"ސްތުރީ 2"ގެ މަންޒަރެއް އެހެން ފިލްމަކުން ކޮޕީ ކުރި މައްސަލައެއް

މިދިޔަ ހުކުރު ދުވަހު ޕްރިމިއާކުރި ފިލްމު "ވިކީ ވިދްޔާ ކާ ވޯ ވާލާ ވީޑިއޯ"ގައި ބޮލީވުޑްގެ މި އަހަރުގެ އެންމެ ކާމިޔާބު ފިލްމު "ސްތުރީ 2"ގެ މަަންޒަރެއް ކޮޕީ ކުރި މައްސަލައެއް ހޫނުވެއްޖެ އެވެ.

"ވިކީ ވިދްޔާ ކާ ވޯ ވާލާ ވީޑިއޯ"ގެ ޑައިރެކްޓަރު ރާޖް ޝާންދިލްޔާ މިހާރު ވަނީ އެކަމަށް މާފަށް އެދި ބަޔާނެއް ވެސް ނެރެފަ އެވެ.

އެ ފިލްމުގައި ވަނީ "ސްތުރީ 2"ގެ ކެރެކްޓާއަކާއި ޑައިލޮގްތަކެއް ހުއްދަ ނެތި ބޭނުންކޮށްފަ އެވެ.

މި ދެ ފިލްމުގައި ވެސް ލީޑު ރޯލު ކުޅުނީ ރާޖްކުމާރް ރާއޯ އެވެ. "ވިކީ ވިދްޔާ ކާ ވޯ ވާލާ ވީޑިއޯ"ގެ ލީޑު އެކްޓްރެސްއަކީ ތުރިޕްތީ ދިމްރީ އެވެ. އަދި "ސްތުރީ 2"ގެ ލީޑު އެކްޓްރެސް އަކީ ޝްރައްދާ ކަޕޫރެވެ.

ޑައިރެކްޓަރު ރާޖުގެ ބަޔާނުގައި ބުނީ "ސްތުރީ 2"ގެ މަންޒަރުތަކެއް ހުއްދަ ނެތި އޭނާގެ ފިލްމުގައި ބޭނުންކުރެވުމުން އޭނާގެ އަމިއްލަ ނަމުގައި އާއި ފިލްމު އުފެއްދި ޕްރޮޑަކްޝަން ހައުސްތަކުގެ ނަމުގައި "ވިކީ ވިދްޔާ ކާ ވޯ ވާލާ ވީޑިއޯ" އުފެއްދި ޕްރޮޑަކްޝަން ހައުސް ކަމަށްވާ މެޑޮކް ފިލްމްސްގެ ފަރާތުން ވަރަށް ބޮޑަށް މާފަށް އެދޭ ކަމަށެވެ.

"މެޑޮކް ފިލްމްސްގެ 'ސްތުރީ' ފްރެންޗައިޒްގެ ކެރެކްޓަރެއް އަދި ޑައިލޮގެއް ހުއްދަނެތި ބޭނުންކުރުމާ ގުޅިގެން އިހުލާސްތެރިކަމާ އެކު އަދި ޝަރުތެއް ނެތި މަފާށް އެދެން. މިކަމުގެ ސަބަބުން މެޑޮކް ފިލްމްސް އަދި އެ ފަރާތުގެ ފްރެންޗައިޒަށް ލިބުނު ގެއްލުމަށް ހިތާމަކުރަން،" އެ ބަޔާނުގައި ބުންޏެވެ.

މި މައްސަލަ ހައްލުކުރުމަށް އަވަސް ފިޔަވަޅުތަކެއް އަޅަން ނިންމާފައިވާ ކަމަށް ވެސް ރާޖް ބުންޏެވެ.

"މެޑޮކް ފިލްމްސްގެ 'ސްތުރީ' އިން އަޅުގަނޑުމެން ބޭނުންކޮށްފައިވާ ކެރެކްޓަރު އަދި ޑައިލޮގް އަޅުގަނޑުމެންގެ ފިލްމުން ވީހާ ވެސް އަވަހަކަށް ނެގުމުގެ މަސައްކަތް މިހާރު މި ދަނީ ކުރަމުން. މެޑޮކް ފިލްމްސްގެ އެދުމާ އެއްގޮތަށް މި މަހު 15 ގެ ކުރިން އެ ބަދަލު ގެންނަން ވަނީ ނިންމައިފައި،" އެ ބަޔާނުގައި ބުންޏެވެ.

މުސްތަގުބަލުގައި މި ކަހަލަ ކަމެއް ތަކުރާރު ނުވާނެ ކަމުގެ ޔަގީކަން ވެސް ރާޖް ދިނެވެ.

"ވިކީ ވިދްޔާ ކާ ވޯ ވާލާ ވީޑިއޯ"ގައި ދައްކަނީ ކައިވެނީގެ ވީޑިއޯއެއް ރެކޯޑްކޮށްފައިވާ ސީޑީއެއް ވަގަށް ނެގުމުން އެ އަނބުރާ ހޯދަން އުޅުމުގެ ތެރޭގައި ދިމާވާ މަޖާ ކަންތައްތަކެކެވެ.

"ސްތުރީ 2" އަކީ އިންޑިއާގެ ބޮކްސް އޮފީހުގައި އެންމެ ބޮޑު އާމްދަނީއެއް ހޯދި ހިންދީ ފިލްމަށް މިހާރު ވަނީ ވެފަ އެވެ.