާން އަތުން ބަލިވީ 25-12، 25-10 އަދި 25-16 އިންނެވެ. އަދި މި ބުރުގެ ފަހު މެޗުގައި ކިރިގިސްތާން އަތުން ބަލިވީ 25-15، 25-21 އަދި 25-19 އިންނެވެ.

މުހައްމަދު މުނީޒްގެ ކޯޗުކަމުގައި ވާދަކުރި ރާއްޖޭގެ ޒުވާން ޓީމު ރޭންކިން މެޗުގައި ނުކުތީ ލަންކާއާ ދެކޮޅަށެވެ. މި މެޗުން ލަންކާ މޮޅުވީ، 25-12، 25-20 އަދި 25-20 އިންނެވެ.

އަންނަ ހުކުރު ދުވަހުން ފެށިގެން އަންނަ ހަފްތާގެ ބުރާސްފަތި ދުވަހުގެ ނިޔަލަށް ކުރިއަށް ގެންދާ ކާވާ ޗެލެންޖް ކަޕްގައި ވާދަކުރަން އުޒްބަކިސްތާނަށް ދިޔަ ސީނީއާ ގައުމީ ޓީމުގެ ކެޕްޓަނަކީ އިސްމާއިލް ސާޖިދު (ކުޑަކާއްޓޭ) އެވެ. އަދި ކޯޗަކަށް ހަމަޖައްސާފައި ވަނީ މުހައްމަދު ޝަރަފް އެވެ.

ރާއްޖެ އާއި އުޒްބަކިސްތާންގެ އިތުރުން މުބާރާތުގައި ދެން ވާދަކުރަނީ ތުރުކުމެނިސްތާން، ތަޖިކިސްތާން، ނޭޕާލް އަދި އަފްޣާނިސްތާނެވެ.

ވޮލީ ޓީމު އެންމެ ފަހުން ކުޅުނީ މިދިޔަ އަހަރު މަޑަގަސްކަރައިގައި އޮތް އިންޑިއަން އޯޝަން އައިލެންޑް ގޭމްސްގަ އެވެ.